బాహుబలిని చూసి గర్విస్తున్నా-అమీర్ ఖాన్

కాస్త ఆలస్యమైనప్పటికీ.. బాలీవుడ్ సూపర్ స్టార్లు ఒక్కొక్కరుగా ‘బాహుబలి: ది కంక్లూజన్’ అద్బుత విజయం గురించి స్పందిస్తున్నారు. ఆల్రెడీ అక్షయ్ కుమార్ ఈ సినిమా చూసి.. ప్రశంసలు కురిపించిన సంగతి తెలిసిందే. మరోవైపు కింగ్ ఖాన్ షారుఖ్ సైతం ‘బాహుబలి’ టీంను కొనియాడాడు. తాజాగా ఈ జాబితాలోకి మిస్టర్ పర్ఫెక్షనిస్ట్ అమీర్ ఖాన్ కూడా చేరాడు. సచిన్ టెండూల్కర్ జీవిత కథతో తెరకెక్కిన ‘సచిన్: ఎ బిలియన్ డ్రీమ్స్’ సినిమా ప్రిమియర్ షో సందర్భంగా అమీర్.. ‘బాహుబలి-2’ గురించి మాట్లాడాడు. ఆ సినిమాను.. తాను హీరోగా నటించిన ‘దంగల్’ను పోల్చడం సరికాదన్న అమీర్ ఖాన్.. బాహుబలి-2 సాధించిన విజయాన్ని చూసి తాను గర్విస్తున్నట్లుగా చెప్పడం విశేషం. అలాగే దంగల్ సినిమా చైనాలో అసాధారణ వసూళ్లు రాబడుతుండటంపై అమీర్ ఖాన్ సంతోషం వ్యక్తం చేశాడు.

‘‘దంగల్ సినిమాకు చైనాతో పాటు ప్రపంచవ్యాప్తంగా ఆదరణ దక్కుతుండటంపై నాకు చాలా ఆనందంగా ఉంది. ఐతే ఏ రెండు సినిమాల్ని పోల్చి చూడటం సరి కాదు. బాహుబలి-2 కూడా గొప్ప సక్సెస్ అయింది. ఆ సినిమాను నేను ఇంకా చూడలేదు. కానీ దాని గురించి నా సన్నిహితుల నుంచి చాలా మంచి విషయాలు విన్నాను. రాజమౌళితో పాటు మొత్తం ఆ చిత్ర బృందాన్ని అభినందిస్తున్నా. దంగల్.. బాహుబలి-2 దేని స్థాయిలో అది గొప్పవి. అన్నిటికీ మించి రెండు భారతీయ సినిమాలు ప్రపంచ వ్యాప్తంగా గొప్ప పేరు సంపాదించడం.. ఆదరణ పొందుతుండటం మంచి విషయం. నేను నా సినిమాతో పాటు ‘బాహుబలి’ని చూసి కూడా గర్విస్తున్నా’’ అని అమీర్ అన్నాడు. బాహుబలి-2 ప్రపంచవ్యాప్తంగా రూ.1500 కోట్ల వసూళ్ల మైలురాయిని అందుకోగా.. చైనాలో సాధించిన వసూళ్లతో ‘దంగల్’ సైతం ఆ మార్కును టచ్ చేసిన సంగతి తెలిసిందే.

Like Us on Facebook : https://www.facebook.com/Tupakidotcom/