మృణాల్ 'ద్వితీయ విఘ్నం' దాటేనా..?

ఇతర రంగాల్లో ఏమో కానీ సినిమా ఇండస్ట్రీలో ద్వితీయ విఘ్నంతో చాలా మంది ఇబ్బంది పడి, ఫెయిల్‌ అయిన వారు ఉన్నారు. హీరోలు మరియు హీరోయిన్స్ లో చాలా మంది మొదటి సినిమా తో మంచి విజయాన్ని సొంతం చేసుకుని, రెండో సినిమా తో నిరాశ పరిచిన వారు ఉన్నారు. ఆ తర్వాత మళ్లీ పుంజుకుని సక్సెస్ లు సొంతం చేసుకున్న వారు కూడా లేకపోలేదు.

ఇప్పుడు ద్వితీయ విఘ్నం విషయం టాపిక్ సీతారామం బ్యూటీ మృణాల్ ఠాకూర్ కారణంగా వచ్చింది. టాలీవుడ్‌ లో సీతారామం సినిమా తో ఎంట్రీ ఇచ్చిన ఈ అమ్మడు మొదటి సినిమా తోనే స్టార్‌ గా నిలిచింది. ఆ సినిమా తో తెలుగు ప్రేక్షకుల్లోకి మృణాల్ చొచ్చుకుని వెళ్లింది అనడంలో ఎలాంటి సందేహం లేదు.

సీతారామం సక్సెస్ తో మృణాల్ కి బ్యాక్ టు బ్యాక్ ఆఫర్లు వచ్చాయి. కానీ ఆచితూచి సినిమాలను కమిట్‌ అయ్యింది. నానితో హాయ్‌ నాన్న సినిమాను తెలుగు లో రెండో సినిమాగా చేసిన మృణాల్‌ రెండు వారాల్లో ప్రేక్షకుల ముందుకు రాబోతున్న విషయం తెల్సిందే. నాని ఈ సినిమా పై చాలా నమ్మకంతో కనిపిస్తున్నాడు. అయితే మృణాల్‌ ద్వితీయ విఘ్నం గురించి కొందరు కామెంట్స్ చేస్తున్నారు.

హిందీలో వరుసగా సినిమాలు చేస్తున్న మృణాల్ తెలుగు లో ద్వితీయ విఘ్నం దాటి మరిన్ని సినిమాలు చేస్తుందని అభిమానులు నమ్మకంగా ఉన్నారు. అంతే కాకుండా హాయ్ నాన్న టీమ్‌ కూడా ఆమె సినిమాలో కనబర్చిన నటన మరియు నాని తో ఆమెకు కుదిరిన రొమాన్స్ గురించి ప్రధానంగా చెబుతున్నారు.

కనుక హాయ్ నాన్న సినిమా తో మృణాల్‌ ఠాకూర్ మరో మంచి విజయాన్ని సొంతం చేసుకోవడం ఖాయం అనిపిస్తోంది. ఈ సినిమా తో టాలీవుడ్‌ లో మృణాల్ మరింతగా పాతుకు పోవడం ఖాయం అని సినీ విశ్లేషకులు మరియు మీడియా వర్గాల వారు కూడా అభిప్రాయం వ్యక్తం చేస్తున్నారు. డిసెంబర్‌ 7న విడుదల అవ్వబోతున్న హాయ్ నాన్న సినిమా మృణాల్‌ కి ఎలాంటి ఫలితాన్ని ఇస్తుందో చూడాలి.