నిజంగా విలన్లు అయిపోతున్న విలన్స్

ఏమైనా పెద్ద సినిమాలు తీసేటప్పుడు డైరెక్టర్లు కథ మాత్రమే కాకుండా అందులో ఉండే క్యారెక్టర్ల గురించి కూడా కొంత ప్రైవసీ ఉంచడానికి ట్రై చేస్తూ ఉంటారు. కానీ సినిమా చిన్నదైనా పెద్దదైనా దానికోసం శ్రమించేవారు కూడా పెద్ద సంఖ్యలోనే ఉంటారు. మరి అంత మందిలో ఒక్కరైనా ఉంటారుగా ఎదో ఒకటి బయటకు చెప్పేస్తూ ఉండటానికి. ఇక్కడ కొన్ని సినిమాలకు విలన్ లే అలా లీక్ చేస్తూ ఉంటారు.

మొన్నటికి మొన్న ప్రభాస్ నటిస్తున్న యాక్షన్ థ్రిల్లర్ సాహో లో విలన్ పాత్ర పోషిస్తున్న నీల్ నితిన్ ముఖేష్ సెట్స్ గురించి ఇక్కడ సినిమా చిత్రీకరిస్తున్నారు అని - ప్రస్తుతం ఏం సీన్స్ షూటింగ్ సాగుతుంది అని అప్డేట్ లు ఇచ్చేసాడు. అతను పెట్టిన ఫోటో వాటి బాక్ గ్రౌండ్ చూస్తే అర్థమైపోతుంది అక్కడ ఫైట్ సీన్స్ చిత్రీకరణ జరుగుతోంది అని. ఇప్పుడు ఏమో వివేక్ ఒబేరాయ్ కూడా ఇలానే చేసేస్తున్నాడు. ఇప్పటికే రక్త చరిత్ర తో తెలుగు వాళ్లందరికీ కూడా బాగా పరిచయమైన ఈ బాలీవుడ్ నటుడు ఇప్పుడు రామ్ చరణ్-బోయపాటి సినిమా లో విలన్ గా చేయనున్నాడు. ఇందులో హీరో ఎంట్రీ లాగానే విలన్ వివేక్ ఎంట్రీ కూడా చాలా అద్భుతంగా ఉంటుందని సమాచారం. ఈ సినిమాలో తాను ఒక జాలి దయ లేని ఒక క్రూరుడిగా మనకు కనిపించబోతున్నానని చెప్పుకొస్తున్నాడు వివేక్.

అటు నీల్ ఏమో సాహో గురించి - వివేక్ ఏమో చరణ్ సినిమా గురించి న్యూస్ లీక్ చేసేస్తుంటే పాపం డైరెక్టర్లు మాత్రం వీళ్ళ దగ్గర ఏది ఆగదే అంటూ తలలు పట్టుకుంటున్నారు. మొత్తానికి వీళ్ళు సినిమాలో నే కాకుండా బయట కూడా చిన్న సైజ్ విలన్ల లాగా మారుతున్నట్టు లేదూ?