సౌత్ హీరో బాలీవుడ్ డ్రీమ్ ప్రాజెక్ట్ ఆగిపోయిందా?

తమిళ హీరో సూర్య 'కంగువ' సినిమాతో ఖంగు తిన్నారు. భారీ అంచనాలతో ఈ మధ్యనే థియేటర్లలోకి వచ్చిన ఈ మోస్ట్ అవైటెడ్ మూవీ.. బాక్సాఫీస్ వద్ద తీవ్ర నిరాశ పరిచింది. కోలీవుడ్ కి ఫస్ట్ 1000 కోట్ల క్లబ్ సినిమా అవుతుంది అనుకుంటే.. ఫస్ట్ వీకెండ్ లోనే చేతులెత్తేసింది. రెండో వారంలో ఆక్యుపెన్సీ మరీ దారుణంగా ఉంది. ఇప్పటికే ఈ సినిమా అనుకున్న విధంగా ఆడలేదని ఫ్యాన్స్ డిజప్పాయింట్ అవుతుంటే, ఇప్పుడు సూర్య బాలీవుడ్ డ్రీమ్ ప్రాజెక్ట్ చుట్టూ వినిపిస్తున్న పుకార్లు వారిని మరింత కలవరపెడుతున్నాయి.

సూర్య బాలీవుడ్ లో ఎంట్రీ ఇవ్వడానికి చాలా కాలంగా ట్రై చేస్తున్నారు. భార్య జ్యోతిక, పిల్లలతో కలిసి ముంబైకి మకాం మార్చిన తర్వాత, హిందీ ప్రాజెక్ట్ కోసం డిస్కషన్లు మొదలయ్యాయి. ఇందులో భాగంగా ప్రముఖ దర్శకుడు రాకేష్ ఓంప్రకాష్ మెహ్రాతో "కర్ణ" అనే పౌరాణిక సినిమా చెయ్యాలని ప్లాన్ చేసారు. ఏడాదికి పైగానే ఈ సినిమా ప్రీ ప్రొడక్షన్‌ పనులు జరుగుతున్నాయి. ఆల్రెడీ స్క్రిప్ట్ వర్క్ కూడా పూర్తి చేశారని, ఎక్సెల్ ఎంటర్‌టైన్‌మెంట్ ఈ భారీ బడ్జెట్ చిత్రాన్ని నిర్మిస్తుందని వార్తలు వచ్చాయి. అయితే ఈ ప్రాజెక్ట్ ఆగిపోయిందని రూమర్లు చక్కర్లు కొడుతున్నాయి.

సూర్య టైటిల్ రోల్ పోషించే కర్ణ మూవీలో, ద్రౌపది పాత్ర కోసం జాన్వీ కపూర్ తో చర్చలు జరిపారని తెలుస్తోంది. ఈ భారీ చిత్రాన్ని ఐదేళ్ల వ్యవధిలో రెండు భాగాలుగా తీయాలని మేకర్స్ ముందుగా అనుకున్నారట. వచ్చే ఏడాది సెట్స్ మీదకు తీసుకెళ్ళాలని షెడ్యూల్స్ కూడా ప్లాన్ చేశారట. అయితే భారీ బడ్జెట్‌ కారణంగా నిర్మాతలు ఇప్పుడు వెనుకాడుతున్నారని నివేదికలు చెబుతున్నాయి. బడ్జెట్ పరిమితుల గురించి దర్శక నిర్మాతల మధ్య అనేక సమావేశాలు జరిగినప్పటికీ, ప్రయత్నాలు ఫలించలేదట. బడ్జెట్ వర్కవుట్ అవ్వదని భావించి నిర్మాతలు ఈ ప్రాజెక్ట్ నుండి వైదొలగాలని నిర్ణయించుకున్నారని బీటౌన్ లో వార్తలు వినిపిస్తున్నాయి.

'కంగువ' సినిమాపై సూర్య బోలెడన్ని ఆశలు పెట్టుకున్నారు. నార్త్ ఇండియన్ రీజియన్‌లో గట్టిగా ప్రమోట్ చేశారు. ప్రమోషనల్ కంటెంట్ కూడా ఆకట్టుకోవడంతో ఈసారి తమిళ సినిమా 1000 కోట్ల మార్క్ టచ్ చేస్తుందని అందరూ అనుకున్నారు. సూర్య బాలీవుడ్ డెబ్యూ కంటే ముందే, హిందీ మార్కెట్ లో మంచి ప్రదర్శన కనబరుస్తున్నాడని భావించారు. కానీ ఈ చిత్రం అన్ని భాషలతో పాటుగా హిందీలోనూ తిరస్కరించబడింది. ఇప్పుడు స్ట్రెయిట్ గా హిందీలో చేయాలనుకున్న 'కర్ణ' మూవీ కూడా ఆగిపోయిందని అంటున్నారు. ఇదే నిజమైతే సూర్య బాలీవుడ్ ఎంట్రీ మరింత ఆలస్యమయ్యే అవకాశం ఉంది.

ఇదిలా ఉంటే, సూర్య ప్రస్తుతం కార్తీక్ సుబ్బరాజు దర్శకత్వంలో తన 44వ సినిమా చేస్తున్నారు. ఇందులో పూజా హెగ్డే హీరోయిన్ గా నటిస్తోంది. ఈ సినిమాని వచ్చే ఏడాది రిలీజ్ చేస్తారు. ఇక ఆర్జే బాలాజీ దర్శకత్వంలో సూర్య ఇటీవలే ఓ సినిమాని అనౌన్స్ చేశారు. ఇది భక్తిరసంతో కూడిన డివోషనల్ ఫాంటసీ ఎంటర్‌టైనర్ అనే టాక్. త్వరలోనే ఈ సినిమా షూటింగ్ ప్రారంభం కానుంది. 'కంగువ' కి సీక్వెల్ కూడా ఉంటుందని మేకర్స్ ప్రకటించారు. మరి ఫస్ట్ పార్ట్ రిజల్ట్ చూసిన తర్వాత కూడా, నిర్మాతలు పార్ట్-2కి కట్టుబటి ఉంటారో లేదో చూడాలి.