పుష్ప మేనియా.. వికెట్ తీసి ‘తగ్గేదే లే’ అన్న బంగ్లా బౌలర్

టాలీవుడ్ పాన్ ఇండియా మూవీ 'పుష్ప' క్రేజ్ రోజురోజుకు విస్తరిస్తోంది. ఈ సినిమా బ్లాక్ బస్టర్ అవ్వడమే కాకుండా ట్రెండ్ సెట్టర్ గా నిలిచింది. ఎంతలా అంటే ఇంటర్నేషనల్ స్టార్ క్రికెటర్లంతా ఈ మూవీ సాంగ్స్, డైలాగ్స్ ఇమిటేట్ చేసేంతగా.. బాక్సాఫీస్ వద్ద కలెక్షన్ల సునామీ సృష్టించిన ఈ మూవీలోని 'నీ అవ్వ తగ్గేదేలే' అన్న డైలాగ్ ... ఊ అంటావా మావ.. శ్రీవల్లీ పాట సోషల్ మీడియాను షేక్ చేస్తున్నాయి.

ఆస్ట్రేలియా విధ్వంసక ఓపెనర్ డేవిడ్ వార్నర్ ఇప్పటికే ఈ మూవీకి సంబంధించిన డైలాగ్, పాటలను ఇమిటేట్ చేయగా.. రవీంద్ర జడేజా, సూర్యకుమార్ యాదవ్, ఇర్ఫాన్ పఠాన్, సురేష్ రైనా తదితరులు కూడా నీ అవ్వ తగ్గేదేలే డైలాగ్ తో రచ్చ చేశారు.

ఇప్పటివరకూ సోషల్ మీడియాకే పరిమితమైన పుష్ప క్రేజ్.. ఇప్పుడు క్రికెట్ మైదానానికి కూడా చేరింది. బంగ్లాదేశ్ ప్రీమియర్ లీగ్ (ఐపీఎల్)లో ఓ బౌలర్ వికెట్ తీసిన ఆనందంలో 'నీ అవ్వ తగ్గేదేలే' అనే అల్లు అర్జున్ మేనరిజాన్ని ప్రదర్శిస్తూ సంబరాలు చేసుకున్నాడు. ప్రస్తుతం దీనికి సంబంధించిన వీడియో నెట్టింట్లో వైరల్ గా మారింది.

బీబీఎల్ లో జరిగిన ఈ లీగ్ మ్యాచ్ లో బంగ్లాదేశ్ కు చెందిన అమిత్ హసన్ ఊరించే బంతితో బ్యాట్స్ మెన్ ను బోల్తా కొట్టించాడు. ఎక్స్ ట్రా కవర్ దిశగా బ్యాట్స్ మన్ కొట్టిన షాట్ ను ఫీల్డర్ పరుగెత్తి అద్భుతంగా అందుకున్నాడు. దాంతో అమిత్ హసన్ అల్లు అర్జున్ డైలాగ్ తగ్గేదేలే డైలాగ్ కు సంబంధించిన మేనరిజాన్ని ప్రదర్శించాడు. గడ్డం కింద నుంచి చేయి అడ్డంగా జరుపుతూ సంబరాలు చేసుకున్నాడు. ఆ వీడియో ఇప్పుడు వైరల్ గా మారింది.