తంగ‌ళ‌న్ మాళ‌విక టూమ‌చ్ వైల్డ్ బిజిలీ

చియాన్ విక్ర‌మ్ ప్ర‌ధాన పాత్ర‌లో న‌టించిన‌ `తంగ‌ళ‌న్` ఈ ఏడాది మోస్ట్ అవైటెడ్ చిత్రాల్లో ఒక‌టి. క‌థానాయ‌కుడు విక్ర‌మ్ ఈ సినిమాలో మాస్ ర‌గ్గ్ డ్ పాత్ర‌లో క‌నిపించ‌నున్నాడు. పోస్ట‌ర్ల‌కు ఇప్ప‌టికే అద్బుత స్పంద‌న వ‌చ్చింది. ఆగష్టు 4న మాళ‌విక పుట్టినరోజు సందర్భంగా కొత్త పోస్టర్‌ను విడుదల చేసారు.

ఈ పోస్టర్‌లో మాళవిక అట‌వీ గిరిజ‌న యువ‌తి వేష‌ధార‌ణ‌లో క‌నిపించింది. అడ‌విలో బిజిలీ వేటాడేందుకు వెతుకుతున్న‌ట్టుగా క్రూరంగా క‌నిపిస్తోంది. ఈ పాత్ర పేరు ఆరతి. ఇది కోలార్ గోల్డ్ ఫీల్డ్స్‌లో సాగే క‌థాంశం. అక్క‌డ స్థానిక గిరిజ‌నులు పూజించే దేవత చుట్టూ క‌థ తిరుగుతుంది. తాజాగా మాళ‌విక పోస్ట‌ర్ ని షేర్ చేసిన నిర్మాత‌లు ఆస‌క్తిక‌ర క్యాప్ష‌న్ ఇచ్చారు. ``ఆమె ఉనికిని ప్రశ్నించే ధైర్యం ఎవరికైనా ఉందా..! ఆమె ఆగ్రహానికి గురైంది. మా దృఢమైన ఉగ్రమైన ఆరతి- మాళ‌విక ఎం.కి పుట్టినరోజు శుభాకాంక్షలు..అని రాసారు.

ఇటీవ‌ల విడుద‌లైన ఈ సినిమా ట్రైల‌ర్ ఇప్ప‌టికే ప్ర‌పంచ‌వ్యాప్తంగా ఉన్న ఆడియెన్ లోకి దూసుకెళ్లింది. ట్రైలర్ లో ఇంటెన్సిటీ ఆక‌ట్టుకుంది. ఇది యూట్యూబ్‌లో 10 మిలియన్లకు పైగా వీక్షణలను సంపాదించింది. భారీ అంచ‌నాల న‌డుమ‌ కొన్ని వారాల్లో విడుదలకు సిద్ధమవుతున్న ఈ చిత్రం సెన్సార్ కూడా పూర్తయింది.సెన్సార్ బోర్డ్ నుండి U/A సర్టిఫికేట్ పొందింది. ఆగస్ట్ 15 న థియేటర్లలో విడుదల చేయడానికి చిత్ర‌బృందం సన్నాహాలు చేస్తోంది.

బ్రిటీష్ పాలనలో బ్రిటిష్ అధికారులు కోలార్ పొలాలలో బంగారం వేట ప్రారంభించి, గ‌ని నుంచి వెలికితీత కోసం స్థానిక గిరిజనులను నియమించాక ఏం జ‌రిగింద‌న్న‌ది ఈ సినిమా క‌థాంశం. కోలార్ మైన్స్ లో ప‌ని చేసే గిరిజ‌న తెగ నాయ‌కుడిగా విక్ర‌మ్ క‌నిపిస్తారు. బంగారం ముసుగులో మరొక తెగతో వివాదంలో చిక్కుకున్నాక పోరాటాల‌ను ఇందులో ఆవిష్క‌రిస్తున్నారు. తన ప్రజలను రక్షించడానికి అంకితమ‌య్యే భ‌యం భీతి అన్న‌దే లేని నాయకుడిగా విక్రమ్ పాత్ర ఎమోష‌న్ ని ర‌గిలిస్తుంది. ఈ పాత్ర కోసం అతడి మేకోవ‌ర్ మైమ‌రిపించింది. ట్రైలర్‌లో విల్లులు, కత్తులు, ఈటెలతో కూడిన యాక్షన్ సీక్వెన్స్‌లు హైలైట్ అయ్యాయి. బ్లాక్ పాంథర్‌తో విక్రమ్ పోరాటం ఆస‌క్తిని క‌లిగించింది. దర్శకుడు పా రంజిత్ తంగలన్ ట్రైలర్ ద్వారా తన సినిమా విశ్వంలోని చారిత్రక సంఘటనలను అద్భుతంగా చిత్రీకరించాడు. త్వరలో విడుదల కానున్న ఈ చిత్రం ప్రేక్షకులకు సరికొత్త అనుభూతిని అందిస్తుంద‌ని అంచ‌నా వేస్తున్నారు. ఈ చిత్రాన్ని స్టూడియో గ్రీన్ ఫిలిమ్స్ బ్యానర్‌పై నిర్మాత కెఇ జ్ఞానవేల్ రాజా- నీలం ప్రొడక్షన్స్‌తో కలిసి పా రంజిత్ నిర్మిస్తున్నారు. పార్వతి తిరువోతు ,మాళవిక మోహనన్ తంగలన్‌లో కీలక పాత్రలు పోషించారు. ఈ చిత్రానికి సంగీతం: జి.వి.ప్రకాష్ కుమార్.