స‌లార్ -2 రిలీజ్ అయ్యేది మూడేళ్ల త‌ర్వాతేనా?

`స‌లార్-2` శౌర్యంగ ప‌ర్వం రిలీజ్ అవ్వ‌డానికి ఎలా లేద‌న్నా మూడేళ్లు స‌మ‌యం ప‌డుతుందా? 2028లోనే ఆసినిమా రిలీజ్ కి అవ‌కాశం ఉందా? అంటే స‌న్నివేశం అలాగే క‌నిపిస్తోంది. `స‌లార్ సీజ్ ఫైర్` భారీ విజ‌యం సాధించినా క‌థ‌లో చాలా ప్ర‌శ్న‌ల‌కు ప్ర‌శాంత్ నీల్ స‌లార్ 2లో సమాధానం చెప్పాల్సి ఉంది. అదీ ఎంతో క్లారిటీ ఉండాలి. `సీజ్ ఫైర్` రిలీజ్ అనంత‌రం సినిమా అర్దం కాలేదు అనే విమ‌ర్శ ప్ర‌ధానంగా తెర‌పైకి వ‌చ్చింది.

యాక్ష‌న్ స‌న్నివేశాల‌తో అలా స‌క్సెస్ లోకి వెళ్లింది కానీ..క‌థ ఏంటి? పాత్ర‌ల మ‌ధ్య రిలేష‌న్ షిప్ ఏంటి? అన్న‌ది అర్దం కాని ప్ర‌శ్న‌గానే చాలా మందిలో మిగిలిపోయింది. వాట‌న్నింటికి రెండ‌వ భాగంలో విపులంగా వివ‌రించాలి. క‌థ‌, పాత్ర‌ల‌తో పాటు శౌర్యంగ ప‌ర్వం అనే కొత్త వ‌ర‌ల్డ్ లోకి ప్రేక్ష‌కుల్ని తీసుకెళ్లాలి. రెండ‌వ భాగంతో ముగింపు ప‌లుకుతాడా? లేక కంటున్యూటీ ఉంటుందా? అన్న‌ది త‌ర్వాత సంగ‌తి కానీ శౌర్యంగ ప‌ర్వం విష‌యంలో మాత్రం సీజ్ ఫైర్ లో దొర్లిన త‌ప్పిదాలు దొర్లితే మాత్రం ఫ‌లితం మరోలా ఉంటుంద‌నే విమ‌ర్శ వ్య‌క్త‌మ‌వుతుంది.

ఎందుకంటే `స‌లార్` స‌క్సెస్ విష‌యాలో తానే సంతృప్తిగా లేన‌ని ప్ర‌శాంత్ నీల్ ఓపెన్ అయిన సంగ‌తి తెలిసిందే. రిజ‌ల్ట్ విష‌యంలో తాను అనుకుంది వేర‌ని....కానీ ఫ‌లితం మ‌రోలా వ‌చ్చింద‌నే నిరుత్సాహన్ని వ్య‌క్తం చేసారు. దీంతో ఆ లెక్క‌లు అన్నింటిని `స‌లార్ 2` తో బ్యాలెన్స్ చేయాలి. ప్ర‌శాంత్ నీల్ కూడా అంతే క‌సిగా ఉన్నాడు. అయితే రెండవ భాగం రిలీజ్ అవ్వ‌డానికి మూడేళ్లు అయినా స‌మ‌యం ప‌డుతుందంటున్నారు.

ప్ర‌స్తుతం ప్ర‌శాంత్ నీల్ యంగ్ టైగ‌ర్ ఎన్టీఆర్ తో ఓ చిత్రాన్ని చేస్తున్నాడు. ఇది వేగంగా పూర్తి చేస్తే ఏడాదిలో రిలీజ్ అవ్వాలి. ఆ లెక్క‌లోనే 2026 సంక్రాంతికి రిలీజ్ చేస్తామ‌ని ప్ర‌క‌టించారు. కానీ అదంత ఈజీ కాదు. ప్ర‌శాంత్ నీల్ గ‌త చిత్రాలేవి అనుకున్న టైమ్ లో రిలీజ్ కాలేదు. అనుకున్న టైమ్ లో చిత్రీక‌ర‌ణ పూర్తి కాక‌పోవ‌డంతో రిలీజ్ లు వాయిదా ప‌డ్డాయి. తార‌క్ సినిమా విష‌యంలోనూ అదే రిపీట్ అవ్వ‌డానికి అవ‌కాశం ఉందంటున్నారు.

ఆ సినిమా రిలీజ్ కి ఎలా లేద‌న్నా ఏడాదిన్న‌ర స‌మ‌యం ప‌ట్టే అవ‌కాశం ఉందంటున్నారు. ఆ లెక్క‌లో చూస్తే సినిమా 2026 మిడ్ లేదా ఏడాది చివ‌ర్లో ప్రేక్ష‌కుల ముందుకొస్తుంది. ఆ త‌ర్వాత వెంట‌నే `స‌లార్ -2` మొద‌లు పెడితే 2028 క‌ల్లా దాన్ని రిలీజ్ చేసే అవ‌కాశం ఉంటుంది. అదీ అతి క‌ష్టం మీద‌. రెండు పాన్ ఇండియా ప్రాజెక్ట్ లు...భారీ కాన్వాస్ పై చేసే చిత్రాలు కాబ‌ట్టి రిలీజ్ అన్న‌ది అంత ఈజీ కాదు. రెండేళ్ల‌లో రిలీజ్ చేయ‌గ‌ల్గితే గ్రేట్ అనే చెప్పాలి.