కిరణ్ అబ్బవరం హిట్టు సినిమా.. క్లైమాక్స్‌కి రిజెక్షన్ షాక్!

టాలీవుడ్‌లో ప్రస్తుతం యువ హీరోలు తమ మార్కెట్‌ను నిలబెట్టుకోవడానికి ఎప్పటికప్పుడు కొత్త ప్రయోగాలకు సిద్ధమవుతున్నారు. కానీ ఈ ప్రయోగాలు ఎప్పుడూ అనుకున్న విధంగా ఫలితాలు ఇవ్వవు. వరుసగా ఫ్లాపులతో ఇబ్బంది పడుతున్న కిరణ్ అబ్బవరం, ఎట్టకేలకు ‘క’ సినిమాతో తనకంటూ ప్రత్యేకమైన గుర్తింపు తెచ్చుకున్నాడు. ఈ సినిమా కమర్షియల్‌గా బాగానే రన్ అవ్వడంతో పాటు, ముఖ్యంగా క్లైమాక్స్ ప్రేక్షకులను ఎమోషనల్‌గా కనెక్ట్ అయ్యేలా చేసింది.

హైలైట్‌గా నిలిచిన ఈ అంశం ఓటీటీ హక్కుల విషయంలో మాత్రం షాక్ ఇచ్చిందని తాజా సమాచారం. సాధారణంగా థియేటర్స్‌లో హిట్ అయిన సినిమాలు ఓటీటీ ప్లాట్‌ఫామ్‌లకు పెద్దగా సమస్యలు లేకుండా సెట్ అవుతాయి. కానీ ‘క’ విషయంలో మాత్రం అలా జరగలేదట. సినిమా స్ట్రీమింగ్ హక్కుల కోసం ప్రముఖ ఓటీటీ సంస్థలతో చర్చలు జరిగినప్పుడు, ఈ సినిమాకు వచ్చిన అత్యంత ముఖ్యమైన ప్రశంసే ఓటీటీలో రిజెక్షన్‌కు కారణమైందట.

‘క’ క్లైమాక్స్ చాలా ఎమోషనల్‌గా, కర్మ సిద్ధాంతాన్ని హైలైట్ చేస్తూ రూపొందించబడింది. అయితే ఇదే విషయాన్ని ఓ ప్రముఖ ఓటీటీ సంస్థ పెద్దగా అంగీకరించలేకపోయిందట. కథను పూర్తిగా అర్థం చేసుకునే విధంగా నడిపినప్పటికీ, క్లైమాక్స్ కొంచెం హెవీగా ఉందని, ప్రేక్షకులపై పెద్దగా ప్రభావం చూపనిది అనుకుని వారు ఈ సినిమాను తీసుకోవడానికి ఆసక్తి చూపలేదని టాక్. కానీ చిత్ర బృందం మాత్రం ఈ ముగింపు తాము మార్చలేదని, కథకు న్యాయం చేసేలా ఉన్నదని కిరణ్ ఓ ఇంటర్వ్యూలో వెల్లడించాడు. నిజానికి ఇదే నిర్ణయం సినిమా విజయంలో కీలకంగా మారిందని చెప్పొచ్చు.

ఇక ఓటీటీ స్ట్రీమింగ్ హక్కులు ఎవరు తీసుకుంటారనే చర్చ జరుగుతున్న సమయంలో, అనూహ్యంగా ఈటీవీ విన్ ముందుకొచ్చి ఈ సినిమాను స్ట్రీమ్ చేసింది. తెలుగులో ఎక్కువగా ప్రైమ్, నెట్‌ఫ్లిక్స్, జీ5 లాంటి ప్లాట్‌ఫామ్‌లే సినిమాలను కొనుగోలు చేస్తుంటాయి. కానీ ‘క’ లాంటి ఒక ప్రయోగాత్మక కథను ఈటీవీ విన్ తీసుకోవడం ఇండస్ట్రీ వర్గాల్లో ఆసక్తికరంగా మారింది. పైరసీని అడ్డుకోవడంలో కూడా ఈటీవీ విన్ ప్రత్యేకమైన టెక్నాలజీని ఉపయోగించి సినిమాను రక్షించగలిగింది.

ఈ పరిణామాలన్నీ చూస్తుంటే, సినిమా కథపై పూర్తి నమ్మకం ఉంచిన దర్శకుడు, నిర్మాతలు చివరకు ప్రేక్షకులను మెప్పించగలిగారు. ఓటీటీ సంస్థలకు బిజినెస్ కోణంలో ఇది వర్కవుట్ అవుతుందా? లేదా? అనేది ముఖ్యం. కానీ సినిమాటిక్ ఎక్స్‌పీరియన్స్‌గా చూస్తే ‘క’ మాత్రం క్లైమాక్స్‌తోనే విజయం సాధించిందని చెప్పాలి. ఓటీటీ సంస్థలు ఎప్పుడూ ఒక స్టాండర్డ్ గైడ్‌లైన్స్‌నే ఫాలో అవ్వాలి అనుకోవడం వలన, కొన్ని విభిన్నమైన సినిమాలకు న్యాయం జరగదు. అంతా అనుకున్న విధంగా జరుగుతుందనుకోవడం తప్పే. ఓటీటీ సంస్థలకు నచ్చని అంశం, బాక్సాఫీస్ వద్ద బిగ్ హిట్‌గా మారిందంటే, సినిమా విజయం ఎలా ఉండాలో ప్రేక్షకులే నిర్ణయిస్తారనడానికి ఇదొక మంచి ఉదాహరణ.