వాట్సాప్-టెలీగ్రామ్‌లో జ‌వాన్ పైర‌సీ చేస్తే వివ‌రాలివ్వండి: డిల్లీ హైకోర్టు

షారుఖ్ ఖాన్ నటించిన 'జవాన్' విడుదలైన ఆరు రోజుల్లోనే 500 కోట్ల రూపాయలకు పైగా కలెక్షన్లతో బాక్సాఫీస్ వద్ద జోరుగా ముందుకు సాగుతోంది. అయితే భారీ విజయాన్ని అందుకున్న ఈ సినిమా కూడా య‌థావిధిగా పైరసీ బారిన పడింది. సెప్టెంబరు 7న విడుదలైన కొన్ని గంటలకే ఈ చిత్రం వివిధ ఆన్‌లైన్ ప్లాట్‌ఫారమ్‌లు వెబ్‌సైట్‌లలో HD ప్రింట్‌లో స్ట్రీమింగ్ - డౌన్‌లోడ్ కోసం లీక్ అయింది. ఈ సమస్యను పరిష్కరించడానికి, షారుఖ్ ఖాన్ రెడ్ చిల్లీస్ ఎంటర్‌టైన్‌మెంట్ కఠినమైన క్రమశిక్షణా చర్య తీసుకుంది. జ‌వాన్ క్లిప్‌లను షేర్ చేస్తున్న వారిని లేదా సోషల్ మీడియా ప్లాట్‌ఫారమ్‌లలో అప్‌లోడ్ చేసేవారిని ట్రాక్ చేయడానికి యాంటీ-పైరసీ ఏజెన్సీలను నియమించింది.

వాట్సాప్ ఇతర ప్లాట్‌ఫారమ్‌లలో పైరేటెడ్ ఫిల్మ్ కంటెంట్‌ను షేర్ చేస్తున్న‌వారిని గుర్తించి వారిపై క్రిమినల్ కేసులు పెట్టారు. రెడ్ చిల్లీస్ ప్రొడక్షన్ హౌస్ ప్ర‌తినిధుల‌ వివ‌రాల ప్ర‌కారం..వివిధ ప్లాట్‌ఫారమ్‌లలో వ్యక్తులు నడుపుతున్న పైరేటెడ్ ఖాతాలను మేము ఇప్పటికే ట్రాక్ చేసార‌ని కూడా తెలుస్తోంది. జవాన్ సినిమా పైరసీ కంటెంట్‌ను విడుదల చేసినందుకు వారిపై క్రిమినల్, సివిల్ చర్యలు ప్రారంభ‌మ‌వుతాయి. పైరసీ అనేది చలనచిత్ర పరిశ్రమ ఎదుర్కొంటున్న పెద్ద సమస్య. సినిమాతో అనుబంధించబడిన వేలాది మంది శ్రమను నాశ‌నం చేస్తుంది.. అని అత‌డు పేర్కొన్నారు.

అట్లీ ద‌ర్శ‌క‌త్వం వ‌హించిన జవాన్ అనేది సమాజంలోని తప్పులను సరిదిద్దడానికి ప్ర‌య‌త్నించే ఒక వ్యక్తి భావోద్వేగ ప్రయాణానికి సంబంధించిన సినిమా. హై-ఆక్టేన్ యాక్షన్ థ్రిల్లర్. ఈ చిత్రంలో విజయ్ సేతుపతి విలన్‌గా నటించగా, సన్యా మల్హోత్రా, ప్రియమణి కీలక పాత్రల్లో నటించారు.

వాట్సాప్, టెలీగ్రామ్‌తో ముప్పు:

పైరసీకి వ్యతిరేకంగా జవాన్ మేకర్స్ ప్ర‌య‌త్నాలు ఫ‌లించి చివ‌రికి కోర్టు నుంచి అనుకూల స్పంద‌న వ్య‌క్త‌మైంది. దిల్లీ హైకోర్టు దీనిపై విచార‌ణ‌ను సాగిస్తోంది. జవాన్ సినిమాకు సంబంధించి వాట్సాప్, టెలిగ్రామ్ గ్రూప్స్‌లో చట్టవిరుద్ధంగా షేర్ అయిన కంటెంట్‌ను తొలిగించమని, డీయాక్టివేట్ చేయాలని కోర్టుని మేకర్స్ కోరారు. ఈ నేపథ్యంలో కోర్టు.. ఎయిర్ టెల్, ఐడియా, ఒడాఫోన్, రిలయన్స్, జియో, బి.ఎస్.ఎన్.ఎల్ సంస్థలకు వాట్సాప్, టెలిగ్రామ్‌ల్లో ఉంటూ జవాన్ సినిమాను పైరసీ కంటెంట్‌ను షేర్ చేశారో వారికి సంబంధించిన ఫోన్ నెంబర్స్, వారు ఉపయోగించే అకౌంట్ వివరాలను తెలియజేయాలని కోరింది. అలాంటి వారందరిపై న్యాయపరమైన చర్యలను తీసుకోవటానికి లైన్ క్లియ‌రైంది.

టాలీవుడ్ కోలీవుడ్‌లోను ప్ర‌య‌త్నం:

పైర‌సీ మ‌హ‌మ్మారీ ప్ర‌పంచ‌వ్యాప్తంగా అన్ని సినీప‌రిశ్ర‌మ‌ల్ని నాశ‌నం చేస్తోంది. దీనికి హాలీవుడ్, బాలీవుడ్ అనే తేడా లేదు. ముఖ్యంగా టాలీవుడ్, కోలీవుడ్ కి ఈ బెడ‌ద త‌ప్ప‌డం లేదు. త‌మిళ్ రాక‌ర్స్ స‌హా ప‌లువురు పైరేట్ లు సినిమాల‌ను య‌థేచ్ఛ‌గా కాపీ చేస్తూ ఆన్ లైన్ లో డౌన్ లోడ్ లింకుల‌ను అందుబాటులోకి తెస్తున్నారు. వారిపై చ‌ర్య‌ల కోసం సైబ‌ర్ క్రైమ్ సెల్ ని ఆశ్ర‌యించి నిర్మాత‌లు చాలా ప్ర‌య‌త్నాలు చేసారు. బాహుబ‌లి రిలీజ్ స‌మ‌యంలో ఆర్కా మీడియా సంస్థ తీవ్రంగా శ్ర‌మించింది. అప్ప‌ట్లో కొంద‌రిపై కేసులు కూడా న‌మోద‌య్యాయి. ఆ త‌ర్వాత ఇండ‌స్ట్రీ దిగ్గ‌జాలైన డి.సురేష్ బాబు - దిల్ రాజు వంటి వారు పైర‌సీకారులను నిలువ‌రించేందుకు ప్ర‌య‌త్నించారు. కానీ ఇది పూర్తిగా అంతం కాని స‌మ‌స్య‌. వంద‌ల కోట్ల న‌ష్టాల‌కు ఆన్ లైన్ పైర‌సీ కార‌ణ‌మ‌వుతోంది. ప్ర‌స్తుతం తెలుగు సినిమా పాన్ ఇండియా నుంచి పాన్ వ‌ర‌ల్డ్ స్థాయికి ఎదుగుతోంది. ఇలాంటి స‌మ‌యంలో అయినా దీనిని ఆపేందుకు మ‌న నిర్మాత‌లు ఎలాంటి ప్ర‌యత్నాలు చేస్తారో వేచి చూడాలి.