పోసాని రీ ఎంట్రీ.. ఏదో గట్టిగనే ప్లాన్ చేస్తున్నారు!

టాలీవుడ్ నటుడు పోసాని కృష్ణ మురళి టాలెంట్ గురించి అందరికీ తెలిసిందే. నటుడిగా, డైరెక్టర్ గా, రచయితగా అనేక సినిమాలు చేశారు. కొన్నేళ్లుగా డైరెక్షన్, రైటింగ్ కాకుండా మూవీస్ లో యాక్టింగ్ మాత్రమే చేస్తున్నారు. ఒక్కో ఏడాది పదికిపైగా సినిమాల్లో కూడా నటించారు పోసాని. 2024లో ఇప్పటికే ఐదు చిత్రాల్లో కనిపించారు. అయితే ఆయన.. రాజకీయాల్లో కొన్ని ఏళ్లుగా చాలా యాక్టివ్ గా ఉంటున్నారు.

ఆంధ్రప్రదేశ్ లోని వైసీపీలో కొన్నేళ్ల క్రితం ఆయన చేరిన విషయం తెలిసిందే. ఆ పార్టీ అధినేత, మాజీ ముఖ్యమంత్రి జగన్ మోహన్ రెడ్డికి గట్టి మద్దతుదారుగా ఉన్నారు. జగన్ తో చాలా సన్నిహితంగా ఉంటారని రాజకీయ వర్గాల్లో టాక్ వినిపిస్తుంటోంది. గత ఎన్నికల్లో వైసీపీ గెలిచాక పోసాని.. ఏపీ ఫిలిం డెవలప్మెంట్ కార్పోరేషన్ ఛైర్మన్‌ గా బాధ్యతలు స్వీకరించారు.

రీసెంట్ గా జరిగిన ఎన్నికల్లో కూడా జగన్ కచ్చితంగా గెలుస్తారని ఆయన ఆశించారు. ఆ విషయాన్ని పలుమార్లు తెలిపారు. కానీ వైసీపీ ఓటమి పాలైన తర్వాత పెద్దగా పోసాని బయట కనిపించలేదు. ఆ మధ్య బేబీ నిర్మాత ఎస్కేఎన్.. పోసాని ఎక్కడ అంటూ ట్వీట్ కూడా చేశారు. ఇప్పుడు సడెన్ గా పోసాని.. ఓ ప్రోమోతో సోషల్ మీడియాలో దర్శనమిచ్చారు. పోసాని కృష్ణ మురళి డింగ్ డాంగ్ 2.0 అంటూ సాక్షి ఛానెల్ నిర్వాహకులు పోస్ట్ చేశారు.

అందులో రెడ్ కలర్ చైర్ ఉండగా.. వెనుక పోసాని ఉన్నారు. ఆ తర్వాత నమస్కారం పెట్టుకుని తన మార్క్ స్టైల్ లో కనిపిస్తారు. ప్రోమో చివరలో కమింగ్ సూన్ అని ఉంది. అది తప్ప మిగతా వివరాలను సాక్షి నిర్వాహకులు వెల్లడించలేదు. అయితే అప్పట్లో సాక్షిలో వచ్చిన డింగ్ డాంగ్ షోను దివంగత కమెడియన్ ధర్మవరపు సుబ్రహ్మణ్యం హోస్ట్ చేశారు. ఇప్పుడు ఆ షో సెకండ్ సీజన్ ను పోసాని హోస్ట్ చేయనున్నట్లు సమాచారం.

అదే సమయంలో పోసానికి అటు పాలిటిక్స్.. ఇటు మూవీస్ పై మంచి అవగాహన ఉన్న విషయం తెలిసిందే. దీంతో సాక్షి.. ఆయనతో పొలిటికల్ కమ్ సెలబ్రిటీ టాక్ షోను ప్లాన్ చేసినట్లు ఉందని అనేక మంది నెటిజన్లు కామెంట్లు పెడుతున్నారు. అన్‌ స్టాపబుల్ విత్ ఎన్‌ బీకే లాంటి షోను ప్లాన్ చేశారేమో అని కొందరు అంటున్నారు. ఏదేమైనా పోసాని డింగ్ డాంగ్ షోకు సంబంధించి పూర్తి వివరాలు తెలియాల్సి ఉంది.