'ఇంద్ర''నిర్మాతకు చిరు కానుక

మెగాస్టార్‌ చిరంజీవి నటించిన ఇంద్ర సినిమా ఇటీవల రీ రిలీజ్ అయ్యింది. విడుదలై 22 ఏళ్లు అయినా కూడా ఇంద్ర కి ఏమాత్రం క్రేజ్ తగ్గలేదు. రీ రిలీజ్‌ లోనూ రికార్డ్‌ స్థాయి వసూళ్లు నమోదు చేసి సంచలనం సృష్టించింది. ఇంద్ర రీ రిలీజ్ కి మంచి స్పందన వచ్చిన నేపథ్యంలో మెగాస్టార్‌ చిరంజీవి చిత్రానికి సంబంధించిన వారిని ఆహ్వానించి చిరు సత్కారం చేశారు. చిరు సత్కారం అందుకున్న వారిలో నిర్మాత అశ్వనీదత్‌, దర్శకుడు గోపాల్‌, సంగీత దర్శకుడు మణిశర్మ, రచయితలు గోపాలకృష్ణ, వెంకటేశ్వరరావు, చిన్న కృష్ణ లు ఉన్నారు.

చిరంజీవి సత్కారం అందుకున్న వీరు తమ ఆనందాన్ని వ్యక్తం చేశారు. నిర్మాత అశ్వనీదత్‌ కి చిరంజీవి నుంచి చిరు బహుమానం గా ఆకర్షణీయమైన శంఖం అందింది. స్వయంగా అశ్వనీదత్‌ ఈ విషయాన్ని తెలియజేస్తూ.. ఈ విజయ శంఖాన్ని మీరు నాకు బహుమానంగా ఇవ్వడం సంతోషంగా ఉంది. అయితే ఈ విజయ శంఖం ను ఇంద్రుడు లేదా దేవేంద్రుడు పూరించాలి. దానికి మీరు మాత్రమే అర్హులు. ఈ జ్ఞాపకం ఎప్పటికి నా మదిలో ఉంటుంది అంటూ అశ్వనీదత్ సోషల్‌ మీడియా ద్వారా చెప్పుకొచ్చాడు.

ఇంద్ర రీ రిలీజ్‌ విజయం పై చిరంజీవి సోషల్‌ మీడియా ద్వారా స్పందిస్తూ... ఇంద్ర క్రియేట్‌ చేసిన సునామీ కి 22 ఏళ్లు. ఇన్ని సంవత్సరాలు అయినా కూడా థియేటర్ లో రీ రిలీజ్ అయ్యి భారీ విజయాన్ని సొంతం చేసుకోవడం చాలా సంతోషంగా ఉంది. మరోసారి ఇంద్ర సినిమా థియేటర్‌ లో రిలీజ్ అయిన సందర్భంగా నా ఆప్తులకు ఈ చిరు సత్కారం అంటూ ఫోటోలను షేర్‌ చేయడం జరిగింది. చిరంజీవి సత్కారంకు సంబంధించిన ఫోటోలు వైరల్‌ అవుతున్నాయి.

చిరంజీవి ప్రస్తుతం విశ్వంభర సినిమాలో నటిస్తున్నాడు. బింబిసార సినిమా తో సూపర్‌ హిట్ ను సొంతం చేసుకున్న దర్శకుడు వశిష్ట దర్శకత్వంలో విశ్వంభర సినిమా రూపొందుతోంది. ఈ సినిమా ను యూవీ క్రియేషన్స్ బ్యానర్‌ లో వంశీ ప్రమోద్ లు నిర్మిస్తున్నారు. త్రిష హీరోయిన్‌ గా నటిస్తోంది. చాలా సంవత్సరాల తర్వాత చిరంజీవి సోషియో ఫాంటసీ కథాంశంతో ప్రేక్షకుల ముందుకు రాబోతున్నాడు. అన్ని వర్గాల వారిని ఆకట్టుకునే విభిన్నమైన కమర్షియల్‌ సినిమాగా విశ్వంభర ఉంటుందని యూనిట్‌ సభ్యులు చెబుతున్నారు.