మెగా క్లాసిక్ రీ రిలీజ్‌... సినీ ప్రేమికులకు పండగే

ఈ మధ్య కాలంలో స్టార్‌ హీరోల సూపర్ హిట్ సినిమాలు రీ రిలీజ్ అవ్వడం చూస్తున్నాం. చిరంజీవి... పవన్ కళ్యాణ్‌.. మహేష్ బాబు.. ఎన్టీఆర్‌.. రామ్ చరణ్‌.. అల్లు అర్జున్‌.. ప్రభాస్.. ఇంకా ఎంతో మంది హీరోల సినిమాలు రీ రిలీజ్ అవ్వడం తో అభిమానులు పండగ చేసుకున్నారు. ఏ హీరో సినిమా రీ రిలీజ్ అయితే ఆ హీరో ఫ్యాన్స్ కి పండగ వాతావరణం.. కానీ త్వరలో రీ రిలీజ్ కాబోతున్న సినిమా తో తెలుగు సినీ ప్రేమికులందరికీ కూడా పండగే.

మెగాస్టార్ చిరంజీవి నటించిన జగదేక వీరుడు అతిలోక సుందరి సినిమా రీ రిలీజ్ కు రెడీ అవుతోంది. 4 కే టెక్నాలజీతో ఈ తరం ప్రేక్షకుల అభిరుచికి తగ్గట్లుగా స్క్రీన్‌ రెజల్యూషన్ తో మెగా క్లాసిక్ బ్లాక్ బస్టర్ సినిమా ను రీ రిలీజ్ చేయబోతున్నట్లుగా వైజయంతి మూవీస్‌ నుండి సమాచారం అందుతోంది.

చిరంజీవి సినిమా అయినప్పటికి అందరు హీరోల అభిమానులు కూడా ఈ సినిమాను ఇష్టపడుతారు. శ్రీదేవి కోసం.. సినిమాలోని అద్భుతమైన కాన్సెప్ట్‌ కోసం సినీ ప్రేమికులు అందరు కూడా అప్పట్లో థియేటర్ల ముందు క్యూ కట్టిన విషయం తెల్సిందే. జగదేక వీరుడు అతిలోక సుందరి సినిమా రీ రిలీజ్ అవ్వబోతుంది అనగానే ప్రతి ఒక్కరు కూడా ఆసక్తిగా ఎదురు చూస్తున్నారు.

ఇప్పటి వరకు ఈ సినిమా రీ రిలీజ్ డేట్ పై స్పష్టత రాలేదు. కానీ వచ్చే నెలలో మెగాస్టార్ చిరంజీవి పుట్టిన రోజు ఉంది. కనుక ఈ సినిమా రీ రిలీజ్ కు ఆ రోజు కంటే బెస్ట్‌ రోజు ఏది ఉండదు అంటూ వైజయంతి మూవీస్ భావిస్తున్నట్లు సమాచారం అందుతోంది.

ఈ క్లాసిక్‌ మూవీకి దర్శకేంద్రుడు రాఘవేంద్ర రావు దర్శకత్వం వహించగా ఇళయరాజా సంగీతాన్ని అందించారు. వేటూరి వారు అందించిన సాహిత్యం ఎంతటి పాపులారిటీని సొంతం చేసుకుందో ప్రత్యేకంగా చెప్పనక్కర్లేదు.

ఇంద్రలోకం కు చెందిన దేవత పాత్ర లో శ్రీదేవి కనిపించి వావ్‌ అనిపించింది. నిజంగా దేవతలు ఇలాగే ఉంటారేమో అన్నంతగా శ్రీదేవి మైమరిపించింది. అందుకే ఈ సినిమా ను ప్రతి ఒక్కరు ఇష్టపడుతారు అనడంలో సందేహం లేదు.