హేమ క‌మిటీ ఎఫెక్ట్: మొత్తం 17మందిపై కేసులు నమోదు
కేరళ పోలీసులు మలయాళ కళాకారులపై 17 కేసులు నమోదు చేశారు. మలయాళ చిత్ర‌సీమ ప్ర‌ముఖుల పేర్ల‌ను ఇప్ప‌టికే మలయాళ మనోరమ వెల్ల‌డించింది.
కేరళ పోలీసులు మలయాళ కళాకారులపై 17 కేసులు నమోదు చేశారు. మలయాళ చిత్ర‌సీమ ప్ర‌ముఖుల పేర్ల‌ను ఇప్ప‌టికే మలయాళ మనోరమ వెల్ల‌డించింది. కొన్ని కేసుల్లో త‌మ‌పై అఘాయిత్యానికి పాల్ప‌డిన వారి పేర్లు తెలియ‌దు అని స‌ద‌రు న‌టీమ‌ణులు సిట్ కి వెల్ల‌డించారు. పలువురు మహిళలు దాఖలు చేసిన వివిధ ఫిర్యాదులపై విచార‌ణ కొన‌సాగ‌నుంద‌ని తెలిసింది.
మలయాళ చిత్ర పరిశ్రమలో లైంగిక వేధింపుల ఆరోపణలపై కేరళ పోలీసులు కనీసం 17 కేసులు నమోదు చేశారు. ఇందులో ఓ యువ నటి ఇచ్చిన ఫిర్యాదు ఆధారంగా పాపుల‌ర్ నటుడిపై అత్యాచారం కేసు కూడా న‌మోదైంది. 2016లో తిరువనంతపురంలోని హోటల్‌లో తనను వేధించారని స‌ద‌రు నటి ఫిర్యాదులో ఆరోపించింది. సిద్ధిక్ తనను లైంగికంగా వేధించి లాక్కెళ్లాడని ఆరోపించ‌గా, ఆదివారం నాడు అసోసియేషన్ ఆఫ్ మలయాళం మూవీ ఆర్టిస్ట్స్ (అమ్మ) జనరల్ సెక్రటరీ పదవికి అత‌డు రాజీనామా చేశారు. స‌ద‌రు న‌టీమ‌ణి 21 సంవత్సరాల వయస్సులో ఒక హోటల్ గదిలో 2019లో జరిగిన ఘటన గురించి తాను ఓపెన్‌గా చెప్పానని, సినిమాల్లో అవకాశాలు రాకపోవడంతో ఇప్పుడు తాను నష్టపోయేది ఏమీ లేదని చెప్పింది.
2013లో ఓ సినిమా షూటింగ్‌లో తనపై అఘాయిత్యానికి పాల్పడ్డ ఓ గుర్తుతెలియని నటుడిపై మరో నటి కూడా డీజీపీకి ఫిర్యాదు చేసినట్లు మనోరమ న్యూస్ నివేదించింది. అంతకుముందు జయసూర్య తనను వేధించాడని తాను ధృవీకరించని వార్తలను ఆమె ఖండించింది. తన ఆరోపణలతో జ‌య‌సూర్య‌ను లింక్ చేయవద్దని మీడియాను కోరింది. స‌ద‌రు నటి వాంగ్మూలాన్ని సిట్ రికార్డు చేసింది.
న‌లుగురు పాపుల‌ర్ న‌టులు సహా ఏడుగురిపై లైంగిక వేధింపుల ఫిర్యాదు చేసిన మూడో నటి వాంగ్మూలాన్ని కూడా సిట్ నమోదు చేయనుంది. దురుసుగా ప్రవర్తించారంటూ ప్ర‌ముఖ దర్శకుడిపై ఫిర్యాదు చేసిన బెంగాలీ నటి రహస్య వాంగ్మూలాన్ని కూడా దర్యాప్తు బృందం నమోదు చేసింది. ఆరోపణల నేపథ్యంలో కేరళ ఫిల్మ్ అకాడమీ చైర్మన్ పదవికి అత‌డు రాజీనామా చేశారు. ఈ ఫిర్యాదుకు సంబంధించి కోస్టల్ ఏఐజీ పూంకుజలి డైరెక్టర్‌ను విచారించే అవకాశం ఉందని కూడా మనోరమ న్యూస్ నివేదించింది. ఓవ‌రాల్ గా 17 మంది పై ఆరోప‌ణ‌లు వ‌చ్చాయి. వారంద‌రిపైనా పోలీసులు కేసులు నమోదు చేసి విచారిస్తున్నారు. ప్ర‌స్తుతానికి వీటిని మోలీవుడ్ మీటూ ఆరోపణలుగా చిత్రీక‌రిస్తున్నారు.