డాన్ ఫ్రాంఛైజీలో `డాన్ 3` కొన్నేళ్లుగా చ‌ర్చ‌ల్లో నిలుస్తోంది. షారూఖ్ ఖాన్ అభిమానులు ఫ్రాంచైజీ మూడో భాగం కోసం చాలా కాలంగా వేచి చూసారు. కానీ ఫర్హాన్ అక్తర్ ప్లాన్ మార‌డంతో నెక్ట్స్ ఏంటో తెలుసుకోవాల‌నే ఉత్కంఠ ప్ర‌జ‌ల్లో ఉంది. ఇప్పుడు అమితాబ్ బచ్చన్ (డాన్) , షారుఖ్ ఖాన్ ( డాన్, డాన్ 2) అమరత్వం పొందిన పాత్రలో రణవీర్ సింగ్ అడుగుపెట్టాడు. యంగ్ సూపర్‌స్టార్ రణవీర్ లుక్‌కు విపరీతమైన ప్రశంసలు ద‌క్కాయి. అతడు ఆగస్ట్ 2024 నుండి డాన్ 3 చిత్రీక‌ర‌ణ‌లో పాల్గొన‌నున్నాడు.
మేకర్స్ ఇప్ప‌టికే విదేశాల్లోని కొన్ని ఎగ్జోటిక్ లొకేష‌న్ల‌ను పరిశీలించారు. ప్రియాంక చోప్రా తర్వాత కొత్త జంగ్లీ బిల్లీగా కియారా అద్వానీ ఎంపికైంది. ద‌ర్శ‌క‌నిర్మాత ఫర్హాన్ అక్తర్ ఇప్పటివరకు తన కెరీర్‌లో అతిపెద్ద చిత్రంగా డాన్ 3ని రూపొందించడానికి అన్ని ప్రయత్నాలు చేస్తున్నట్లు తెలుస్తోంది.
ఫర్హాన్ అక్తర్ డాన్ 3ని గ్లోబల్ యాక్షన్ ఫిల్మ్ స్థాయిలో తీయాలనుకుంటున్నార‌ని స‌మాచారం. షారూఖ్ ఖాన్‌తో ఇంతకుముందు వచ్చిన డాన్ సినిమాలు మంచి బడ్జెట్‌తో తెర‌కెక్కిన‌వే. అయితే డాన్ 3 ప్లానింగ్ మ‌రో స్థాయిలో ఉంది. ఒక సోర్స్ ప్ర‌కారం.. `డాన్ 3` అనేది గ్లోబల్ యాక్షన్ థ్రిల్లర్‌గా రూపొందించడానికి ఫర్హాన్ ప్రయత్నిస్తున్నారు. ఈసారి డాన్ గా న‌టించ‌డానికి రణ్‌వీర్ సింగ్ కంటే గొప్పవారు ఎవరూ లేరు అని అతడు న‌మ్ముతున్నాడు.
2023లో జవాన్ , పఠాన్ వంటి భారతీయ సినిమాలు పాశ్చాత్యుల అభిమానాన్ని సంపాదించాయి. బాలీవుడ్ హాలీవుడ్ కి ధీటుగా అభివృద్ధి చెందుతోంది. విశ్వ‌వ్యాప్త అభిమానుల‌న సంపాదించుకుంటోంది. ద‌ర్శ‌క‌నిర్మాతలు కొత్త మార్కెట్లను అన్వేషించాలనుకుంటున్నారు. అదే క్ర‌మంలో డాన్ 3 కోసం బ‌డ్జెట్ల స్థాయిని అమాంతం పెంచార‌ని కూడా టాక్ వినిపిస్తోంది. ఈ సినిమా కోసం 400 కోట్ల వ‌ర‌కూ బడ్జెట్ పెట్టేందుకు రంగం సిద్ధం చేస్తున్నార‌ని గుస‌గుస వినిపిస్తోంది. కేవ‌లం హిందీ-తెలుగు-త‌మిళం మాత్ర‌మే కాకుండా ప్ర‌పంచ‌వ్యాప్తంగా ప‌లు భాష‌ల్లో విడుద‌ల చేయాల‌నే ఆలోచ‌న కూడా ఫర్హాన్ కి ఉంద‌ని తెలుస్తోంది.