ప్రియా ప్రియా.. అంటున్న విక్రమ్ కుమార్

సెంటిమెంట్ లేని సినీ ప్రముఖులు చాలా తక్కువ మంది ఉంటారు. మనుషుల విషయంలో.. మనవ సంబంధాల విషయంలో సెంటిమెంట్లు ఉంటాయో లేదో దేవుడెరుగు.. సినిమాల విషయంలో మాత్రం సెంటిమెంట్లు ఉంటాయి. ఒక డైరెక్టర్ ఎక్కువగా ఒక అక్షరంతో సినిమా టైటిల్స్ పెడతారు.. మరో డైరెక్టర్ తలకు బ్యాండ్ కడతారు.. మరో డైరెక్టర్ సినిమా షూట్ మొదలైన రోజునుండి రిలీజ్ అయ్యేవరకూ నో షేవింగ్ అంటారు.. ఒక హీరో మూడక్షరాల టైటిల్స్ పెట్టుకుంటారు. ఇలా ఉంటుంది వరస. కొందరు హీరోలకు సెంటిమెంట్ గా కొన్ని లోకేషన్స్ ఉంటాయి.. అక్కడ ఒక్క సీన్ అయినా అక్కడ తెరకెక్కించాలని పట్టుబడతారు.

ఇలా చెప్పుకుంటూ పోతే చాలానే ఉన్నాయి. టాలెంటెడ్ ఫిలిం మేకర్ గా పేరు తెచ్చుకున్న విక్రమ్ కుమార్ కూడా ఇందుకు మినహాయింపేమీ కాదని రీసెంట్ గా నెటిజన్లు తేల్చారు.  విక్రమ్ తన సినిమాల్లో హీరోయిన్ పేరును దాదాపుగా ప్రియ అనే పెడతాడట. ఈ సెంటిమెంట్ విక్రమ్ కు '13B' సినిమా నుండి మొదలైందట. 'ఇష్క్'..'మనం'.. '24'.. 'హలో' సినిమాలలో హీరోయిన్ పేరు అదే.  రేపు రిలీజ్ కానున్న 'గ్యాంగ్  లీడర్' లో కూడా హీరోయిన్ పాత్ర పేరు సేమ్ టు సేమ్.  హీరోయిన్ మారింది కానీ హీరోయిన్ పాత్ర పేరు మారలేదు.  

మరి ఇలా హీరోయిన్ పాత్రకు ప్రియ అనే పేరు పెట్టడం వెనక విక్రమ్ ఆలోచన ఏంటో తెలియదు కానీ నెటిజన్లు మాత్రం విక్రమ్ జీవితంలో మరిచిపోలేని గర్ల్ ఫ్రెండ్ పేరు అయి ఉంటుంది అంటూ చిలిపి కామెంట్లు చేస్తున్నారు.  అయితే విక్రమ్ సన్నిహితులు మాత్రం అలాంటిదేమీ లేదని.. విక్రమ్ కెరీర్ లో ఫస్ట్ హిట్ '13B' అందుకే అప్పటి నుంచి హీరోయిన్ పేరు రిపీట్ చేస్తున్నడని అంటున్నారు. లాజిక్ భలే ఉంది కానీ హీరో పాత్ర పేరు ఎందుకు రిపీట్ చేయడం లేదు చెప్మా?