120 ఫ్లాపుల న‌టుడు ఖాన్‌ల కంటే బిజీ

డ‌జ‌ను రెండు డ‌జ‌న్లు కాదు.. ఈ న‌టుడు ఏకంగా 120 ఫ్లాపుల్లో న‌టించాడు. ఇందులో 51 ఫ్లాప్‌లు, 69 డిజాస్టర్ లు ఉన్నాయి. అయినా ఇప్ప‌టికీ అత‌డు బిజీ ఆర్టిస్ట్. బాలీవుడ్ లో చాలామంది పెద్ద స్టార్ల‌కు ధీటుగా సినిమాలు చేస్తున్నాడు. ఇటీవ‌ల ఒకే సీజ‌న్ లో విడుద‌లైన బేబి జాన్, సింగం ఎగైన్ లో విల‌న్ పాత్ర‌లు పోషించాడు. ఇంత‌కీ ఎవ‌రా న‌టుడు? అంటే.. ఎయిటీస్ క్లాసిక్ స్టార్ పార్టీల‌లో సౌత్ స్టార్ల‌తో క‌లిసి చ‌నువుగా క‌నిపించే అత‌డు మ‌రెవ‌రో కాదు.. జాకీ ష్రాఫ్.

67 సంవత్సరాల వయస్సులో జాకీ ష్రాఫ్ ఇంకా విల‌న్ గా న‌టిస్తూనే ఉన్నాడు. 2024లో అత‌డు రెండు భారీ చిత్రాలలో నటించాడు. అజయ్ దేవ్‌గన్ `సింగం అగైన్`, వరుణ్ ధావన్ `బేబీ జాన్‌`లో విలన్‌గా కనిపించాడు. దురదృష్టవశాత్తు ఈ రెండు చిత్రాలు బాక్సాఫీస్ వద్ద ఫ్లాపుల‌య్యాయి. అత‌డి ఫ్లాపుల రికార్డ్ పెరుగుతూనే ఉన్నా కానీ, జ‌యాప‌జ‌యాల‌తో సంబంధం లేకుండా ష్రాఫ్ అవ‌కాశాలు అందుకుంటున్నాడు.

అత‌డు ఇప్పటికీ అమీర్ ఖాన్, హృతిక్ రోషన్, రణబీర్ కపూర్‌లతో పోటీ పడుతున్నారు. నాలుగు దశాబ్దాలకు పైగా బాలీవుడ్‌లో దిగ్గజ న‌టుడిగా కొన‌సాగిన‌ జాకీ ష్రాఫ్ త‌న స్థాయికి త‌గ్గ అవ‌కాశాల‌తో ఎప్పుడూ బిజీగా ఉన్నారు. ష్రాఫ్ ఇప్ప‌టికి 172 చిత్రాలలో న‌టించాడు. వీటిలో 51 ఫ్లాప్‌లు, 69 డిజాస్టర్‌లు ఉన్నాయి. `హిట్ కౌంట్ యాక్టర్ ఆల్ టైమ్` జాబితాలో ష్రాఫ్ 8వ స్థానంలో ఉన్నాడు. 2 ఆల్-టైమ్ బ్లాక్‌బస్టర్‌లు, 3 బ్లాక్‌బస్టర్‌లు, 1 సూపర్‌హిట్, 7 హిట్‌లు, 4 సెమీ-హిట్‌లు, 3 యావరేజ్ సినిమాలతో అతడికి మొత్తం 20 పాయింట్లు ద‌క్కాయి. కెరీర్‌లో 120 ఫ్లాపులున్నా అత‌డే ది బెస్ట్.

ఆశ్చ‌ర్య‌క‌రంగా ఈ ర్యాంకింగ్‌లో ప‌లువురు ప్రముఖ నటులు జాకీ ష్రాఫ్ కంటే వెనుకబడి ఉన్నారు. సినిమాల ప‌రంగా జ‌యాప‌జ‌యాల‌ లెక్కింపుల విషయానికి వస్తే.. అమీర్ ఖాన్, హృతిక్ రోషన్, రణబీర్ కపూర్ సైతం జాకీ ష్రాఫ్‌ కంటే వెనుకబడి ఉన్నారు. అమీర్ ఖాన్ 5 ఆల్-టైమ్ బ్లాక్‌బస్టర్‌లు, 2 బ్లాక్‌బస్టర్‌లు, 3 సూపర్‌హిట్‌లు, 4 హిట్‌లు, 1 సెమీ-హిట్ , 3 యావరేజ్ చిత్రాలతో 10వ స్థానంలో ఉన్నారు. మొత్తం 18 పాయింట్లు అత‌డికి ద‌క్క‌గా, జాకీ కంటే 2 పాయింట్లు తక్కువ. హృతిక్ రోషన్ 1 సూపర్ బ్లాక్ బస్టర్, 5 బ్లాక్ బస్టర్లు, 2 సూపర్ హిట్లు, 2 హిట్లు, 3 సెమీ-హిట్లు , 1 యావరేజ్ సినిమాతో 16వ స్థానంలో నిలిచాడు. జాకీ కంటే 8 పాయింట్లు వెనుకబడి 14 పాయింట్లు సాధించాడు. రణబీర్ కపూర్ 1 సూపర్ బ్లాక్ బస్టర్, 1 బ్లాక్ బస్టర్, 3 సూపర్ హిట్లు, 1 హిట్, 3 సెమీ-హిట్లు, 1 యావరేజ్ తో 23వ స్థానంలో ఉన్నాడు. కేవ‌లం 10 పాయింట్లతో జాకీ కంటే 15 పాయింట్లు వెనుకబడి ఉన్నాడు.