స్పెషల్ సాంగ్స్ చేసేది అందుకే.. అంటున్న స్టార్ హీరోయిన్

లాక్ డౌన్ కారణంగా షూటింగ్స్ లేక సెలబ్రిటీస్ అంతా ఎవరిళ్ళకు వారే పరిమితమయ్యారు. ఇక ఇటీవలే రెండు తెలుగు రాష్ట్రాల్లో షూటింగులకు కొన్ని నిబంధనలతో కూడిన అనుమతులు రావడంతో మెల్లగా షూటింగులు మొదలు పెట్టనున్నారు మేకర్స్. కానీ పరిస్థితుల కారణంగా ఇంకా కొద్దిరోజులు ఇంట్లోనే కాలక్షేపం చేయాల్సిన అవసరం ఉంది. ఈ లాక్ డౌన్ అనేది కొందరికి నష్టం చేస్తే.. సెలబ్రిటీస్ కి మాత్రం కలిసొచ్చిందని చెప్పాలి. ఎల్లప్పుడూ షూటింగులు.. ఓపెనింగ్స్.. ఫోటోషూట్లు అంటూ క్షణం తీరిక లేకుండా గడిపే సెలబ్రిటీలు ఈ మధ్యే కాస్త కుటుంబంతో కాలక్షేపం చేస్తున్నారు. ఈ నేపథ్యంలో స్టార్ హీరోయిన్ తమన్నా కూడా దొరికిన సమయాన్ని చక్కగా సద్వినియోగం చేసుకుంటుంది. అంతేగాక సోషల్ మీడియా ద్వారా తన ఫిట్నెస్ వీడియోస్.. తాజా ఫోటోషూట్స్ ఎప్పటికప్పుడు అభిమానులతో షేర్ చేస్తుంది. అది మాత్రమే కాదండోయ్.. అప్పుడప్పుడు లైవ్ లకు వచ్చి అభిమానులతో సరదాగా ముచ్చటిస్తుంది.

ఇటీవలే హలో యాప్ లైవ్ లోకి వచ్చిన మిల్కీ బ్యూటీ.. అభిమానులు అడిగిన ప్రశ్నలకు చాలా సరదాగా సమాధానం ఇచ్చింది. ఇక తాజాగా తను చేస్తున్న స్పెషల్ సాంగ్స్ చేయడం గురించి ఓపెన్ అయి మాట్లాడింది. `నేను స్పెషల్ సాంగ్స్ చేయడాన్ని చాలా మంది తప్పుగా అర్థం చేసుకుంటున్నారు. డబ్బు కోసమే అలాంటి పాటలు చేస్తున్నానని అంటున్నారు. అలాంటి వారి మాటలు నేను పట్టించుకోను. నాకు డ్యాన్స్ అంటే చాలా ఇష్టం. నా డ్యాన్సింగ్ స్కిల్స్ చూపించే అవకాశం వాటి వల్ల కలుగుతోంది. పైగా వీటి వల్ల గతంలో నేను పనిచేసిన స్టార్స్‌తో మళ్లీ కలిసి పనిచేసే అవకాశం వస్తోంది. అందుకే నేను స్పెషల్ సాంగ్స్ చేస్తున్నాన`ని తమన్నా క్లారిటీ ఇచ్చేసింది. ఇదిలా ఉండగా అమ్మడు ప్రస్తుతం సంపత్ నంది దర్శకత్వంలో రూపొందుతున్న స్పోర్ట్స్ డ్రామా ఫిల్మ్ 'సీటీ మార్'లో కబడ్డీ కోచ్ గా నటిస్తుంది.