మొక్కు తీర్చేసుకుంటున్న ఉపాసన

కోరుకున్నది జరిగితే.. ఈ చెంతకు నడిచొస్తా స్వామీ అంటూ ఆ ఏఢు కొండలవాడికి మొక్కుకోవడం కామన్. ఇందులో పేద గొప్ప.. పెద్ద చిన్న లాంటి తారతమ్యాలు ఏమీ ఉండవు. చాలా కాలం నుంచి రామ్ చరణ్ తన స్థాయికి తగ్గ విజయాన్ని సాధించడం లేదనే వెలితి అభిమానులకు ప్లస్ జనాలకు ఉంది. ఇప్పుడు రంగస్థలంతో ఆ లోటు తీరిపోయింది.

ఇదే ఫీలింగ్ చెర్రీ వైఫ్ ఉపాసనకు కూడా ఉండడంలో ఆశ్చర్యమేమీ లేదు. మరి ముందుగా మొక్కుకుందో.. లేకపోతే సక్సెస్ సాధించిన తర్వాత అనుకుందో చెప్పలేం కానీ.. ఉపాసన మాత్రం ఇప్పుడు తిరుమల వెంకటేశునికి మొక్కు తీర్చుకుంటోంది. ఏడు కొండలు ఎక్కి మరీ వెంకటేశుని దర్శనానికి వెళ్లింది. ఈ విషయాన్ని తనే ట్విట్టర్ ద్వారా వెల్లడించింది ఉపాసన. తిరుమల మెట్లను ఓ ఫోటో తీసి పోస్ట్ చేసిన ఉపాసన.. రామ్ చరణ్.. రంగస్థలం అంటూ హ్యాష్ ట్యాగ్ పెట్టడం ద్వారా.. తన భర్త సాధించిన అద్భుత విజయం కోసమే ఈ ఏడు కొండలు ఎక్కే ప్రోగ్రామ్ ను పెట్టుకున్నట్లు నేరుగానే చెప్పింది ఉపాసన.

ఇక రంగస్థలం మూవీ సక్సెస్ ను ఫ్యామిలీ పార్టీల రూపంలో ఇప్పటికే సెలబ్రేట్ చేసేసుకున్న చెర్రీ.. ఇప్పుడు ఫ్యాన్స్ తో కలిపి కూడా పండుగ చేసుకోనున్నాడు. ఇవాళ సాయంత్రం హైద్రాబాద్ లో సక్సెస్ మీట్ జరగనుండగా.. దీనికి పవన్ కళ్యాణ్ ముఖ్య అతిథిగా అటెండ్ కానున్నాడు. ఇప్పటికే శ్రీవారి దర్శనం పూర్తి చేసుకున్న ఉపాసన.. ఈ కార్యక్రమంలో కూడా పాల్గొనే అవకాశాలు పుష్కలంగా ఉన్నాయి.