అంబానీల సంగీత్‌ని ఊపేయ‌డానికి దిగాడు!

అనంత్ అంబానీ- రాధిక మర్చంట్ ఎట్టకేలకు పెళ్లి బంధంతో ఒక‌టి కాబోతున్నారు. రెండు ప్రీవెడ్డింగ్ వేడుక‌ల అనంత‌రం ఈ జంట పెళ్లి ముంబై- జియో సెంట‌ర్ లో జూలై12న అంగ‌రంగ వైభ‌వంగా జ‌ర‌గ‌నుంది. పెళ్లి తేదీ దగ్గర పడుతుండడంతో సంబరాలు మొదలయ్యాయి. నిన్ననే అంటీళ్లా బంగ్లా వద్ద మామెరు వేడుక జరిగింది. ఈ వేడుకకు జాన్వీ కపూర్, ఓర్రీతో పాటు పలువురు హాజరయ్యారు. ఇషా అంబానీ, నీతా అంబానీ, ముఖేష్ అంబానీ, శ్లోకా అంబానీ తదితరుల వీడియోలు సోషల్ మీడియాలో వైరల్ అయ్యాయి. ఇప్పుడు అంత‌ర్జాతీయ పాప్ స్టార్ జస్టిన్ బీబర్ ముంబైలో అడుగుపెట్టినప్ప‌టి వీడియో ఒకటి అంద‌రి దృష్టిని ఆకర్షించింది.

తాజా క‌థ‌నాల ప్ర‌కారం... అనంత్ అంబానీ - ముఖేష్ అంబానీల సంగీత్‌ వేడుకలో జస్టిన్ బీబర్ ప్రదర్శన ఇవ్వడానికి సిద్ధంగా ఉన్నాడు. ఎయిర్‌పోర్టు నుంచి భారీ భద్రత మధ్య ఆయన కారును రప్పిస్తున్న వీడియో ఇంటర్నెట్‌లో హల్‌చల్ చేస్తోంది. దాదాపు ఏడేళ్ల తర్వాత జస్టిన్‌ బీబర్‌ తిరిగి భారత్‌కు వచ్చాడు. చివరిసారిగా గాయకుడు బీబ‌ర్ ముంబైలో తన కచేరీలో ప్రదర్శన ఇవ్వడానికి భారతదేశానికి వచ్చారు. ఇప్పుడు అనంత్ అంబానీ - రాధిక మర్చంట్ వివాహంలో అహూతుల‌ను రంజింప‌జేయ‌నున్నాడు.

జస్టిన్ బీబర్‌తో పాటు బాద్షా వంటి మరికొందరు కూడా ఈ పెళ్లి వేడుక‌లో త‌మ ప్ర‌ద‌ర్శ‌న ఇవ్వబోతున్నారని సమాచారం. రాపర్ కరణ్ ఔల్జా కూడా ప్రదర్శన ఇవ్వాల్సి ఉంది. అతను బాడ్ న్యూజ్ నుండి తౌబా తౌబా కోసం విక్కీ కౌశల్‌తో కలిసి పనిచేసినందున అతడు ప్రస్తుతం వార్తల్లో ఉన్నాడు. చాలా మంది ఔత్సాహిక గాయ‌నీగాయ‌కుల‌ పెద్ద పేర్లు హెడ్‌లైన్స్‌లోకి వచ్చాయి. అంతకుముందు, రాధిక మర్చంట్ మరియు అనంత్ అంబానీల వివాహ వేడుకలో ప్రదర్శన ఇవ్వడానికి అడెలె, డ్రేక్ , లానా డెల్ రే వంటి అంతర్జాతీయ తారలు చర్చలు జరుపుతున్నట్లు మీడియా క‌థ‌నాలు పేర్కొన్నాయి. సంగీత్ వేడుక నీతా ముఖేష్ అంబానీ కల్చరల్ సెంటర్ (NMACC)లో జరపాలని భావిస్తున్నారు.

జూలై 12న ముంబయిలో అనంత్ అంబానీ, రాధికా మర్చంట్ వివాహం జరగనుంది. మళ్లీ మూడు రోజుల పాటు ఈ వేడుక‌ సాగనుంది. పెళ్లికి ముందు అంబానీలు రెండు ప్రీ వెడ్డింగ్ బాష్‌లు నిర్వహించారు. ఒకటి జామ్‌నగర్‌లో జ‌ర‌గ‌గా.. అంత‌ర్జాతీయ పాప్ స్టార్ రిహన్న, అకోన్, దిల్జిత్ దోసాంజ్ ఇతరులు త‌మ ప్ర‌ద‌ర్శ‌న‌తో ఆక‌ట్టుకున్నారు. మరొకటి విలాసవంతమైన విహారయాత్రలో కాటి పెర్రీ త‌దిత‌రులు ప్ర‌ద‌ర్శ‌న‌లు ఇచ్చారు. షారూఖ్ ఖాన్, సల్మాన్ ఖాన్, అమీర్ ఖాన్, అభిషేక్ బచ్చన్, రణబీర్ కపూర్, అలియా భట్ ఇతర ప్రముఖులు ఈ కార్యక్రమాలకు హాజరయ్యారు. ఇప్పుడు సెలబ్రెటీలు పెళ్లి వేడుకలో కనిపించనున్నారు.