డబుల్ ఇస్మార్ట్.. ఈ ఇబ్బందులను ఎలా దాటుతారో..

పూరి జగన్నాథ్ లైగర్ సినిమాతో కెరియర్ లోనే బిగ్గెస్ట్ డిజాస్టర్ అందుకున్నారు. ఈ సినిమా అతని ఇమేజ్ ని కూడా దెబ్బతీసింది. అదే సమయంలో ఫైనాన్షియల్ గా కూడా పూరి జగన్నాథ్ ని ఇబ్బందుల్లో పడేసింది. లైగర్ సినిమా రైట్స్ ని పూరి జగన్నాథ్ భారీ ధరలకి చాలా ప్రాంతాలలో అమ్మారు. అయితే సినిమా డిజాస్టర్ కావడంతో డిస్టిబ్యూటర్స్, ఎగ్జిబిటర్స్ నష్టాలు చవిచూడాల్సి వచ్చింది. ఓ విధంగా చాలా మందిని లైగర్ కోలుకోలేని దెబ్బ తీసింది.

దీంతో డిస్టిబ్యూటర్స్, ఎగ్జిబిటర్స్ అందరూ కూడా లైగర్ డైరెక్టర్, నిర్మాతగా ఉన్న పూరి జగన్నాథ్ మీద పడ్డారు. లైగర్ తో నష్టపోయింది తిరిగి చెల్లించాలని డిమాండ్ చేస్తున్నారు. కచ్చితంగా కొంత వరకైనా సినిమా నష్టాలని పూరి జగన్నాథ్ భరించాలని అడుగుతున్నారు. నైజాం డిస్టిబ్యూటర్ వరంగల్ శ్రీనుతో పాటుగా వైజాగ్ ఎగ్జిబిటర్స్ కూడా లైగర్ సినిమా లాస్ పై ఆందోళన చేస్తున్నారు.

ప్రొడ్యూసర్ కౌన్సిల్ లో పంచాయితీలు పెట్టారు. అయితే ఈ ఇష్యూ మాత్రం ఒక కొలిక్కి రాలేదు. ఈ ఇంపాక్ట్ డబుల్ ఇస్మార్ట్ రిలీజ్ పైన పడింది. లైగర్ ఫైనాన్షియల్ లాస్ ని క్లియర్ చేయకుండా డబుల్ ఇస్మార్ట్ చిత్రాన్ని రిలీజ్ కానివ్వమని డిస్టిబ్యూటర్స్, ఎగ్జిబిటర్స్ వార్నింగ్ ఇస్తున్నారు. దీంతో ఈ సమస్యని ఏషియన్ సునీల్ పరిష్కరించాలని ప్రయత్నం చేసిన వర్క్ అవుట్ కాలేదు. అలాగే స్రవంతి రవికిశోర్ రంగంలోకి దిగి ఎగ్జిబిటర్స్ తో చర్చించారు.

అతని మాట వినే పరిస్థితిలో కూడా వారు లేరు. కచ్చితంగా మా ఇష్యూ పరిష్కరించిన తర్వాత డబుల్ ఇస్మార్ట్ రిలీజ్ చేసుకోవాలని వారు తెగేసి చెబుతున్నారు. పూరి జగన్నాథ్ కి ఇంకా టైం ఇవ్వడానికి వారు సిద్ధంగా లేరు. డబుల్ ఇస్మార్ట్ థీయాట్రికల్ రైట్స్ ని హనుమాన్ ప్రొడ్యూసర్ నిరంజన్ రెడ్డి కొన్నారు. అన్ని ప్రాంతాలలో డబుల్ ఇస్మార్ట్ రిలీజ్ కి ఏర్పాట్లు చేసుకున్నారు.

అయితే నైజాం, వైజాగ్ లో మాత్రం ఎగ్జిబిటర్స్ సహకరించడం లేదు. డబుల్ ఇస్మార్ట్ మూవీ ప్యూర్ తెలంగాణ బ్యాక్ డ్రాప్ కథతో తెరకెక్కింది. కచ్చితంగా నైజాంలోనే ఈ సినిమాకి ఎక్కువ వసూళ్లు వచ్చే అవకాశం ఉంది. అలాంటిది ఇక్కడే రిలీజ్ కి ఇబ్బంది అయితే ఆర్ధికంగా చాలా నష్టాలు ఫేస్ చేసే సమస్య ఉంది. మరి దీనిని పూరి జగన్నాథ్ అండ్ కో ఎలా పరిష్కరించుకుంటారు అనేది చూడాలి.