రామ్ ఆ రీమేకే చేస్తాడా ?

ఇస్మార్ట్ శంకర్ తర్వాత హీరో రామ్ ఇమేజ్ లెక్కలు మారిపోయాయి. తనకు ఊర మాస్ అవతారం సెట్ అవుతుందని పూరి రుజువు చేయడంతో అలాంటి పాత్రలతో వస్తున్న దర్శకుల క్యూని చూసి రామ్ ఆశ్చర్యపోతున్నాడట. నిజానికి దీని సక్సెస్ మీద యూనిట్ ముందు నుంచి కాన్ఫిడెంట్ గా ఉన్నప్పటికీ ఈ స్థాయి రెస్పాన్స్ ఊహించలేదన్నది వాస్తవం. సీక్వెల్ గా డబుల్ ఇస్మార్ట్ అని పూరి ప్రకటించాడు కానీ దానికి చాలానే టైం పట్టేలా ఉంది.

దీని కన్నా ముందే తిరుమల కిషోర్ దర్శకత్వంలో రామ్ స్రవంతి బ్యానర్ లోనే ఓ ప్రాజెక్ట్ కమిట్ అయ్యాడు. ఇన్ సైడ్ సోర్సెస్ నుంచి వచ్చిన టాక్ ప్రకారం ఇది తమిళ్ హిట్ మూవీ తడంకు రీమేక్ గా ఉంటుందని ఇంతకు ముందు లీక్ వచ్చింది. అరుణ్ విజయ్ హీరోగా డ్యూయల్ రోల్ చేసిన ఈ మూవీ అక్కడ మంచి సక్సెస్ అందుకోవడమే కాక అతని మార్కెట్ కి బాగా హెల్ప్ అయ్యింది.

అన్నదమ్ముల మధ్య క్రైమ్ డ్రామాని నడిపిన తీరుకు ప్రేక్షకులు ఫుల్ గా పాస్ మార్కులు వేశారు. ఇది తనకు సూట్ అవుతుందని భావించి రామ్ పెదనాన్న రవి కిషోర్ కలిసి నిర్ణయం తీసుకుని హక్కులు తీసుకున్నట్టు చెప్పారు. అయితే ఇది కార్యరూపం దాలుస్తుందా అనే అనుమానాలు ఇప్పుడు వస్తున్నాయి.

తడం ఒకరకంగా ఎక్స్ పరిమెంటల్ థ్రిల్లర్. ఒక పాత్రకు కొంచెం నెగటివ్ షేడ్స్ కూడా ఉంటాయి. రామ్ కు కొత్తగా వచ్చిన ఇమేజ్ కి ఇలాంటి కథ సెట్ అవుతుందా అనే చర్చలు ప్రస్తుతం జరుగుతున్నాయట. బయటికి మాత్రం నేను శైలజా లాంటి క్యూట్ లవ్ స్టోరీతో వస్తామని చెబుతున్నారు కానీ వాస్తవానికి తడం చేయాలా వద్దా అనే సంగతి తేలాకే ఫైనల్ డెసిషన్ తీసుకోబోతున్నట్టు తెలిసింది.