'అయ‌లాన్` ఈ హాలీవుడ్ ఏలియ‌న్ మూవీకి కాపీ?

చాలా బాలీవుడ్ సినిమాల‌ను హాలీవుడ్ నుంచి స్ఫూర్తి పొంది తెర‌కెక్కించారు. సౌత్ లోను కొన్ని సినిమాల‌కు హాలీవుడ్ స్ఫూర్తి ఉంది. ఇప్పుడు అదే తీరుగా త‌మిళ సినిమా అయ‌లాన్ కి హాలీవుడ్ స్ఫూర్తి ఉంద‌ని క‌థ‌నాలొస్తున్నాయి. శివకార్తికేయన్ నటించిన `అయలాన్` జనవరి 12న గ్రాండ్ థియేటర్లలో విడుదల కానుంది. సైన్స్ ఫిక్షన్ క‌థాంశంతో రూపొందించిన ఈ చిత్రం పలు భాషల్లో విడుదలకు సిద్ధ‌మ‌వుతోంది. కొన్ని రోజుల క్రితం `అయలాన్` ట్రైలర్‌ను మేకర్స్ ఆవిష్కరించారు. ట్రైల‌ర్ ఈ చిత్రానికి బజ్‌ను పెంచింది. ఇదిలా ఉంటే 2011లో హాలీవుడ్‌లో విడుదలైన `పాల్‌` సినిమాని పోలి ఉండటంతో అయలాన్ ట్రైలర్ సోషల్ మీడియాలో చర్చనీయాంశంగా మారింది.

పాల్ ఒక గ్రహాంతర వాసి గురించిన క‌థాంశం. అతడు(ఏలియన్) దారి తప్పి భూమిపైకి వస్తాడు. ఇద్దరు స్నేహితులు ఆ జీవిపై పరిశోధన చేయాలనుకునే శాస్త్రవేత్తల నుండి దానిని రక్షించడానికి ప్రయత్నిస్తారు. `అయలాన్` ట్రైలర్ చూశాక ఇంచుమించు ఇదే రకమైన కథలా కనిపించింది. ఇది సోషల్ మీడియాలో తమిళ - హాలీవుడ్ చిత్రాల మధ్య పోలికను చూడ‌టానికి కార‌ణ‌మైంది. పలువురు నెటిజనులు శివకార్తికేయన్ నటించిన చిత్రం `పాల్` నుండి ప్రేరణ పొందిందని పేర్కొన్నారు. అయితే ఇందులో నిజమెంతో తెలియాలంటే మరికొద్ది రోజులు ఆగాల్సిందే. ఫ్యాన్స్ థియరీలను బ్రేక్ చేసేలా క‌థాంశం ఉంటుందా లేదా? అన్నది వేచి చూడాల్సిందే.

రవికుమార్ దర్శకత్వం వహించిన `అయాళన్`లో శివకార్తికేయన్ ప్రధాన పాత్రలో న‌టించాడు. రకుల్ ప్రీత్ సింగ్, ఇషా కొప్పికర్, యోగి బాబు, కరుణాకరన్, బాను ప్రియ, బాల శరవణన్, శరద్ కేల్కర్ కీలక పాత్రలు పోషించారు. ఎ.ఆర్. రెహమాన్ సంగీతం అందించగా ఈ చిత్రానికి సిబిఎఫ్‌సి `యు` సర్టిఫికేట్ ఇచ్చింది. `అయలాన్` నిర్మాతలు చిత్ర నిర్మాణం కోసం 4 సంవత్సరాల కంటే ఎక్కువ సమయం తీసుకున్నారు. ఇందులో 4500 VFX ఫ్రేమ్‌లు ఉన్నాయి. ఎందుకంటే ఇందులో హాస్యభరితమైన గ్రహాంతరవాసి పాత్ర ఒక ముఖ్యమైన పాత్రను పోషించింది. గ్ర‌హాంత‌ర వాసితో రైతు శివ‌కార్తికేయ‌న్ స్నేహం అనంత‌రం ఏం జ‌రిగింద‌నేదే ఈ సినిమా.