దేవర' గ్లింప్స్.. ఇది పర్ఫెక్ట్ ప్లాన్

RRR' వంటి పాన్ ఇండియా హిట్ తర్వాత యంగ్ టైగర్ ఎన్టీఆర్ నటిస్తున్న లేటెస్ట్ మూవీ 'దేవర'. కొరటాల శివ ఈ చిత్రానికి దర్శకత్వం వహిస్తున్నారు. గతంలో వీరిద్దరి కాంబినేషన్ వచ్చిన 'జనతా గ్యారేజ్' మంచి కమర్షియల్ సక్సెస్ అవ్వడంతో దేవరపై భారీ అంచనాల నెలకొన్నాయి. ఈసారి కొరటాల పాన్ ఇండియా స్థాయిలో గ్రాండ్ స్కేల్లో ఈ మూవీని తెరకెక్కిస్తున్నారు. బాలీవుడ్ బ్యూటీ జాన్వి కపూర్ ఈ మూవీతో తెలుగు వెండితెరకి హీరోయిన్గా పరిచయం అవుతుంది.

బాలీవుడ్ అగ్ర హీరో సైఫ్ అలీఖాన్ విలన్ గా నటిస్తున్న ఈ సినిమా నుంచి ఇప్పటికే విడుదలైన పోస్టర్స్ భారీ రెస్పాన్స్ అందుకోగా చాలా రోజులుగా దేవర గ్లింప్స్ టీజర్ కోసం ఫ్యాన్స్ ఎంతో ఆసక్తిగా ఎదురు చూస్తున్నారు. ఇలాంటి తరుణంలో డిసెంబర్ లో దేవర టీజర్ రాబోతుందని వార్తలు వచ్చిన విషయం తెలిసిందే. అయితే మూవీ టీం మాత్రం దేవర టీజర్ ని డిసెంబర్ లో రిలీజ్ చేయకుండా పోస్ట్ పోన్ చేసింది.

లేటెస్ట్ టాలీవుడ్ రిపోర్ట్స్ ప్రకారం దేవర నుండి ఓ గ్లింప్స్ వీడియోని జనవరి మొదటి వారంలో విడుదల చేసేందుకు మేకర్స్ ప్రయత్నాలు చేస్తున్నట్లు సమాచారం. ఒకవేళ అప్పటికి కాకుంటే జనవరి రెండో వారంలో సంక్రాంతి రిలీజ్ అయ్యే సినిమాలన్నింటికీ దేవర గ్లిమ్స్ ని అటాచ్ చేసి రిలీజ్ చేయాలని మేకర్స్ భావిస్తున్నారట. ప్రస్తుతం కొరటాల శివ టీజర్ కట్ పనులతో బిజీగా ఉన్నట్లు వార్తలు వినిపిస్తున్నాయి.

ఆమధ్య ఈ సినిమా నిర్మాతల్లో ఒకరైన కళ్యాణ్ రామ్ తన డెవిల్ ట్రైలర్ లాంచ్ ఈవెంట్ లో జనవరిలో మొదట్లోనే దేవర టీజర్ ని రిలీజ్ చేయబోతున్నామని, ఆల్రెడీ టీజర్ రెడీ అవుతుందని చెప్పిన విషయం తెలిసిందే. భారీ గ్రాఫిక్స్, వీఎఫ్ఎక్స్ షాట్స్ తో దేవర గ్లిమ్స్ ని కొరటాల రెడీ చేయిస్తున్నట్లు సమాచారం. ఎన్టీఆర్ కెరియర్ లోనే అత్యంత భారీ బడ్జెట్ తో రూపొందుతున్న దేవర రెండు భాగాలుగా రాబోతోంది.

మొదటి భాగం షూటింగ్ ఇప్పటికే సగానికి పైగా పూర్తయింది. ప్రస్తుతం చిత్రీకరణ దశలో ఉన్న ఈ సినిమా వచ్చే ఏడాది వేసవి కానుకగా ఏప్రిల్ 5న ప్రేక్షకుల ముందుకు రాబోతోంది. సముద్రం బ్యాక్ డ్రాప్ లో యాక్షన్ డ్రామాగా తెరకెక్కుతున్న ఈ సినిమాలో ఎన్టీఆర్ తండ్రి కొడుకులుగా డ్యూయల్ రోల్ చేస్తున్నాడు. యువ సుధా ఆర్ట్స్, ఎన్టీఆర్ ఆర్ట్స్ బ్యానర్లపై మిక్కిలినేని సుధాకర్, కళ్యాణ్ రామ్ సంయుక్తంగా నిర్మిస్తున్న ఈ చిత్రానికి అనిరుద్ రవిచంద్రన్ సంగీతం అందిస్తున్నారు.