'వకీల్ సాబ్' కోసం ప్రమోషనల్ సాంగ్ రెడీ చేసిన థమన్..?

పవన్ కళ్యాణ్ నటిస్తున్న లేటెస్ట్ మూవీ 'వకీల్ సాబ్'. శ్రీరామ్ వేణు దర్శకత్వం వహిస్తున్న ఈ చిత్రాన్ని దిల్ రాజు - బోనీ కపూర్ కలిసి నిర్మిస్తున్నారు. ఏప్రిల్ 9న ఈ చిత్రాన్ని ప్రేక్షకుల ముందుకు తీసుకురానున్నారు. ఈ నేపథ్యంలో ఇప్పటికే విడుదలైన టీజర్ - ట్రైలర్ మంచి రెస్పాన్స్ తెచ్చుకున్నాయి. అలానే 'మగువా మగువా' 'సత్యమేవ జయతే' 'కనుపాపా' పాటలు కూడా శ్రోతలను విశేషంగా ఆకట్టుకున్నాయి. మ్యూజిక్ డైరెక్టర్ థమన్ సాంగ్స్ తో పాటుగా బ్యాగ్రౌండ్ స్కోర్ పై ప్రత్యేక దృష్టి పెట్టినట్లు తెలుస్తోంది. అలానే ఈ సినిమా పబ్లిసిటీలో భాగంగా ఓ ప్రమోషనల్ సాంగ్ ని థమన్ రెడీ చేశారట. అయితే ఇంతవరకు ఈ పాటను వదలలేదు.

ఈ నేపథ్యంలో 'వకీల్ సాబ్' ప్రీ రిలీజ్ ఈవెంట్ లో ఈ స్పెషల్ సాంగ్ ని రిలీజ్ చేసే అవకాశాలు ఉన్నాయని టాక్ నడుస్తోంది. ఏప్రిల్ 3న తలపెట్టిన ఈ మూవీ ప్రీ రిలీజ్ ఈవెంట్ కి అనుమతి లేకపోవడంతో చిత్ర యూనిట్ తో ఏప్రిల్ 4న ఈ కార్యక్రమాన్ని నిర్వహించాలని ప్లాన్ చేస్తున్నారట. ఈ సంద‌ర్భంగా 'వకీల్ సాబ్' ప్రమోషనల్ సాంగ్ విడుద‌ల చేసే అవ‌కాశం ఉంది. థమన్ స్పెషల్ కేర్ తీసుకొని కంపోజ్ చేసిన ఈ పాట‌ ప్రత్యేక ఆక‌ర్ష‌ణ‌గా నిలుస్తుంద‌ని అంటున్నారు. ఈ పాట సినిమాలో ఉండకపోయినా శుభం కార్డ్ పడే సమయంలో వచ్చే ఛాన్స్ ఉంది. థమన్ ఇవ్వబోయే స్పెషల్ సర్ప్రైజ్ ఎలా ఉంటుందో మరో నాలుగు రోజుల్లో తెలిసిపోనుంది.