విజయ్‌ దేవరకొండ ఊహించింది నిజమే

'పెళ్లి చూపులు' చిత్రంతో దర్శకుడిగా విమర్శకుల ప్రశంసలు దక్కించుకున్న తరుణ్‌ భాస్కర్‌ రెండవ సినిమా 'ఈ నగరానికి ఏమైంది' అనే చిత్రం ఆకట్టుకోలేక పోయింది. అయినా కూడా తరుణ్‌ భాస్కర్‌ ను దర్శకుడిగా తక్కువ అంచనా వేయలేం. కాన్సెప్ట్‌ ఓరియంటెడ్‌ చిత్రాలను చక్కగా తెరకెక్కించగల సత్తా ఆయనకు ఉంది. తరుణ్‌ భాస్కర్‌ ప్రస్తుతం దర్శకుడిగా తన మూడవ సినిమా స్క్రిప్ట్‌ వర్క్‌ చేస్తున్నాడు. త్వరలోనే ఆ సినిమా పట్టాలెక్కబోతుంది.

ఈ గ్యాప్‌ లోనే విజయ్‌ దేవరకొండ నిర్మాణంలో తరుణ్‌ భాస్కర్‌ హీరోగా ఒక చిత్రం రాబోతుందనే విషయం తెల్సిందే. తరుణ్‌ భాస్కర్‌ లో మంచి నటుడు ఉన్నాడు అన్నది విజయ్‌ దేవరకొండ గట్టి నమ్మకం. అందుకే ఆ దర్శకుడిని హీరోగా మార్చాలనే ప్రయత్నం చేస్తున్నాడు. ప్రస్తుతం స్క్రిప్ట్‌ వర్క్‌ జరుగుతున్న ఆ మూవీ త్వరలోనే పట్టాలెక్కబోతుంది. అంతకు ముందే తరుణ్‌ భాస్కర్‌ నటుడిగా నిరూపించుకున్నాడు. విజయ్‌ దేవరకొండ తనపై పెట్టుకున్న నమ్మకం నిజమే అంటూ తరుణ్‌ చెప్పకనే చెప్పాడు.

'మహానటి' చిత్రంలో చిన్న పాత్రను పోషించి అలరించిన తరుణ్‌ భాస్కర్‌ తాజాగా ఫలక్‌ నుమా దాస్‌ చిత్రంలో పోలీస్‌ గా కనిపించి మెప్పించాడు. ఎస్సై పాత్రలో తరుణ్‌ భాస్కర్‌ తెలంగాణ యాసతో ఆకట్టుకున్నాడు. నటుడిగా మంచి మార్కులు దక్కించుకున్నాడు. తరుణ్‌ భాస్కర్‌ లో మంచి నటుడు ఉన్నాడని విజయ్‌ దేవరకొండ ఊహించినట్లుగానే ఫలక్‌ నుమా దాస్‌ లో ఈ దర్శకుడు మంచి నటనతో అలరించడం ఖాయం అన్నట్లుగా తెలుస్తోంది.

ఇక హీరోగా తరుణ్‌ భాస్కర్‌ సక్సెస్‌ కొట్టేడమే బాకీ ఉంది. నటుడిగా తరుణ్‌ కంటిన్యూ అయ్యే అవకాశాలు కనిపిస్తున్నాయి. దర్శకత్వం మరియు నటనను సమాంతరంగా చేసిన వారు తెలుగు ఇండస్ట్రీలో చాలా మందే ఉన్నారు. వారితో పాటు తరుణ్‌ భాస్కర్‌ కూడా చేరబోతున్నాడన్నమాట.