కన్నప్ప.. ఆ పవర్ఫుల్ క్యారెక్టర్ వచ్చేది ఎప్పుడంటే..

టాలీవుడ్‌లో హీరో మంచు విష్ణు కెరీర్ లోనే అత్యంత ప్రతిష్టాత్మకంగా రూపొందుతున్న కన్నప్పపై అంచనాలు గట్టిగానే ఉన్నాయి. ఈ సినిమా పాన్ ఇండియా స్థాయిలో భారీ అంచనాలతో రూపొందుతోంది. ప్రముఖ బాలీవుడ్ ఫిల్మ్ మేకర్ ముఖేశ్ కుమార్ దర్శకత్వం వహిస్తున్న ఈ సినిమాను, మోహన్ బాబు భారీ బడ్జెట్ తో నిర్మిస్తున్నారు. అవా ఎంటర్‌టైన్మెంట్స్, 24 ఫ్రేమ్స్ ఫ్యాక్టరీ బ్యానర్లపై ఈ చిత్రం దాదాపు 100 కోట్ల బడ్జెట్‌తో తెరకెక్కుతోందని సమాచారం.

ఇక కథ, నటీనటుల ఎంపిక మొదలుకొని ప్రతి అంశం సినిమాపై ఆసక్తిని మరింత పెంచుతోంది. సినిమాలో కన్నప్పగా మంచు విష్ణు ప్రధాన పాత్రలో కనిపించనుండగా, ప్రభాస్ నందీశ్వరుడిగా కొద్దిసేపు కనిపించనున్నాడు. బాలీవుడ్ ప్రముఖ నటుడు అక్షయ్ కుమార్ శివుడి క్యారెక్టర్ తో సర్ ప్రైజ్ ఇవ్వనున్నాడు. ఇక మోహన్ బాబు మహాదేవ శాస్త్రిగా కీలక పాత్రలో కనిపించనున్నారు.

అలాగే ప్రభాస్, మోహన్ లాల్, కాజల్ అగర్వాల్, బ్రహ్మానందం, శరత్ కుమార్, మధుబాల వంటి తారాగణం ఈ చిత్రంలో ప్రత్యేక ఆకర్షణగా నిలవనుంది. వీరితో పాటు దేవరాజ్, ముఖేష్ రిషి, మంచు అవ్రామ్, అర్పిత్ రాంకా వంటి ప్రముఖులు కూడా ఇందులో నటిస్తున్నారు. ఈ విభిన్న తారాగణం సినిమాపై ఆసక్తిని మరింతగా పెంచుతోంది.

ఇప్పటికే కన్నప్ప నుండి విడుదలైన పోస్టర్లు ప్రేక్షకుల అంచనాలను ఆకాశానికి ఎత్తాయి. తాజాగా, మంచు విష్ణు మరో పవర్ఫుల్ అప్‌డేట్‌తో వచ్చారు. ఇందులో మోహన్ బాబు మహాదేవ శాస్త్రి పాత్రలో కనిపించబోతున్నారని ప్రకటించారు. ఈ అప్‌డేట్‌తో పాటు మోహన్ బాబు లుక్‌ను విడుదల చేయడం ప్రేక్షకుల్లో భారీ హైప్ క్రియేట్ చేసింది. ఈ లుక్‌లో మూడు నామాలు, కుంకుమ బొట్టు ఉన్న హాఫ్ లుక్ తో ఆయన పాత్ర ప్రత్యేకతను వెల్లడిస్తుంది.

కానీ పూర్తి ముఖాన్ని మాత్రం రివీల్ చేయలేదు, ఇది నవంబర్ 22న విడుదల కానున్న ఫుల్ పోస్టర్‌పై ఆసక్తిని పెంచింది. మహాదేవ శాస్త్రి పాత్ర సినిమా కథకు కీలకమని, అది ప్రేక్షకుల మదిలో ఎప్పటికీ నిలిచిపోతుందని చిత్రబృందం చెప్పింది. ప్రస్తుత పరిస్థితుల్లో కన్నప్ప సినిమా షూటింగ్ శరవేగంగా కొనసాగుతోంది. ఈ సినిమా పూరాణాల్లో ప్రసిద్ధి చెందిన కన్నప్ప భక్తుడి జీవితాన్ని ఆధారంగా తెరకెక్కుతున్న విషయం తెలిసిందే. నేటి ప్రేక్షకులకు హై విజువల్స్ తో సరికొత్తగా చూపించనున్నారు.

మంచు విష్ణు షేర్ చేసిన ఈ పోస్టర్ ఇప్పుడు సోషల్ మీడియాలో వైరల్ అవుతోంది. ఈ సినిమాతో మనకు కొత్త కథనాన్ని చూపించనున్న మోహన్ బాబు మహాదేవ శాస్త్రి పాత్రలో ప్రేక్షకులను మెప్పించనుండటం ఖాయం అని చిత్ర యూనిట్ చెబుతోంది. ఇక సినిమాను డిసెంబర్ లోనే విడుదల చేయాలని అనుకున్నారు. కానీ కొన్ని కారణాల వలన విడుదల చేయలేకపోతున్నట్లు మంచు విష్ణు క్లారిటీ ఇచ్చారు. సమ్మర్ లోనే సినిమా విడుదల కానున్నట్లు తెలుస్తోంది.