హీరోయిన్ తో.. సాంగ్స్ తో పనిలేదు

తమిళ హీరో కార్తి నటిస్తున్న చిత్రం 'ఖైది'.  లోకేష్ కనగరాజ్ దర్శకత్వంలో తెరకెక్కిన ఈ సినిమాను డ్రీమ్ వారియర్ పిక్చర్స్ బ్యానర్ పై ఎస్ఆర్ ప్రభు నిర్మిస్తున్నారు.  'ఖైది' ఈ శుక్రవారం నాడు ప్రేక్షకుల ముందుకు రానుంది.  ఈ సందర్భంగా నిర్మాత ఎస్ఆర్ ప్రభు ఒక ఇంటర్వ్యూలో ఈ సినిమా గురించి ఇంట్రెస్టింగ్ విషయాలు వెల్లడించారు.

ఈ సినిమా కథంతా ఒక్క రాత్రిలోనే జరుగుతుంది అంటున్నారు మరి షూటింగ్ సమయంలో ఏవైనా ఇబ్బందులు ఎదురయ్యాయా? అని ప్రశ్నిస్తే 'ఈ సినిమాలో హీరో జీవిత ఖైది. జైలునుంచి బయటకు వచ్చి ఈ ప్రపంచాన్ని ఆ రోజు రాత్రి ఎదుర్కొన్నాడు అనేది స్టొరీ లైన్. దీంతో షూటింగ్ అంతా రాత్రిపూటే చేయాల్సి వచ్చింది.  సినిమాలో కొన్ని కీలకమైన యాక్షన్ సన్నివేశాలను దట్టమైన అడవిలో చిత్రీకరించాల్సి వచ్చింది.  విపరీతమైన చలితో పాటుగా షూటింగ్ కు అవసరమైన లైట్ ను సెట్ చేయడం మాకు చాలా ఇబ్బందిగా మారింది. అయినా మా టీమ్ ఆలాంటి సమస్యలను అధిగమించి మంచి అవుట్ పుట్ వచ్చేలా శ్రమించారు' అన్నారు.

కార్తి లాంటి హీరోతో పాటలు లేకుండా.. హీరోయిన్ లేకుండా సినిమాను రూపొందించడం రిస్క్ అనిపించలేదా? అని ప్రశ్నిస్తే 'ఇది కమర్షియల్ సినిమా అయినప్పటికీ స్టొరీకి తగ్గట్టే వెళ్ళాలని నిర్ణయించుకున్నాం.  ఖైది కథకు హీరోయిన్ అవసరం లేదు.. ఎందుకంటే ఇది ఒక రాత్రి జరిగే థ్రిల్లర్ స్టొరీ.  ఇలాంటి సినిమాకు హీరో ఇంట్రో.. సాంగ్స్ తో పనిలేదు అందుకే హీరోయిన్.. పాటలను పెట్టలేదు. కథానుసారం వెళ్ళామే తప్ప మేమేదో డిఫరెంట్ గా ప్లాన్ చేయలేదు' అన్నారు