పూనమ్ కౌర్ ఎందుకు పారిపోయినట్టో!

ఎర్రగా.. బబ్లీగా ఉంటూ కైపెక్కే నవ్వులతో కట్టిపడేసే పూనమ్ కౌర్ గుర్తుందా! లేదా అయితే వెంకటేశ్ నటించిన నాగవల్లిలో ధర్మవరపు సుబ్రహ్మణ్యం కూతురిగా నటించింది చూడండి ఆమె పూనమ్ కౌర్ అంటే. ఇంకా గుర్తు రాలేదా? తేజ దర్శకత్వంలో ఒక విచిత్రం - వినాయకుడు - గోపీచంద్ హీరోగా నటించిన శౌర్యం - రామ్ హీరోగా నటించిన గణేశ్ (జస్ట్ గణేశ్)లో తదితర తెలుగు చిత్రాల్లో నటించిందీ సుందరి. ఇంతకు విషయమేమిటంటారా? అమ్మడికి తెలుగులో పెద్దగా అవకాశాలు లేకపోవడంతో తమిళ చిత్ర సీమలో పాగా వేసింది. ప్రస్తుతం 'నండు' అనే చిత్రంలో నటిస్తోంది. ఈ చిత్రంలో రమేశ్ హీరోగా నటిస్తుండగా ఇద్దరు హీరోయిన్లు ఉండే ఈ సినిమాలో పూనమ్ కౌర్ ఒక హీరోయిన్ గా లీడ్ రోల్ చేస్తోంది.

ఈ చిత్రం షూటింగ్ ప్రస్తుతం తమిళనాడులో జరుగుతుండగా అర్ధాంతరంగా చెప్పాపెట్టకుండా షూటింగ్ నుంచి పరారైందంట! తొలిరోజు షూటింగ్ లో భాగంగా అకారణంగా తనతోపాటు మిగిలిన యూనిట్ సభ్యులతోనూ గొడవకు దిగిందని చిత్ర దర్శకుడు ఆండాల్ రమేశ్ మీడియాతో వాపోయారు. షూటింగ్ నుంచి పరారవడంతో నిర్మాతకు లక్షలాది రూపాయల నష్టం కలిగిందని దీనిపై నడిగర్ సంఘంలో ఫిర్యాదు చేస్తామని ఆయన చెప్పారు.

కాగా హైదరాబాద్ లో జన్మించిన పూనమ్.. హైదరాబాద్ పబ్లిక్ స్కూల్లో చదివి తర్వాత ఫ్యాషన్ డిజైనింగ్ కోర్సులను అందించడంలో దేశంలోనే పేరొందిన నిఫ్ట్ లో ఫ్యాషన్ డిజైనింగ్ చదివారు. తర్వాత 2006లో ప్రముఖ దర్శకుడు తేజ దర్శకత్వంలో ఒక చిత్రంలో ఎంపికైనా తర్వాత ఆ సినిమాలో ఆమె నటించలేదు. తర్వాత ఆయన దర్శకత్వంలోనే ఒక విచిత్రం అనే సినిమాలో నటించినా మొదటగా విడుదలైన సినిమా మాత్రం మాయాజలం. తెలుగులో ఆమె నటించిన చివరి చిత్రం.. త్రిష కథానాయకిగా నటించిన నాయకి.