ట్రైలర్ టాక్: సంపూర్ణేష్ బాబు ఓటు కోసం ఎన్ని తిప్పలో..

హృద‌య‌కాలేయం, కొబ్బ‌రిమ‌ట్ట చిత్రాలతో తెలుగు ప్రేక్షకుల్లో త‌న‌కంటూ ఓ ప్ర‌త్యేక‌మైన గుర్తింపును తెచ్చుకున్న కమెడియన్ సంపూర్ణేశ్ బాబు.. చాలా కాలం తర్వాత నటిస్తున్న కొత్త చిత్రం 'మార్టిన్ లూథ‌ర్ కింగ్'. టైటిల్ పోస్టర్​తోనే ఆసక్తి రేకెత్తించిన ఈ చిత్రం నుంచి తాజాగా టీజర్​ విడుదలైంది. ఈ ప్రచార చిత్రం ఆద్యంతం ఆకట్టుకునేలా ఉంది.

800 ఏళ్ల పూర్వము అంటూ గ్రామ పంచాయితీ ఎన్నికల బోర్డును చూపిస్తూ​ స్టేజ్​ డ్రామాతో మొదలైన ఈ ప్రచారం చిత్రంలో.. ఓ గ్రామంలోని ఉత్తరం - దక్షిణం అంటూ రెండు వర్గాల ప్రజలను, వారి మధ్య జరిగే ఆధిపత్య పోరును ఫన్నీ ఫన్నీగా చూపించారు. ప్రెసిడెంట్ ఎలక్షన్స్​లో డబ్బుల కోసం నరేశ్​ - వెంకటేశ్ మహా ప్రత్యర్థులుగా పోటీకి దిగడం, ఆ తర్వాత ఎన్నికలు రసవత్తరంగా సాగడం, దానికి కామెడీ ఎలిమెంట్స్​ను జోడించి చక్కగా చూపించారు.

అయితే ఇరు వర్గాలకు గెలవడానికి ఒకే ఒక్క ఓటు కావాల్సిన సమయంలో సంపూర్ణేశ్​ బాబు ఓటు కీలకంగా మారడం, దీంతో అతడి ఓటు కోసం ఇరు వర్గాలు, ఊరి ప్రజలంతా ఆసక్తిగా ఎదురుచూడటం, కానీ సంపూర్ణేశ్​ బాబు ఎవరికి ఓటు వేయాలో తెలీక ఉండటం వంటి సన్నివేశాలను చూపించారు. ఈ క్రమంలోనే ఇరు వర్గాలు అనామకుడిగా ఉన్న అతడికి తాయిలాలను ఇచ్చి తమ వైపు తిప్పుకునేందుకు ప్రయత్నించడం అంతా ఫన్నీ ఫన్నీగా సాగింది. మొత్తంగా విలేజ్ బ్యాక్​గ్రౌండ్​లో ప్రచార చిత్రం నవ్వులు పూయించింది.

ఇకపోతే ఈ సినిమాకు పూజ కొల్లూరు దర్శకత్వం వహించారు. ఈ పొలిటికల్ సెటైరికల్ మూవీని వైనాట్ స్టూడియోస్, రిలయన్స్ ఎంటర్టైన్మెంట్ సమర్పణలో మహాయాన మోషన్ పిక్చర్స్ బ్యానర్‌ నిర్మిస్తోంది. ఎస్.శశికాంత్, చక్రవర్తి రామచంద్ర నిర్మాతలుగా వ్యవహరిస్తున్నారు. వెంకటేశ్​ మహా క్రియేటివ్ ప్రొడ్యూసర్‌గా వ్యవహరిస్తున్నారు. స్క్రీన్‌ప్లే, డైలాగులు వెంకటేష్ మహా అందించారు. సమరన్ సాయి సంగీతం సమకూర్చారు.

అక్టోబ‌ర్ 27న థియేట‌ర్ల‌లో సినిమా విడుదల కానుంది. మరి చాలా గ్యాప్ త‌ర్వాత వస్తున్న సంపూర్ణేశ్​.. ఈ చిత్రంతోనైనా ప్రేక్షకుల్ని ఎంత వరకు ఆకట్టుకుంటారో చూడాలి..