జాన్వీ కపూర్ హైదరాబాద్‌లోని మధురానగర్‌ హనుమాన్‌ ఆలయంలో ప్రత్యేక పూజ కారణం ఏంటో?
జాన్వీ కపూర్ ఇలాంటి విజయం కోసం గత నాలుగు అయిదు సంవత్సరాలు తీవ్రంగా ప్రయత్నాలు చేస్తూ వస్తోంది.
అతిలోక సుందరి శ్రీదేవి నట వారసురాలు జాన్వీ కపూర్ ఎంట్రీ కోసం తెలుగు ప్రేక్షకులు గత మూడు నాలుగు సంవత్సరాలుగా ఎంతో ఆసక్తిగా ఎదురు చూశారు. ఎట్టకేలకు జాన్వీ కపూర్ తెలుగు ప్రేక్షకుల ముందుకు 'దేవర' సినిమాతో ప్రేక్షకుల ముందుకు వచ్చింది. అది కూడా ఎన్టీఆర్‌ వంటి స్టార్ హీరోకు జోడీగా నటించడంతో పాటు, బిగ్గెస్ట్ బ్లాక్‌ బస్టర్‌ విజయాన్ని సొంతం చేసుకుంది. జాన్వీ కపూర్ ఇలాంటి విజయం కోసం గత నాలుగు అయిదు సంవత్సరాలు తీవ్రంగా ప్రయత్నాలు చేస్తూ వస్తోంది. బాలీవుడ్‌లో ఆమెకు ఒక్క హిట్‌ సొంతం అవ్వక పోవడంతో ఐరెన్‌ లెగ్ అనే ముద్రను సైతం కొందరు వేసే ప్రయత్నం చేయడం జరిగింది.
దేవర సినిమా సూపర్ హిట్‌ అవ్వడంతో పాటు జాన్వీ కపూర్ కి తెలుగులో మరో సినిమా ఛాన్స్‌ గా రామ్‌ చరణ్ కి జోడీగా నటించే అవకాశం దక్కిన విషయం తెల్సిందే. ఉప్పెన చిత్ర దర్శకుడు బుచ్చిబాబు దర్శకత్వంలో రామ్‌ చరణ్ హీరోగా రూపొందుతున్న స్పోర్ట్స్ డ్రామాలో జాన్వీ కపూర్ పల్లెటూరు అమ్మాయి పాత్రలో కనిపించబోతుంది. ఇప్పటికే లుక్ టెస్ట్‌ పూర్తి అయింది. కాస్త అటు ఇటుగా దేవర సినిమాలో ఎలా అయితే కనిపించిందో అలాగే చరణ్ మూవీలోనూ కనిపించబోతుంది. ఇక జాన్వీ కపూర్ కి భక్తి కాస్త ఎక్కువ అనే విషయం తెల్సిందే. తరచు తిరుమల తిరుపతి చేరుకుని శ్రీవారిని దర్శించుకోవడం, కాలి నడకన వెళ్లడం వంటివి చూస్తూనే ఉంటాం.
సాంప్రదాయంతో పాటు భక్తి ఎక్కువ అంటూ జాన్వీ కపూర్ గురించి తెలిసిన వారు దాదాపు అంతా అంటూ ఉంటారు. తల్లి శ్రీదేవి మాదిరిగానే జాన్వీ కపూర్ కి భక్తి ఎక్కువ అని ఇప్పటికే పలు సందర్భాల్లో నిరూపితం అయ్యింది. తాజాగా మరోసారి జాన్వీ కపూర్ భక్తి గురించిన చర్చ జరిగింది. హైదరాబాద్‌లోని మధురానగర్‌ హనుమాన్‌ ఆలయంలో జాన్వీ కపూర్ ప్రత్యేక పూజలు నిర్వహించారు. శివ లింగంకు అభిషేకం నిర్వహించడంతో పాటు జాన్వీ కపూర్ పలు పూజా కార్యక్రమాల్లో పాల్గొని శ్రద్దాసక్తులు కనబర్చుతూ తన భక్తిని చాటుకున్నారు. హీరోయిన్స్‌లో మరీ ఇంత భక్తి జాన్వీకి మాత్రమే అని పలువురు కామెంట్స్ చేస్తున్నారు.
జాన్వీ కపూర్ సోషల్‌ మీడియాలో రెగ్యులర్‌గా అందమైన ఫోటో షూట్స్ ను షేర్‌ చేయడం ద్వారా వైరల్‌ అవుతూ ఉంటుంది. అదే విధంగా తన భక్తి, దైవ దర్శనాలకు సంబంధించిన విషయాలతోనూ జాన్వీ కపూర్ ఇలా అప్పుడప్పుడు సోషల్‌ మీడియాలో వైరల్‌ అవ్వడం మనం చూస్తూ ఉంటాం. ఎంతటి స్టార్ అయినా ఇలా భక్తిని కనబర్చడం మంచి పద్దతి అంటూ కొందరు అభిప్రాయం వ్యక్తం చేస్తూ ఉంటే.. ఉన్నట్లుండి హైదరాబాద్‌లోని దేవాలయాల్లో ప్రత్యేక పూజలు చేయించుకోవడం వెనుక కారణం ఏంటో అంటూ అనుమానాలు వ్యక్తం అవుతున్నాయి. చాలా కాలంగా వెయిట్‌ చేస్తున్న సక్సెస్ దక్కడం వల్ల ఈ పూజలు చేశారా అని కూడా కొందరు ప్రశ్నిస్తున్నారు. ఏది ఏమైనా జాన్వీ కపూర్ పూజ చేస్తున్న ఫోటోలు నెట్టింట అందరి దృష్టిని ఆకర్షిస్తున్నాయి.