'నీపై విసిరే రాళ్ళను మైలురాళ్ళుగా మార్చుకో' తాప్సీ ఇన్స్టా పోస్ట్ వైరల్..!

సొట్టబుగ్గల సుందరి తాప్సీ తెలుగులో సినిమాలు తగ్గించినప్పటికీ.. బాలీవుడ్ లో మాత్రం తన సత్తా చాటుతోంది. ప్రస్తుతం నాలుగు చిత్రాలతో ఫుల్ బిజీగా ఉంది. తాప్సీ ప్రధాన పాత్రలో 'హసీన్ దిల్ రుబా' 'రశ్మీ రాకెట్' 'లూప్ లపేటా' 'శభాష్ మిథూ' వంటి సినిమాలు వస్తున్నాయి. అయితే ఇవన్నీ కూడా కంటెంట్ ఆధారంగా తెరకెక్కుతున్న సినిమాలే కావాడం గమనార్హం. ''శభాష్ మిథూ'' సినిమా ప్రముఖ భారతీయ మహిళా క్రికెటర్ మిథాలీ రాజ్ జీవిత కథ ఆధారంగా రూపొందుతున్న సంగతి తెలిసిందే. ఇందులో తాప్సీ టైటిల్ రోల్ ప్లే చేస్తోంది. ప్రస్తుతం ఈ సినిమా షూటింగ్ లో పాల్గొంటున్న తాప్సీ తాజాగా ఇన్స్టాగ్రామ్ లో ఓ పోస్ట్ పెట్టింది.

క్రికెట్ బ్యాట్ పట్టుకొని ప్రాక్టీస్ లో మునిగిపోయిన ఓ ఫోటో పోస్ట్ చేసిన తాప్సీ.. ''నీపై విసిరే రాళ్ళను నువ్వు మైలురాళ్ళుగా మార్చుకో" అంటూ క్రికెటర్ సచిన్ టెండూల్కర్ చెప్పిన ఓ కొటేషన్ జతచేసింది. అయితే తాప్సీ ఈ పోస్ట్ మిథాలీ రాజ్ బియోపిక్ 'శభాష్ మిథూ' గురించి పెట్టిందా లేదా ఈ మధ్య ఆమెపై ఇన్కమ్ ట్యాక్స్ రైడ్స్ జరగడం.. నటి కంగనా రనౌత్ లాంటి వారు ఆమెపై కామెంట్స్ చేయడం వంటి వాటిని ఉద్దేశిస్తూ పెట్టిందా అని నెటిజన్స్ చర్చించుకుంటున్నారు. కాగా, 'శభాష్ మిథూ' సినిమా కోసం తాప్సీ తీవ్రంగా శ్రమిస్తోంది. క్రికెటర్ గా కనిపించడానికి సినిమా సెట్స్ మీదకు వెళ్లక ముందు నుంచే సీరియస్ గా క్రికెట్ ప్రాక్టీస్ చేసింది. దీని కోసం మిథాలీ రాజ్ స్నేహితురాలు నూషిన్ అల్ ఖాదర్ శిక్షణలో బ్యాటింగ్, బౌలింగ్ నేర్చుకుంది. ఇంత కష్టపడుతున్న తాప్సీ సిల్వర్ స్క్రీన్ మిథాలీ రాజ్ గా ఏ మేరకు మెప్పిస్తుందో చూడాలి.