నా కొడుకు `యానిమ‌ల్` అవ్వ‌డం ఇష్టం లేదు!

సందీప్ రెడ్డి వంగా తాజా చిత్రం `యానిమల్` టాక్ ఆఫ్ ది టౌన్ గా మారింది. సినిమా విడుద‌లై చాలా కాల‌మే అయినా ఇంకా దీనిపై చ‌ర్చ సాగుతోంది. సోష‌ల్ మీడియాలు స‌హా వీలున్న ప్ర‌తి వేదిక‌పైనా యానిమ‌ల్ గురించిన చ‌ర్చ నిరంత‌రాయంగా కొన‌సాగుతోంది. రణబీర్ కపూర్ న‌టించిన యానిమ‌ల్ గురించి ప్రతి ప్రేక్షకుడికి భిన్నమైన అభిప్రాయం ఉంది. కొందరికి ఈ చిత్రం మితిమీరిన స్త్రీద్వేషం హింసాత్మకంగా అనిపిస్తే, కొందరికి ఇది పూర్తి వినోదాత్మకంగా క‌నిపించింది. ఇటీవల బాలీవుడ్ ప్రతిభావ‌ని భూమి పెడ్నేకర్ ఈ చిత్రాన్ని వీక్షించారు. దానిపై తన అభిప్రాయాన్ని షేర్ చేసారు. తాను హైపర్ మేల్ మూవీస్ కు అభిమాని కానప్పటికీ ప్రతి ఫిలింమేక‌ర్‌కి `భావ వ్యక్తీకరణ స్వేచ్ఛ ఉండాలి` అని వ్యాఖ్యానించింది.

యానిమల్‌పై డిబేట్‌లో పాల్గొన్న భూమి మాట్లాడుతూ.. ఒక సినిమా దర్శకుడు తమ సినిమా ద్వారా ఏం చెప్పాలనుకున్నారో అది చెబుతార‌ని, దాని నుండి ఏమి తీసుకుంటారనేది ప్రేక్షకులపై ఆధార‌ప‌డి ఉంటుంద‌ని అన్నారు. తాజా ఇంటర్వ్యూలో ఈ చిత్రంపై తన అభిప్రాయం గురించి భూమి చెప్పింది, ``ప్రేక్షకుడిగా నా జానర్ హైపర్ మ్యాస్క్యులిన్ సినిమాలు కాదు. వాటిని చూస్తున్నప్పుడు నాకు బోర్ కొడుతుంది. నా శైలి రోమ్-కామ్ & శృంగారం.. నేను ఈ శైలిని ఆస్వాదిస్తున్నాను. నాకు యాక్షన్ చిత్రాలేమిటో అర్థం కావు... అని వ్యాఖ్యానించింది.

అయితే సందీప్ వంగా విధానాన్ని భూమి త‌ప్పు ప‌ట్ట‌లేదు. త‌న ఆస‌క్తుల‌ను మాత్ర‌మే చెప్ప‌డం గ‌మ‌నార్హం. ``ప్ర‌తి ఫిలింమేక‌ర్ కి స్వీయ వ్యక్తీకరణ హక్కు ఉందని నేను భావిస్తున్నాను. అయితే స్వీయ వ్యక్తీకరణను ప్రేక్షకులు ఎలా గ్రహిస్తారు అనేది గమ్మత్తైనది. ఇది ఫిలింమేక‌ర్ కి ప్రత్యేక హక్కు.. కానీ మన సమాజాన్ని మనం ఎటువైపు నడిపిస్తున్నామో చూడాల్సిన బాధ్యత కూడా మనపై ఉంది`` అని సునిశితంగా వ్యాఖ్యానించింది.

రణబీర్ పాత్ర రణ్ విజయ్ చర్యలను వంగా ఎప్పుడూ సమర్థించలేదని భూమి అభిప్రాయపడింది. నేను యానిమ‌ల్ ను చూసినప్పుడు గరిష్ట విషపూరిత మగతనం అవతారమైన పాత్రను చూసాను. నేను దానిని చూశాక అనిపించింది.. నా కొడుకు అలా అవ్వడం నాకు ఇష్టం లేదు. ఫిల్మ్ మేకర్ సందీప్ వంగా కూడా సినిమాలో చూపించిన‌ట్టు ఎక్కడా తన చర్యను సమర్థిస్తున్నార‌ని నేను అనుకోను. అతడు సమాజంలోని సామాజిక వ్యతిరేక అంశం గురించి తెర‌పై చూపారు! అని విశ్లేషించారు భూమి.

అంతేకాదు యానిమ‌ల్ నుంచి కాకుండా ట్వ‌ల్త్ ఫెయిల్ నుండి స్ఫూర్తి పొందండి అని కూడా భూమి ఫెడ్నేక‌ర్ వ్యాఖ్యానించింది. ట్వ‌ల్త్ ఫెయిల్ లేదా యానిమల్.. వీటిలో ఏ సినిమా నుండి ప్రేరణ పొందాలో ప్రేక్షకులే నిర్ణయించుకోవాలి... అని అన్నారు. ``ఒక ఫిలింమేక‌ర్ గా మీకు భావ ప్రకటనా స్వేచ్ఛ ఉండాలి.. కానీ ప్రేక్షకులుగా మనం అర్థం చేసుకోవాలి… ట్వ‌ల్త్ ఫెయిల్‌ని చూస్తున్నప్పుడు మనం అలాంటి వ్యక్తిలా ఉండాలని అనుకుంటాం. అతడి నుండి స్ఫూర్తిని పొందండి. ఆ పాత్ర (జంతువుల రణ్‌విజయ్) నుంచి స్ఫూర్తి పొందకండి`` అని భూమి చెప్పింది.

ఇటీవల జరిగిన దాదాసాహెబ్ ఫాల్కే ఇంటర్నేషనల్ ఫిల్మ్ ఫెస్టివల్ అవార్డ్స్‌లో సందీప్ రెడ్డి వంగా తన బ్లాక్ బస్టర్ యానిమల్ చిత్రానికి గాను ఉత్తమ దర్శకుడి ట్రోఫీని అందుకున్నాడు. కొంద‌రు విమ‌ర్శించినా కానీ, చాలా మంది సినీప్ర‌ముఖులు అత‌డు అందించిన కంటెంట్ కి మ‌ద్ధ‌తుగాను మాట్లాడిన సంగ‌తి తెలిసిందే.