100 కోట్ల ఆర్జ‌న‌తో షాకిస్తున్న ప్ర‌ధానమంత్రి మ‌న‌వ‌రాలు!

నేపాల్ రాజ‌ధాని ఖాట్మండు నుండి బాలీవుడ్ వరకు అద్భుతమైన ప్రయాణం సాగించిన ఒక అంద‌మైన అమ్మాయి.. త‌న కుటుంబం త‌ర‌పున‌ రాజ‌కీయ వార‌స‌త్వం ఉన్నా కానీ, గ్లామ‌ర్ రంగంలో క‌థానాయిక‌గానే కెరీర్ ని సాగించింది. కేవ‌లం సినిమా రంగంలో న‌టిగా కొన‌సాగుతూ 100 కోట్లు సంపాదించింది. ఇది అరుదైన చ‌రిత్ర‌. ఇంత‌కీ ఎవ‌రా బ్యూటీ? అంటే.. పేరు మ‌నీషా కొయిరాలా.

గొప్ప ప్ర‌తిభ‌కు నిలువెత్తు నిద‌ర్శ‌నం ఈ బ్యూటీ. 90వ దశకం 2000వ దశకం ప్రారంభంలో సినిమాల్లో తన ఐకానిక్ నటనతో భారీ ఫాలోయింగ్ సంపాదించుకున్న మనీషా కొయిరాలా కెరీర్ మొత్తంలో 60కి పైగా చిత్రాలలో నటించింది. కేవ‌లం సినీ రంగంలో సంపాదించి మనీషా కొయిరాలా భారీగా ఆస్తుల‌ను కూడ‌బెట్టార‌న్న టాక్ ఉంది. మ‌నీషా నికర ఆస్తుల‌ విలువ ప‌రిశీలిస్తే...

హిందీ, తమిళం, నేపాలీ, తెలుగు, మలయాళం, కన్నడ, ఆంగ్ల చిత్రాలలో న‌టించిన నేపాల్ బ్యూటీ మ‌నీషా ఇప్పుడు సంజయ్ లీలా భ‌న్సాలీ తెర‌కెక్కిస్తున్న క్రేజీ వెబ్ సిరీస్ `హీరామండి`తో ఓటీటీ రంగంలోకి మ‌నీషా క‌యిరాలా అడుగుపెడుతోంది. ఐక్యరాజ్యసమితి జనాభా నిధికి 1999లో భారతదేశానికి మరియు 2015లో నేపాల్‌కు గుడ్‌విల్ అంబాసిడర్‌గా పనిచేసిన మనీషా కొయిరాలా న‌టిగా గొప్ప ప్ర‌శంస‌లు అందుకున్నారు. నేపాల్ మాజీ ప్రధాని మనవరాలు అయిన మ‌నీషా తరతరాల సంపదకు వారసురాలు కూడా.

ప్రారంభ జీవితం.. మూలాలు..

నేపాల్‌లోని బిరాట్‌నగర్‌లో రాజకీయంగా పాపుల‌రైన కొయిరాలా కుటుంబంలో 16 ఆగస్టు 1970న జన్మించిన మనీషా కొయిరాలా మాజీ క్యాబినెట్ మంత్రి .. నేపాల్ ప్రతినిధుల సభ మాజీ సభ్యుడు ప్రకాష్ కొయిరాలా కుమార్తె .. మాజీ ప్రధాని బిశ్వేశ్వర్ ప్రసాద్ కొయిరాలా మనవరాలు. నేపాల్ మంత్రి మనీషా కొయిరాలా తన అమ్మమ్మ వద్ద వారణాసిలో పెరిగింది. తరువాత ఢిల్లీ - ముంబైలలో పెరిగింది. వారణాసిలో 10వ తరగతి వరకు వసంత కన్యా మహావిద్యాలయానికి వెళ్ళింది. 1989లో బోర్డు పరీక్షల తర్వాత విరామంలో ఉన్నప్పుడు 1989లో నేపాలీ చిత్రం ఫేరి భేతౌలాలో తొలిసారిగా నటించింది. ఆ తర్వాత ఆమె న్యూఢిల్లీలోని ధౌలా కువాన్‌లోని ఆర్మీ పబ్లిక్ స్కూల్ (APS)లో చదివారు. చదువు పూర్తయ్యాక, కోయిరాలా చక్కగా నటనను కొనసాగించేందుకు ముంబైకి వెళ్లారు. 1991లో సుభాష్ ఘై చిత్రం సౌదాగర్‌తో బాలీవుడ్‌లోకి అడుగుపెట్టింది. సౌదాగర్ తర్వాత ఆమె 1992లో యాల్గార్‌లో నటించింది. ఇది బాక్సాఫీస్ వద్ద మంచి ప్రదర్శన కనబరిచింది.. విజయవంతమైంది. కానీ దీని తర్వాత కాలంలో మ‌నీషా న‌టించిన చాలా సినిమాలు బాక్సాఫీస్ వద్ద పతనమయ్యాయి. ఆమె వరుస ఫ్లాప్ చిత్రాలను ఎదుర్కోవలసి వచ్చింది.

1994లో విధు వినోద్ చోప్రా తెర‌కెక్కించిన‌ రొమాన్స్ నేప‌థ్య‌ చిత్రం `1942: ఎ లవ్ స్టోరీ` మ‌నీషాకు కెరీర్‌లో పురోగతిని అందించింది. ఈ చిత్రం బాక్సాఫీస్ వద్ద పరాజయం పాలైనప్పటికీ, వార్షిక ఫిల్మ్‌ఫేర్ అవార్డ్స్‌లో ఉత్తమ నటిగా కొయిరాలాకు మొదటి నామినేషన్‌ను అందించి త‌న‌ను లైమ్ లైట్ లో ఉంచింది. 1995లో అరవింద్ స్వామి- మణిరత్నం కాంబినేష‌న్ సినిమా బొంబాయి`తో తమిళ సినిమాల్లోకి ప్రవేశించింది. ఈ చిత్రంలో న‌ట‌న‌కు ఉత్తమ నటిగా ఫిల్మ్‌ఫేర్ క్రిటిక్స్ అవార్డును గెలుచుకుంది. ఇది ఈ కేటగిరీలో గెలిచిన మొదటి హిందీయేతర చిత్రంగా నిలిచింది. అదే సంవత్సరం అమీర్ ఖాన్‌తో కలిసి అకేలే హమ్ అకేలే తుమ్‌లో కూడా నటించింది. ఈ చిత్రానికి కూడా ఆమె ఫిలింఫేర్ అవార్డ్స్‌లో ఉత్తమ నటి విభాగంలో నామినేషన్‌ను అందుకుంది.

ఆ త‌ర్వాత మ‌నీషా కెరీర్ ఊపందుకుంది. నటిగా వెనుదిరిగి చూసుకోలేదు. ఖామోషి: ది మ్యూజికల్, గుప్త్: ది హిడెన్ ట్రూత్, దిల్ సే.., కుచ్చే ధాగే, మన్ 90 ల చివరి భాగంలో మ‌నీషా చేసిన కొన్ని సినిమాలు పెద్ద కమర్షియల్ హిట్‌లు విమర్శకుల ప్రశంసలు కూడా పొందాయి. అండాశయ క్యాన్సర్‌తో పోరాటం కారణంగా కొంత విరామం ఇచ్చింది. నటనకు విరామం తర్వాత, కొయిరాలా నెట్‌ఫ్లిక్స్ ఆంథాలజీ లస్ట్ స్టోరీస్, సంజు, నటుడు సంజయ్ దత్ బయోపిక్, దో పైసే కి ధూప్ చార్ ఆనే కి బారిష్ స‌హా మరిన్ని చిత్రాలలో నటించారు.

బాలీవుడ్- ప్రాంతీయ సినిమాల్లో విజయవంతమైన సినీ కెరీర్‌తో కొయిరాలా భారీ సంపదను సంపాదించారు. మ‌నీషా నిక‌ర ఆస్తుల విలువ‌ 99networth.com ప్రకారం ఇండియ‌న్ క‌రెన్సీలో 99 కోట్ల (USD 12 మిలియన్లు) విలువ‌ను క‌లిగి ఉంది. త‌దుప‌రి మ‌నీషా కొయిరాలా హీరామండిలో న‌టిస్తోంది. హీరామాండి విడుదల కోసం అభిమానులు ఆస‌క్తిగా ఎదురుచూస్తున్నారు.