ప్రభాస్ లుక్ లీక్.. చేసిందో ఎవరో కనిపెట్టిన కన్నప్ప టీమ్!

టాలీవుడ్ హీరో మంచు విష్ణు లీడ్ రోల్ లో తెరకెక్కుతున్న ఫాంటసీ డ్రామా కన్పప్పలోని పాన్ ఇండియా స్టార్ ప్రభాస్ లుక్ లీక్ రీసెంట్ గా లీక్ అయిన విషయం తెలిసిందే. ఎంతో ప్రతిష్ఠాత్మకంగా ముకేష్ కుమార్ తెరకెక్కిస్తున్న ఆ సినిమాలో ప్రభాస్ క్యామియో రోల్ పోషిస్తున్నారు. ఇప్పటికే టీజర్ లో ఆయన కళ్లని చూపించి మేకర్స్ హైప్ క్రియేట్ చేయగా.. శనివారం ఉదయం సోషల్ మీడియాలో ప్రభాస్ రోల్ కు సంబంధించిన లుక్ దర్శనమిచ్చింది.

దీంతో ప్రభాస్ లుక్ ను చూసి ఖుషీ అయిన నెటిజన్లు అనేక మంది షేర్ చేశారు. మరికొందరు మాత్రం ఇలా లుక్ ను లీక్ చేయడం కరెక్ట్ కాదని ఫైరయ్యారు. లీక్ రాయుళ్లపై మండిపడ్డారు. అదే సమయంలో కన్నప్ప మూవీ టీమ్ కూడా స్పందించింది. ఫోటో బయటకు ఎలా వెళ్లిందనే విషయంపై పోలీస్‌ కేసు పెట్టామని తెలిపింది. ఎవరూ షేర్‌ చేయొద్దని కోరింది. షేర్‌ చేసిన వారు చట్టపరమైన చర్యలు ఎదుర్కోవాల్సి ఉంటుందని కూడా హెచ్చరించింది.

ప్రభాస్ లుక్ లీక్‌ చేసిన వ్యక్తిని కనిపెట్టినవారికి రూ.5 లక్షల బహుమానం ఇస్తామని తెలిపింది. అందరూ సహకరించాలని కోరింది. ఆ విషయంపై మళ్లీ రీసెంట్ గా కన్నప్ప టీమ్ సోషల్ మీడియాలో స్పందించింది. ప్రభాస్ లుక్ ను లీక్ చేసిన వారిని గుర్తించామని తెలిపింది. వినయ్ బొడ్డు అనే వ్యక్తితో పాటు అతడి టీమ్ లుక్ ను లీక్ చేసిందని వెల్లడించింది. ఇలాంటి ఛాలెంజ్ లో మద్దతు తెలిపిన వారికి కృతజ్ఞతలు తెలియజేసింది.

"మీ అప్రమత్తత, నిబద్ధతకు ధన్యవాదాలు. కన్నప్ప నుంచి ప్రభాస్ లుక్‌ లీక్ అవ్వడానికి కారణమైన వ్యక్తిని గుర్తించామని తెలియజేయడానికి సంతోషిస్తున్నాం. దర్యాప్తు చేపట్టిన తర్వాత ఆ వ్యక్తి తన చర్యలకు క్షమాపణలు చెప్పాడు. ప్రస్తుతం సమగ్ర విచారణ జరుగుతోంది. న్యాయం జరిగేలా పోలీసులు అన్ని కఠినమైన చట్టపరమైన చర్యలను తీసుకుంటున్నారు" అని కన్నప్ప టీమ్ పోస్ట్ చేసింది.

అంతకుముందు కన్నప్ప కోసం గత ఎనిమిది సంవత్సరాలుగా తాము తమ ప్రాణాలను పణంగా పెట్టి మరీ పని చేస్తున్నామని చెప్పింది. రెండు సంవత్సరాల నుంచి పనులు జరుగుతున్నాయని తెలిపింది. ఒక్క లీక్‌ రెండు వేల మంది వీఎఫ్‌ ఎక్స్‌ ఆర్టిస్టుల కష్టాన్ని వృథా చేస్తోందని చెప్పింది. అలా ప్రభాస్ లుక్ లీక్ విషయంలో రంగంలో దిగిన మూవీ టీమ్.. లీక్ చేసినోళ్లను గుర్తించింది.