కస్సుమన్న కాజల్ అగర్వాల్ !

‘హిందీ, దక్షిణాది ఇండస్ట్రీ మధ్య చాలా తేడా ఉంటుంది. దక్షిణాదిలో పెళ్లయిన హీరోయిన్స్‌కు అవకాశాలు తక్కువ. బాగా లేరని పక్కన పెట్టేస్తారు. అదే హిందీలో పెళ్లయినా అవకాశాలు వస్తుంటాయి. షర్మిళా ఠాకుర్, హేమమాలిని మొదలుకొని.. ఐశ్వర్య రాయ్, దీపికా పదుకొణె, ఆలియా భట్, కియారా అద్వానీ లాంటి వాళ్లకు హీరోయిన్లుగా అవకాశాలు వస్తున్నాయి. కానీ దక్షిణాదిలో ఆ పరిస్థితి లేదు. నయనతార ఇందుకు అతీతం. దక్షిణాదిలో ఉన్న ఈ పరిస్థితిని త్వరలో మారుద్దాం’ అంటూ ప్రముఖ నటి కాజల్ అగర్వాల్ దక్షిణాది సినీ పరిశ్రమపై సంచలన వ్యాఖ్యలు చేసింది.

సుమన్‌ చిక్కాల దర్శకత్వంలో కాజల్‌ అగర్వాల్ ప్రధాన పాత్రలో ‘సత్యభామ’ సినిమా తెరకెక్కింది.

ఈ సినిమాను బాబీ తిక్క, శ్రీనివాసరావు తక్కలపల్లి సంయుక్తంగా నిర్మించగా.. శశికిరణ్‌ తిక్క సమర్పిస్తున్నారు. ఇందులో నవీన్‌చంద్ర, ప్రకాష్ రాజ్, నాగినీడు, హర్షవర్ధన్, రవివర్మ, అమరేందర్‌ కీలక పాత్రలు పోషించారు. సత్యభామ చిత్రం జాన్‌ 7న ప్రేక్షకుల ముందుకురానుంది. ఈ నేపథ్యంలోనే ఓ ఇంటర్వ్యూలో దక్షిణాది చిత్ర పరిశ్రమపై కాజల్ ఈ సంచలన వ్యాఖ్యలు చేశారు.