రష్మిక, శ్రీలీల తర్వాత ఆమెనా?

కన్నడ సినీ పరిశ్రమకు చెందిన రష్మిక మందన్నా ఛలో సినిమా తో టాలీవుడ్ లో అడుగు పెట్టి ప్రస్తుతం స్టార్‌ హీరోయిన్ గా, నేషనల్ క్రష్ గా పాన్ ఇండియా రేంజ్ లో దూసుకుపోతున్న విషయం తెల్సిందే. పుష్ప 2 సినిమాలో నటిస్తున్న రష్మిక మందన్నా సౌత్ లో అత్యధిక పారితోషికం తీసుకుంటున్న హీరోయిన్స్ జాబితాలో ముందు వరుసలో ఉంటుంది అనడంలో సందేహం లేదు.

రష్మిక మందన్నా తర్వాత కన్నడ నుంచి దిగుమతి అయిన మరో ముద్దుగుమ్మ శ్రీలీల. ఈ అమ్మడు తెలుగు లో పెళ్లి సందడి సినిమా తో ఎంట్రీ ఇచ్చింది. మొదటి సినిమా తో బాక్సాఫీస్ వద్ద నిరాశ పరిచింది. అయినా కూడా అదృష్టం కొద్ది ఆఫర్లు దక్కాయి. వరుసగా ప్రస్తుతం శ్రీలీల సినిమాలు చేస్తూ దూసుకు పోతుంది.

టాలీవుడ్ లో ప్రస్తుతం శ్రీలీల చేస్తున్న సినిమాల జాబితా ఇండియాలో మరే హీరోయిన్‌ కూడా చేయడం లేదు అంటే అతిశయోక్తి కాదు. అంతగా ఈ కన్నడ ముద్దుగుమ్మలు ఇద్దరు కూడా టాలీవుడ్‌ లో దూసుకు పోతున్నారు. వీరిద్దరి తర్వాత మళ్లీ ఆ స్థాయి స్టార్‌ డమ్‌ ను దక్కించుకోగల సత్తా ఉన్న కన్నడ హీరోయిన్‌ రుక్మిణి అంటూ కొందరు నమ్మకంగా బల్లగుద్ది మరీ చెబుతున్నారు.

బెంగళూరు అమ్మాయి అయినా కూడా లండన్‌ లో యాక్టింగ్‌ లో శిక్షణ తీసుకుని నటన ప్రారంభించింది. ఇప్పటికే కన్నడం లో నోటెడ్‌ హీరోయిన్ గా గుర్తింపు దక్కించుకుంది. తాజాగా సప్త సాగరాలు దాటి అనే కన్నడ సినిమా తో తెలుగు ప్రేక్షకులను మెప్పించింది. తెలుగు లో సినిమా పెద్దగా కమర్షియల్‌ విజయాన్ని సొంతం చేసుకోకున్నా కూడా హీరోయిన్‌ రుక్మిణి కి మంచి పాపులారిటీ లభించింది.

ప్రస్తుతం రుక్మిణి గురించి కన్నడ మీడియాతో పాటు తెలుగు మీడియా లో ప్రధానంగా చర్చ జరుగుతోంది. ముందు ముందు తెలుగు లో ఈమె స్టార్‌ హీరోలకు మోస్ట్‌ వాంటెడ్‌ గా మారే అవకాశాలు ఉన్నాయి అన్నట్లుగా టాక్ వినిపిస్తుంది. మరి రష్మిక, శ్రీ లీల రేంజ్ లో రుక్మిణి ని టాలీవుడ్‌ ప్రేక్షకులు ఆధరిస్తారా.. ఆఫర్లు వస్తాయా అనేది చూడాలి.