తమన్నా దొరికిపోయిందిగా..

ఈ మధ్య తమిళ దర్శకుడు సూరజ్ హీరోయిన్ల విషయంలో చేసిన వ్యాఖ్యలు పెద్ద దుమారమే రేపాయి. హీరోయిన్లంటే అందాల ప్రదర్శన చేయాల్సిందేనన్న అతడి వ్యాఖ్యల మీద అతడి సినిమా ‘ఒక్కడొచ్చాడు’లో కథానాయికగా నటించిన తమన్నాతో పాటు చాలామంది ఘాటుగా స్పందించారు. ఆ వ్యాఖ్యలకు తాను చాలా బాధపడి పోయి ‘దంగల్’ సినిమా నుంచి మధ్యలో బయటికి వచ్చేసి మరీ ఈ వ్యాఖ్యల్ని ఖండించినట్లు చెప్పుకుంది తమన్నా. ఇలాంటి వాటిపై ఘాటుగా స్పందించకుంటే.. సూరజ్ లాంటి వాళ్లకు బుద్ధి రాదని వ్యాఖ్యానించింది తమన్నా.

అంతా బాగానే ఉంది కానీ.. ఇంతకీ సినిమాల్లో మీరు సెక్సీగా కనిపించడం మీద ఏమంటారు.. ‘బాహుబలి’ లాంటి సినిమాల్లో రెచ్చగొట్టేలా నటించడం కరెక్టేనా.. తెరపై హీరోయిన్లు మరీ అంత సెక్సీగా కనిపిస్తే ఎలా.. అనే ప్రశ్నలు తమన్నాకు సంధిస్తే మాత్రం సమాధానం చెప్పడానికి తడబడిపోయింది. చూసేవాళ్ల దృష్టిని బట్టి ఇది ఆధారపడి ఉంటుందంటూ సమాధానం దాటవేసే ప్రయత్నం చేసింది. హీరోయిన్లలో ఎంత టాలెంట్ ఉన్నప్పటికీ వాళ్లను సెక్సీగా ప్రెజెంట్ చేయడానికే మన దర్శకులు ప్రయత్నిస్తారు. హీరోయిన్లు కూడా ఈ విషయంలో మొహమాటం ఏమీ పడరు. రకరకాల విన్యాసాలతో కుర్రాళ్లను రెచ్చగొట్టే ప్రయత్నం చేస్తారు. సూరజ్ లాంటి వాళ్ల వ్యాఖ్యల్ని కచ్చితంగా తప్పుబట్టాల్సిందే కానీ.. ఇలా హీరోయిన్లతో సెక్సీ వేషాలు వేయించడం మీదా అభ్యంతరం వ్యక్తం చేయాల్సిందే. కానీ ఈ విషయానికి వచ్చేసరికి ‘‘చూసేవాళ్ల దృష్టిని బట్టి ఉంటుంది’’ అంటూ సమాధానాలు దాటవేయడం ద్వారా దొరికిపోయింది తమ్మూ. పనిలో పనిగా సెక్సీ అంటే హీరోయిన్లేనా.. హీరోలకూ వర్తించదా అంటూ తమన్నా కొత్త వాదన తీసుకురావడం విశేషం.

Like Us on Facebook : https://www.facebook.com/Tupakidotcom/