అవును.. మా తమ్ముడు ఆ సినిమా చేస్తున్నాడు

‘బాబు బంగారం’ తర్వాత విక్టరీ వెంకటేష్ చేయబోయే సినిమా ఏదనే విషయంలో ఫుల్ క్లారిటీ వచ్చేసింది. కొంత కాలంగా ప్రచారం జరుగుతున్నట్లే.. హిందీ-తమిళ భాషల్లో విజయంతమైన ‘సాలా ఖడూస్’ రీమేక్ లో వెంకీ నటించబోతున్నాడు. ఈ విషయంపై వెంకీ అన్నయ్య సురేష్ బాబే క్లారిటీ ఇచ్చేశారు. వెంకీ ‘సాలా ఖడూస్’ రీమేక్ లో నటిస్తాడని.. ఆ చిత్రంలో తమ ‘సురేష్ ప్రొడక్షన్స్’ సంస్థకు కూడా భాగస్వామ్యం ఉందని ఆయన వెల్లడించారు.

‘సాలా ఖడూస్’ ఒరిజినల్ వెర్షన్ ను నిర్మించిన వైనాట్ స్టూడియోస్ సినిమానే తెలుగులో తమ భాగస్వామ్యంతో ఈ చిత్రాన్ని నిర్మిస్తుందని ఆయన చెప్పారు. ప్రస్తుతం తెలుగు నేటివిటీకి తగ్గట్లు మార్పులతో డైలాగ్ వెర్షన్ తయారవుతోందని ఆయన తెలిపారు. ఒరిజినల్ కు దర్శకత్వం వహించిన సుధా కొంగరనే ఈ చిత్రానికి దర్శకత్వం వహిస్తుందన్నారు. ఈ సినిమా కోసం వెంకటేష్ సిక్స్ ప్యాక్ బాడీ పెంచుతారట కదా అని విలేకరులు అడిగితే.. ‘‘ఈ పాత్రకు సిక్స్ ప్యాకే ఉండాల్సిన అవసరం లేదు. ఫిట్ గా ఉంటే చాలు’’ అని సురేష్ అన్నారు.

మాధవన్ పోషించిన బాక్సింగ్ కోచ్ పాత్రనే తెలుగులో వెంకీ చేయబోతున్నారు. ఒరిజినల్లో నటించిన రితికా సింగే ఇక్కడా అదే పాత్రలో కనిపిస్తుంది. ఎంతో టాలెంట్  ఉన్నా.. బాక్సింగ్ రాజకీయాల వల్ల ఛాంపియన్ కాలేకపోయిన కథానాయకుడు.. కోచ్ గా మారి మట్టిలో మాణిక్యాలను వెలికి తేవాలనుకుంటాడు. అలా ఓ పేద కుటుంబానికి చెందిన గడుసు పిల్లను ఛాంపియన్ చేయడానికి నడుం బిగిస్తాడు. తెలుగు వెర్షన్ వైజాగ్ బ్యాగ్రౌండ్లో సాగుతుందని సమాచారం.