15 ఏళ్ల కష్టానికి గుర్తింపు ఇది..!

ఫలితం ఆశించకుండా కష్టపడుతూ వెళ్తే ఏదో ఒకరోజు దానికి రెట్టింపు ఫలితం వస్తుందని అందరు చెబుతుంటారు. ఐతే సినీ పరిశ్రమలో అయితే ఇలాంటి వాటికి చాలా మంది ఉదహరణగా ఉంటారు. నటుడిగా ఎలా పరిచయమైనా తమలో ప్రతిభని గుర్తించి సీరియస్ గా ప్రయత్నాలు చేస్తున్న తరుణంలో అనుకోని అవాంతరాలు ఎన్నొచ్చినా సరే వాటిని దాటుకుని సక్సెస్ అవ్వడం చాలా కష్టం. అలాంటి సక్సెస్ కోసం ఏకంగా 15 ఏళ్లు కష్టపడ్డాడు బాలీవుడ్ నటుడు జైదీప్ అహ్లావత్. కొంతమందిని చూసి ఇతన్ని ఎక్కడో చూశామన్న భావన వస్తుంది. చాలా సినిమాల్లో కనిపిస్తారు కానీ వాళ్లకి తగిన గుర్తింపు రాదు.

అలాంటి వారిలో జైదీప్ ఒకరు. 2010 లోనే ఆయన ఆక్రోష్, కట్టా మీటా సినిమాల్లో నటించారు. అప్పటి నుంచి సినిమాల్లో ఎలాంటి రోల్స్ వచ్చినా చేస్తూ వచ్చారు. ఈ క్రమంలో రాక్ స్టార్, గ్యాంగ్స్ ఆఫ్ వసేపూర్, కమాండో, రాయిస్, బాగి 3, జానే జాన్ సినిమాల్లో నటించాడు. కమల్ హాసన్ నటించి డైరెక్ట్ చేసిన విశ్వరూపం రెండు భాగాల్లో కూడా జైదీప్ నటించారు. లాస్ట్ ఇయర్ అమీర్ ఖాన్ తనయుడు చేసిన మహారాజ్ సినిమాలో కూడా నటించి మెప్పించారు జైదీప్.

ఐతే సిల్వర్ స్క్రీన్ పై ఎంత కష్టపడినా రాని గుర్తింపు వెబ్ సీరీస్ లతో వచ్చింది. కెరీర్ మొదట్లో అప్ నిషద్ గంగా సీరీస్ చేసిన జైదీప్ 2019 లో బార్డ్ ఆఫ్ బ్లడ్. 2020 నుంచి ఇప్పటివరకు పాతాల్ లోక్, బ్లడీ బ్రాదర్స్, ది బ్రోకెన్ న్యూస్ లో కూడా నటించారు జైదీప్. ఐతే పాతాల్ లోక్ రెండు సీరీస్ లతో ఆయనకు మంచి పేరు వచ్చింది. ఈ సీరీస్ లో ఆయన గురించి అందరు డిస్కస్ చేసుకునేలా చేసింది.

పాతాల్ లోక్ సీరీస్ తో జైదీప్ స్టార్ మెటీరియల్ అయ్యాడు. టాలెంట్ ఉన్న వారికి సక్సెస్ అనేది ఏదో ఒక రూపం లో వస్తుంది అన్నట్టుగా వెబ్ సీరీస్ లతో జైదీప్ సూపర్ హిట్ అందుకుంటున్నారు. తన మార్క్ నటనతో వెబ్ సీరీస్ లతో మెప్పిస్తున్న ఆయన ఇక మీదట సిల్వర్ స్క్రీన్ మీద కూడా గుర్తింపు ఉన్న పాత్రలే చేసే ఛాన్స్ ఉందని చెప్పొచ్చు.