రజినీతో సినిమా.. మినిమం 300 కోట్లు

సూపర్ స్టార్ రజినీకాంత్ తో సినిమా అంటే మినిమం మూడొందల కోట్ల బడ్జెట్ ఉండాల్సిందే అంటున్నాడు బాలీవుడ్ స్టార్ డైరెక్టర్ సాజిద్ ఖాన్. రజినీకాంత్ ఇమేజ్ ప్రకారం చూస్తే ఆయన్ని మామూలుగా చూడ్డానికి జనాలు ఒప్పుకోరని.. కాబట్టి భారీ బడ్జెట్ తోనే సినిమా తెరకెక్కించాలని అంటున్నాడు ‘హౌస్ ఫుల్’ సిరీస్ డైరెక్టర్. తాను రజినీకాంత్ కు బిగ్గెస్ట్ ఫ్యాన్ అని.. తన లాంటి వీరాభిమానుల అంచనాలకు తగ్గట్లే రజినీ ప్రతి సినిమా భారీగా ఉండి తీరాల్సిందేనని అంటున్నాడు సాజిద్. ఐతే ఎంత బడ్జెట్ పెట్టినా దాన్ని తన సమ్మోహన శక్తితో తిరిగి రాబట్టగలిగే సత్తా రజినీకి ఉందని సాజిద్ చెప్పాడు.

‘‘రజినీ కాంత్ ఇమేజ్ కు తగ్గ సినిమా చేయటం మామూలు విషయం కాదు. రోబో, శివాజీ లాంటి సినిమాలతో రజినీ కాంత్ ను అద్భుతంగా చూపించిన శంకర్ కు హాట్సాఫ్. రజినీ ఇమేజ్ ను ఆకాశమంత ఎత్తుకు చేర్చాడు శంకర్. కోట్లాది మంది అభిమానులున్న రజినీ హీరోగా సినిమా తెరకెక్కించాలంటే చాలా జాగ్రత్తలు తీసుకోవాలి. సినిమా కంటే నటుడు గొప్పగా అనిపించటం చాలా అరుదుగా కనిపిస్తుంది. అలాంటి నటుడే రజినీ. సినిమా చూడటం కన్నా, రజినీ కాంత్ ను చూడటానికే ఎక్కువ మంది థియేటర్లకు వస్తారు. వాళ్లందరి అంచనాలకు తగ్గట్లు సినిమా తెరకెక్కించాల్సి ఉంటుంది’’  అంటూ సూపర్ స్టార్ పై ప్రశంసలు కురిపించాడు సాజిద్. రజినీ-శంకర్ కాంబినేషన్లో తెరకెక్కుతున్న ‘రోబో-2’ సాజిద్ అంచనాలకు తగ్గట్లే రూ.300 కోట్ల బడ్జెట్ తో తెరకెక్కుతుండటం విశేషం.