విశాల్-తమన్నా వెరైటీగున్నారు..

ప్రతి ఏడాదీ కనీసం రెండు రిలీజులుండేలా చూసుకుంటాడు తమిళ యాక్షన్ హీరో విశాల్. ఈ ఏడాది ఇప్పటికే అతడి సినిమాలు రెండు రిలీజయ్యాయి. ‘రాయుడు’ రిలీజై రెండు నెలలే అవుతుండగా ఇంకో రెండు నెలల్లోపే మరో సినిమాతో ప్రేక్షకుల ముందుకు వచ్చేస్తున్నాడు. అతడి కొత్త సినిమా ‘కత్తి సెండై’ దసరా కానుకగా విడుదలవుతోంది. ఈ చిత్రంలో విశాల్ సరసన మిల్కీ బ్యూటీ తమన్నా కథానాయికగా నటిస్తుండటం విశేషం. నల్లనయ్య సరసన తెల్లటి తమన్నా ఎలా ఉంటుందో అని చాలామంది సందేహించారు కానీ.. ఈ సినిమా ఫస్ట్ లుక్ పోస్టర్లు చూస్తుంటే అలాంటి ఇబ్బందేమీ ఉండదని అర్థమవుతోంది.

సినిమాలో ఓ పాట చిత్రీకరణ సందర్భంగా తీసిన ఫొటోల నుంచి ఫస్ట్ లుక్ పోస్టర్లు కట్ చేశారు. అందులో విశాల్..తమన్నా ఇద్దరూ భలే వెరైటీగా కనిపిస్తున్నారు. విశాల్ 80ల్లో హీరోలాగా వెరైటీగా తయారయ్యాడు. తమన్నా కూడా ‘కెమెరామన్ గంగతో రాంబాబు’లో ఓ పాటలో కనిపించినట్లు క్లాసికల్ డ్యాన్సర్ లా తయారైంది. ప్రస్తుతం తమిళ చిత్ర పరిశ్రమను ఏలుతున్న కమెడియన్ సూరి ఇందులో ఆడ గెటప్ వేశాడు. కత్తి సెండై అంటే.. కత్తి యుద్ధం అని అర్థం. ఆ పేరు చూస్తే ఇదేదో వయొలెంట్ సినిమా అనుకుంటాం కానీ.. పోస్టర్లు మాత్రం ఫన్నీగా అనిపిస్తున్నాయి. సూరజ్ దర్శకత్వం వహిస్తున్న ఈ చిత్రాన్ని తెలుగులోకి ‘ఒకడొచ్చాడు’ పేరుతో అనువదిస్తున్నారు. విశాల్ గత సినిమాల్లాగా కాకుండా దీన్ని తమిళంతో తెలుగులోనూ ఒకేసారి రిలీజ్ చేయాలని భావిస్తున్నారు.