మూడో సినిమా పనుల్లో బిజీగా ఉన్న విజయ్ దేవరకొండ..?

సెన్సేషనల్ స్టార్ విజయ్ దేవరకొండ ఓ వైపు హీరోగా ప్రేక్షకులను ఆకట్టుకుంటూనే.. మరోవైపు నిర్మాతగా మారి సినిమాలు రూపొందిస్తున్నాడు. న్యూ టాలెంట్ ని ఎంకరేజ్ చేస్తూ, చిన్న మీడియం బడ్జెట్ లో సినిమాలు తీయాలనే ఆలోచనతో  'కింగ్ ఆఫ్ ది హిల్' అనే నిర్మాణ సంస్థను ఏర్పాటు చేశాడు. విజయ్ తండ్రి గోవర్ధన్ రావు దేవరకొండ దీని వ్యవహరాలు చూసుకుంటున్నారు. అయితే ఈ బ్యానర్ లో డైరెక్టర్ తరుణ్ భాస్కర్ ని హీరోగా పరిచయం చేస్తూ చేసిన 'మీకు మాత్రమే చెప్తా' సినిమా ఆశించిన స్థాయిలో సక్సెస్ కాలేకపోయింది.

ఈ క్రమంలో విజయ్ తన బ్యానర్ లో రెండో చిత్రంగా తమ్ముడు ఆనంద్ దేవరకొండ హీరోగా 'పుష్పక విమానం' అనే కామెడీ ఎంటర్టైనర్ ని నిర్మిస్తున్నాడు. కొత్త దర్శకుడు దామోదర తెరకెక్కిస్తున్న ఈ చిత్రంలో టాంగా ప్రొడక్షన్స్ వారు కూడా నిర్మాణ భాగస్వాములుగా ఉన్నారు. ఇప్పటికే పోస్ట్ ప్రొడక్షన్ కార్యక్రమాలు పూర్తి చేసుకున్న ఈ చిత్రాన్ని త్వరలోనే ప్రేక్షకుల ముందుకు తీసుకురానున్నారు. అయితే తాజాగా సినీ వర్గాల్లో వినిపిస్తున్న టాక్ ప్రకారం విజయ్ దేవరకొండ ఇప్పుడు తన బ్యానర్ లో మూడో సినిమా పనుల్లో బిజీగా ఉన్నాడని తెలుస్తోంది.

పృథ్వీ సేనారెడ్డి అనే కొత్త దర్శకుడిని ఇండస్ట్రీకి పరిచయం చేస్తూ, విజయ్ ఓ సినిమా చేయడానికి సన్నాహాలు చేసుకుంటున్నారని టాక్ వినిపిస్తోంది. ఈ సినిమాతో కొందరు నూతన నటీనటులను ఇంట్రడ్యూస్ చేయాలని చూస్తున్నారట. కరోనా పరిస్థితులు చక్కబడిన తర్వాత ఈ ప్రాజెక్ట్ గురించి అధికారికంగా ప్రకటించే అవకాశం ఉందని అంటున్నారు. ఇకపోతే విజయ్ దేవరకొండ ప్రస్తుతం 'లైగర్' అనే సినిమాలో నటిస్తున్నాడు. పాన్ ఇండియా స్థాయిలో రూపొందుతున్న ఈ చిత్రానికి పూరీ జగన్నాథ్ దర్శకత్వం వహిస్తున్నారు.