రామ్ చ‌ర‌ణ్‌ని అందుకే డైరెక్ట్ చేయ‌లేద‌ట‌

టాలీవుడ్ స్టార్ హీరో, గ్లోబ‌ల్ స్టార్ రామ్ చ‌ర‌ణ్ తొలి సారి శంక‌ర్‌తో క‌లిసి చేస్తున్న పాన్ ఇండియా మూవీ 'గేమ్ ఛేంజ‌ర్‌'. స్టార్ ప్రొడ్యూస‌ర్స్ దిల్ రాజు, శిరీష్ అత్యంత భారీ బ‌డ్జెట్‌తో శ్రీ‌వెంక‌టేశ్వ‌ర క్రియేష‌న్స్ బ్యాన‌ర్‌పై నిర్మిస్తున్నారు. క‌మ‌ల్ 'ఇండియ‌న్ 2' కార‌ణంగా 'గేమ్ ఛేంజ‌ర్‌' షూటింగ్ ఆల‌స్యం అవుతూ వ‌స్తోంది. 90వ ద‌శ‌కం నేప‌థ్యంలో సాగే కీల‌క క‌థ‌తో స‌మ‌కాలీన రాజ‌కీయాంశాల‌ని ట‌చ్ చేస్తూ శంక‌ర్ రూపొందిస్తున్న సినిమా ఇది.

బాలీవుడ్ బ్యూటీ కియారా అద్వానీ, అంజ‌లి హీరోయిన్‌లుగా న‌టిస్తుండ‌గా, రామ్ చ‌ర‌ణ్ ద్విపాత్రాభిన‌యం చేస్తున్నార‌ని వార్త‌లు వినిపిస్తున్నాయి. ఈ సినిమాకు సాయి మాధ‌వ్ బుర్రా డైలాగ్స్ అందిస్తుండ‌గా, త‌మిళ ద‌ర్శ‌కుడు కార్తీక్ సుబ్బ‌రాజ్‌ క‌థ అందించారు. భారీ స్పాన్ ఉన్న క‌థ‌ని అందించిన ఆయ‌నకు త‌మిళ‌, తెలుగు భాష‌ల్లో ద‌ర్శ‌కుడిగా మంచి పేరుంది. సూప‌ర్ స్టార్ ర‌జ‌నీకాంత్ లాంటి స్టార్‌తో 'పేట‌' సినిమాని రూపొందించిన కార్తీక్ సుబ్బ‌రాజ్‌ మ‌రి రామ్ చ‌ర‌ణ్‌కు క‌థే ఎందుకు అందించారు. డైరెక్ట్ ఎందుకు చేయ‌లేదు అన్న‌ది ఇప్పుడు ఆస‌క్తిక‌రంగా మారింది.

తాజాగా దీనిపై కార్తీక్ సుబ్బ‌రాజు స్పందించారు. ప్ర‌స్తుతం ఆయ‌న తెర‌కెక్కించిన మాసీవ్ యాక్ష‌న్ మూవీ 'జిగ‌ర్ తండ డ‌బుల్ ఎక్స్'. రాఘ‌వ లారెన్స్ హీరోగా, ఎస్‌.జె. సూర్య కీల‌క పాత్ర‌లో న‌టించిన ఈ మూవీ ఈ దీపావ‌ళికి రిలీజ్ కాబోతోంది.

ఈ సంద‌ర్భంగా హైద‌రాబాద్ వ‌చ్చిన ద‌ర్శ‌కుడు కార్తీక్ సుబ్బ‌రాజ్ 'గేమ్ ఛేంజ‌ర్‌' సినిమాకు క‌థ అందించ‌డంపై స్పందించారు. 'శంక‌ర్ సార్ తాను ద‌ర్శ‌క‌త్వం వ‌హించ‌గ‌ల స్క్రిప్ట్‌లు ఏమైనా ఉన్నాయా? అని న‌న్ను అడిగిన‌ప్పుడు ర‌చ‌యిత‌గా, ద‌ర్శ‌కుడిగా నేను చాలా గౌర‌వంగా ఫీల‌య్యాను. 'గేమ్ ఛేంజ‌ర్‌' క‌థ‌ను ఆయ‌న‌కు చెబితే చాలా ఇష్ట‌ప‌డ్డారు.

ఇలాంటి క‌థ‌ను శంక‌ర్ సార్ లాంటి ద‌ర్శ‌కుడు మాత్ర‌మే న్యాయం చేయ‌గ‌లుగుతారు. శంక‌ర్ సార్ స్టైల్లో సాగే ప‌ర్ ఫెక్ట్ సినిమా ఇది. శంక‌ర్ జోన్‌లో ఉంటుంది' అని క్లారిటీ ఇచ్చారు. భారీ క‌మ‌ర్షియ‌ల్ సినిమాలు చేయ‌డంతో ద‌ర్శ‌కుడు శంక‌ర్ శైలి ప్ర‌త్యేకం. త‌న సినిమాల‌కు సామాజిక సందేశాన్ని జోడించి క‌మ‌ర్షియ‌ల్ పంథాలో తెర‌పై ఆవిష్క‌రించ‌డంలో శంక‌ర్ సిద్ధ‌హ‌స్తులు.

'ఆర్ ఆర్ ఆర్‌' త‌రువాత రామ్ చ‌ర‌ణ్ న‌టిస్తున్న సినిమా కావ‌డంతో ఈ ప్రాజెక్ట్‌పై భారీ అంచ‌నాలు ఏర్ప‌డ్డాయి. ఆ అంచ‌నాల‌కు అనుగునంగానే ఈ చిత్రాన్ని భారీ స్థాయిలో నిర్మిస్తున్నారు. ఈ సినిమా కొత్త షెడ్యూల్ ఈ సోమ‌వారం హైద‌రాబాద్‌లోని గ‌చ్చిబౌలిలో మొద‌లైంది. రామ్ చ‌ర‌ణ్ కూల్‌గా క‌నిపిస్తుండ‌గా, శంక‌ర్ సీన్ వివ‌రిస్తున్న స్టిల్స్ నెట్టింట వైర‌ల్ అవుతున్నాయి.