నిహారిక 'కమిటీ కుర్రోళ్ళు'.. రిలీజ్ ఎప్పుడంటే?

మెగా డాటర్ నిహారిక.. అటు సినిమాల్లో నటిస్తూనే.. ఇటు నిర్మాతగా వ్యవహరిస్తున్న విషయం తెలిసిందే. తన సొంత బ్యానర్ పింక్‌ ఎలిఫెంట్‌ పిక్చర్స్‌ పై వెబ్ సిరీసులతోపాటు చిత్రాలు నిర్మిస్తోంది. శ్రీ రాధా దామోదర్‌ స్టూడియోస్‌ బ్యానర్ తో కలిసి నిహారిక ప్రస్తుతం కమిటీ కుర్రోళ్ళు చిత్రాన్ని రూపొందిస్తోంది. ఈ సినిమాతో ఏకంగా ప‌ద‌కొండు మంది హీరోలు, న‌లుగురు హీరోయిన్ల‌ను టాలీవుడ్‌ ఇండస్ట్రీకి ప‌రిచ‌యం చేస్తోంది.

కమిటీ కుర్రోళ్ళు సినిమాలో ప్రసాద్ బెహరా, ఈశ్వర్ రచిరాజు, మణికంఠ పరసు, లోకేష్ కుమార్ పరిమి, శ్యామ్ కళ్యాణ్, రఘువరన్, అక్షయ్ శ్రీనివాస్, శివకుమార్ మట్టతోపాటు పలువురు హీరోలుగా నటిస్తున్నారు. శరణ్య సురేష్, తేజస్వి రావు, విషిక, షణ్ముకి హీరోయిన్లుగా న‌టిస్తున్నారు. ఇప్పటికే ఈ సినిమా నుంచి టీజర్‌ తో పాటు ఫస్ట్‌ లుక్‌, ట్రైలర్ విడుదలై ప్రేక్షకులను ఆకట్టుకున్నాయి. మంచి రెస్పాన్స్ అందుకున్నాయి.

ఇప్పుడు ఈ సినిమా నుంచి క్రేజీ అప్డేట్ ఇచ్చారు మేకర్స్. మూవీ రిలీజ్ డేట్ ను అనౌన్స్ చేశారు. ఆగస్టు 9వ తేదీన విడుదల చేస్తున్నట్లు ప్రకటించారు. "ఆగష్టు 9వ తేదీన థియేటర్లలో కుర్రోళ్ళ జాతర మొదలు.. మా కమిటీ కుర్రోళ్లతో భావోద్వేగాల రోలర్‌ కోస్టర్ రైడ్‌ ను ఎంజాయ్ చేయడానికి సిద్ధంగా ఉండండి" అంటూ మేకర్స్ ఓ వీడియో రిలీజ్ చేశారు. అందులో కుర్రాళ్ళు అల్లరి చేస్తున్నట్లు చూపించారు.

అయితే ఆగస్టు 9వ తేదీన సూపర్ స్టార్ మహేష్ బాబు బర్త్ డే కావడం విశేషం. అందుకే మేకర్స్ విడుదల చేసిన రిలీజ్ డేట్ అనౌన్స్మెంట్ వీడియోలో గుంటూరు కారం మూవీలోని మహేష్ బాబు మాస్ స్టీల్ ను బ్యానర్ రూపంలో చూపించారు. దానిపై జన్మదిన శుభాకాంక్షలు మహేష్ బాబు అని కూడా రాసి ఉంది. ప్రస్తుతం ఈ వీడియో నెట్టింట వైరల్ గా మారింది. ఆగస్టు 4వ తేదీన ఫ్రెండ్ షిప్ డే.. దీనిని దృష్టిలో ఉంచుకుని మేకర్స్ రిలీజ్ డేట్ ను ఫిక్స్ చేసినట్లు క్లారిటీ వచ్చేసింది.

1990 బ్యాక్‌ డ్రాప్‌ లో మొదలైన ప్రస్తుత తరం యువత జీవితం ఆధారంగా రూపొందుతున్న ఈ చిత్రానికి యదు వంశీ దర్శకుడిగా వ్యవహరిస్తున్నారు. సినిమాటోగ్రాఫర్ గా రాజు ఎడురోలు, మ్యూజిక్ డైరెక్టర్ గా అనుదీప్ దేవ్ వ్యవహరిస్తున్నారు. ప్రొడక్షన్ డిజైనర్ గా ప్రణయ్ నైని, ఎడిటర్ గా అన్వర్ అలీ పనిచేస్తున్నారు. మరి ఈ చిత్రం ఎలాంటి హిట్ అవుతుందో వేచి చూడాలి.