ఆ మూవీ రావడం పక్కా.. కానీ ఎప్పుడో చెప్పలేను!: నాని

టాలీవుడ్ నేచురల్ స్టార్ నాని.. మరికొద్ది రోజుల్లో సరిపోదా శనివారం మూవీతో ప్రేక్షకుల ముందుకు రానున్న విషయం తెలిసిందే. వివేక్ ఆత్రేయ దర్శకత్వం వహిస్తున్న ఆ సినిమా.. ఆగస్టు 29వ తేదీన గ్రాండ్ గా విడుదల కానుంది. అయితే గత ఏడాది రెండు చిత్రాలు దసరా, హాయ్ నాన్నతో వచ్చిన నాని.. బాక్సాఫీస్ వద్ద మంచి హిట్స్ అందుకున్నారు. ఇప్పుడు మరోసారి ఆడియన్స్ ను అలరించేందుకు సిద్ధమవుతున్నారు. అయితే నాని అప్ కమింగ్ చిత్రాల లైనప్ క్రేజీగా ఉంది.

దసరాతో మంచి హిట్ ఇచ్చిన శ్రీకాంత్ ఓదెలతో మరో సినిమా చేయనున్నారు నాని. దీంతోపాటు సాహో ఫేమ్ సుజిత్ తో కూడా వర్క్ చేయనున్నారు. అదే సమయంలో బలగం మూవీతో డైరెక్టర్ గా మారిన వేణు డైరెక్షన్ లో నాని సినిమా చేయబోతున్నారని ఎప్పటి నుంచో వార్తలు వస్తున్నాయి. ఆ సినిమా అఫీషియల్ అనౌన్స్మెంట్ రాకపోయినా.. దిల్ రాజు ఓ వేడుకలో తెలిపారు. ప్రాజెక్ట్ ఫైనల్ అయింది.. ఎల్లమ్మ వస్తుంది అన్నారు. దీంతో మూవీ పేరు ఎల్లమ్మ అనే టాక్ వినిపిస్తోంది.

అయితే కథ విషయంలో ఏకాభిప్రాయం కుదరకపోవడం వల్ల నాని, వేణు మూవీ ఆగిపోయిందని కొద్ది రోజులుగా వార్తలు వస్తున్నాయి. ఇప్పుడు ఈ విషయంపై సరిపోదా శనివారం మూవీ ప్రెస్ మీట్ లో నాని పరోక్షంగా స్పందించారు. "గతంలో నేనొకసారి దిల్‌ రాజును కలిశాను. ఎలాంటి దర్శకులతో వర్క్‌ చేయాలని అనుకుంటున్నావని ఆయన నన్ను అడిగారు. దీంతో నేను వేణు మంచి దర్శకుడు అని, అలాంటి వారితో వర్క్‌ చేయాలని ఉందని చెప్పా" అని నాని తెలిపారు.

"అయితే అది మేం సరదాగా మాట్లాడుకున్నాం. కొన్ని రోజులకు ఆ విషయం బయటకు వచ్చింది. వేణుతో తప్పకుండా నా సినిమా ఉంటుంది. దిల్ రాజు నిర్మిస్తారు. కానీ అది ఆ చిత్రం ఎప్పుడు స్టార్ట్ అవుతుందో చెప్పలేను" అని నాని క్లారిటీ ఇచ్చారు. రూమర్లకు చెక్ పెట్టారు. దసరా మూవీలో ఊర మాస్ అవతార్ లో నాని కనిపించిన విషయం తెలిసిందే. ఇప్పుడు వేణుతో చేయనున్న మూవీలో మరోసారి అలాంటి పాత్రే పోషించబోతున్నట్లు టాలీవుడ్ లో టాక్ వినిపిస్తోంది.

నాని కోసం వేణు రాసుకున్న కథ, బ్యాక్ డ్రాప్ కు సంబంధించి పలు రూమర్లు వినిపించినా.. క్లారిటీ రాలేదు. అయితే పలు సినిమాల్లో కమెడియన్ గా నటించి మంచి పేరు సంపాదించుకున్నారు వేణు. ఆ తర్వాత జబర్దస్త్ షో ద్వారా ఫేమస్ అయ్యారు. డెబ్యూ మూవీ బలగంతో తన టాలెంట్ ను బయటపెట్టి అబ్బురపరిచారు. బ్లాక్ బస్టర్ హిట్ అందుకున్నారు. త్వరలోనే నానితో వర్క్ చేయనున్నారు. మరి ఆ సినిమా ఎప్పుడు స్టార్ట్ అవుతుందో, ఎలా ఉంటుందో వేచి చూడాలి.