'గామి' షాకింగ్ లుక్.. విశ్వక్ సేన్ అఘోరా థ్రిల్

టాలీవుడ్ యంగ్ హీరో విశ్వక్ సేన్ ప్రస్తుతం ఫుల్ జోష్ లో ఉన్నారు. ప్రతి సినిమాతో ప్రేక్షకులను కొత్తగా ఆకట్టుకునే ప్రయత్నం చేస్తున్నారు. ఎలాంటి మూవీ చేసినా అందులో తన పాత్ర నెవ్వర్ బిఫోర్ లా ఉండేలా చూసుకుంటున్నారు మాస్ కా దాస్. ప్రస్తుతం ఆయన లైనప్ లో డిఫరెంట్ సినిమాలు ఉన్నాయి. వాటిలో ఒకటి గామి.

దర్శకుడు విద్యాధర్ కగిట ఈ చిత్రాన్ని అడ్వెంచర్‌ డ్రామాగా తెరకెక్కిస్తున్నారు. అనౌన్స్మెంట్ తోనే బజ్‌ క్రియేట్ చేసిన ఈ సినిమా షూటింగ్‌ స్టార్ట్‌ అయ్యి చాలా రోజులు అవుతుంది. అయితే ఇప్పటి వరకు ఎలాంటి అప్డేట్ రాలేదు. తాజాగా ఫస్ట్‌ లుక్‌ ను లాంఛ్ చేశారు మేకర్స్‌. ముుందుగా చెప్పినట్టుగానే జనవరి 28న హైదరాబాద్ లో జరుగుతున్న కామిక్‌ కాన్‌ మూవీ ఫెస్టివల్ లో గామి ఫస్ట్‌ లుక్‌ ను విడుదల చేశారు.

ఫస్ట్ లుక్ పోస్టర్ లో విశ్వక్‌ సేన్‌ లుక్‌ సరికొత్తగా ఉంది. అఘోర లుక్‌ లో ఉన్న హీరో చుట్టూ మనుషులు చేతులు తాకడానికి ప్రయత్నిస్తున్నట్టు ఉన్నారు. మొత్తం బ్లాక్‌ అండ్‌ వైట్‌ లో ఉన్న ఈ ఫస్ట్‌ లుక్‌ పోస్టర్ పై రాసిన కొటేషన్ సినిమాపై మరింత బజ్‌ క్రియేట్‌ చేస్తోంది. "అతడి అతి పెద్ద భయం మానవ స్పర్శ. అతడి లోతైన కోరిక కూడా మానవ స్పర్శ" అంటూ మూవీ పై క్యూరియాసిటీ పెంచింది టీమ్.

"ఓ వ్యక్తి విభిన్నమైన కథ.. అతిపెద్ద భయాన్ని అధిగమించేందుకు అతడి ప్రయాణం" అంటూ ఈ ఫస్ట్ లుక్ పోస్టర్‌ ను వీ సెల్యులాయిడ్ సోషల్ మీడియాలో పోస్ట్ చేసింది. కార్తీక్ శబరీశ్ నిర్మిస్తున్న ఈ చిత్రాన్ని వీ సెల్యులాయిడ్ బ్యానర్ సమర్పిస్తోంది. ఈ మూవీలో హీరోయిన్ చాందినీ చౌదరి, ఎంజీ అభినయ, మహమ్మద్ సమద్, దయానంద్ రెడ్డి, హారిక పెడన కీలక పాత్రలు పోషిస్తున్నారు.

గామి చిత్రం కోసం నాలుగేళ్లుగా పని చేస్తున్నామని ఇటీవలే విశ్వక్ చెప్పారు. ఈ సినిమాలో ఆయన శంకర్ అనే అఘోరగా నటిస్తున్నారట. ఆయన క్యారెక్టర్‌ చాలా విచిత్రంగా ఉండబోతుందట. అయితే గామి సినిమా షూటింగ్ దాదాపు పూర్తయినట్లు తెలుస్తోంది. పోస్ట్ ప్రొడక్షన్ పనులు కూడా ఇటీవలే షురూ అయ్యాయని సమాచారం. ఆదివారం ఫస్ట్ లుక్ చేసిన మూవీ టీమ్.. త్వరలోనే ఈ సినిమా విడుదలవుతుందని పేర్కొంది. మరి ఈ సినిమా ఎలాంటి హిట్ కొడుతుందో చూడాలి.