మాస్ మసాలా విందు రెడీ అవుతోంది..!

రవితేజ తో 'క్రాక్‌', బాలకృష్ణ తో 'వీర సింహా రెడ్డి' సినిమాలు రూపొందించి బ్యాక్ టు బ్యాక్‌ విజయాలను సొంతం చేసుకున్న దర్శకుడు గోపీచంద్‌ మలినేని ఒక భారీ యాక్షన్‌ ఎంటర్టైనర్‌ ను రూపొందిస్తున్నాడు. మొదట ఈ సినిమాను ఒక తెలుగు హీరోతో అనుకున్నాడు. కానీ కొన్ని కారణాల వల్ల ఆ సినిమా క్యాన్సిల్‌ అయ్యింది. దాంతో బాలీవుడ్‌ సీనియర్‌ హీరో సన్నీ డియోల్‌ తో దర్శకుడు గోపీచంద్‌ ఆ సినిమాను ప్రస్తుతం చేస్తున్నాడు. తెలుగు, హిందీలో రూపొందుతున్న ఈ భారీ యాక్షన్‌ ఎంటర్‌టైనర్‌ కి సంబంధించిన అప్‌డేట్స్ ను రెగ్యులర్‌ గా దర్శకుడు గోపీచంద్‌ మలినేని ఇస్తూనే ఉన్నాడు.

ఒకప్పుడు పలు సూపర్‌ హిట్‌ సినిమాలు చేసిన సన్నీ డియోల్‌ కొంత కాలంగా సక్సెస్‌ లు లేకపోవడంతో నిరాశతో ఉన్నాడు. ఆ సమయంలో వచ్చిన 'గదర్‌ 2' సినిమా సంచలన విజయాన్ని సొంతం చేసుకుంది. సన్నీ డియోల్‌ పనైపోయింది అనుకుంటున్న సమయంలో అనూహ్యంగా పుంజుకుని ఉవ్వెత్తున ఎగిశాడు. దాంతో ఆయన్ను హీరోగా పెట్టి మళ్లీ సినిమాలు నిర్మించేందుకు పెద్ద బ్యానర్‌ లు సైతం ముందుకు వస్తున్నాయి. గదర్ 2 హిట్‌ నేపథ్యంలో ఆయనతో గోపీచంద్‌ మలినేని సినిమాకు రెడీ అయ్యాడు. వీరి కాంబో మూవీ ని మైత్రి మూవీ మేకర్స్ వారు భారీ బడ్జెట్‌ తో నిర్మిస్తున్నారు.

సినిమా షూటింగ్‌ నిర్విరామంగా, శరవేగంగా జరుగుతోందని చిత్ర యూనిట్‌ సభ్యులు తెలియజేస్తున్నారు. తాజాగా దర్శకుడు గోపీచంద్‌ మలినేని సోషల్‌ మీడియా ప్లాట్‌ ఫామ్‌ ఎక్స్ లో ఈ సినిమా కి సంబంధించిన యాక్షన్‌ సన్నివేశాల చిత్రీకరణ జరుపుతున్నట్లు చెప్పుకొచ్చాడు. ప్రముఖ ఫైట్ మాస్టర్‌ పీటర్‌ హెయిన్‌ సారధ్యంలో భారీ యాక్షన్ ఎపిసోడ్స్ ను సన్నీ డియోల్‌ పై చిత్రీకరిస్తున్నామని, ఒక భారీ మాస్ మసాలా విందు రెడీ అవుతోంది అన్నట్లుగా ట్వీట్‌ చేశాడు. గోపీచంద్‌ మలినేని ట్వీట్‌ అందరి దృష్టిని ఆకర్షిస్తోంది.

గదర్ 2 సినిమా సూపర్‌ హిట్‌ అవ్వడంతో ఆయన నుంచి వస్తున్న సినిమా అనగానే హిందీ ప్రేక్షకుల్లో ఆసక్తి నెలకొంది. ఇలాంటి సమయంలో తెలుగు దర్శకుడు గోపీచంద్‌ మలినేని రూపొందిస్తున్న ఈ సినిమా ను వారు ఎలా ఆధరిస్తారా అంటూ అంతా ఆసక్తిగా చూస్తున్నారు. నెట్టింట ఇప్పటికే ఈ సినిమాకు సంబంధించిన పలు విషయాలు వైరల్‌ అవుతున్నాయి. సౌత్‌ దర్శకులు ఈ మధ్య కాలంలో బాలీవుడ్‌ ను దున్నేస్తున్నారు. కనుక గోపీచంద్‌ మలినేని కూడా ఈ సినిమా తో బాలీవుడ్‌ ప్రేక్షకుల దృష్టిని ఆకర్షించడం మాత్రమే కాకుండా అక్కడి ఫిల్మ్‌ మేకర్స్‌ ఇంకా స్టార్స్‌ ని కూడా సర్‌ప్రైజ్‌ చేసే అవకాశాలు ఉన్నాయనే అభిప్రాయం వ్యక్తం అవుతోంది.