లీక్ ఎఫెక్ట్: రాజమౌళి కొత్త వ్యూహం!

రాజమౌళి సినిమా అంటే ఏదో ఒక సారి లీక్ అవుతుందనేది కాస్త ఆశ్చర్యమే. ఎందుకంటే ఆయన ప్రాజెక్టులు చాలా సీక్రసీతో, కఠినమైన భద్రత మధ్య రూపొందుతాయి. అయితే, మహేష్ బాబు సినిమా విషయంలో ఈ అప్రమత్తత కూడా ఫలించలేదు. ఒడిశాలో జరిగిన అవుట్‌డోర్ షూటింగ్‌లో మహేష్ బాబు యాక్షన్ ఎపిసోడ్‌కు సంబంధించిన వీడియో లీకై సోషల్ మీడియాలో వైరల్ కావడం టీమ్‌కు పెద్ద షాక్ ఇచ్చింది. ఈ సంఘటన రాజమౌళికి తన పని విధానాన్ని పునర్విమర్శించుకునేలా చేసింది.

ఒక స్టార్ హీరో సినిమా షూటింగ్ నుంచి చిన్న క్లిప్ బయటకు వచ్చినా అది సెకండ్స్‌లో వైరల్ అవ్వడం సహజమే. కానీ, రాజమౌళి సినిమా అంటే అంచనాలు అందరికన్నా ఎక్కువ. స్క్రిప్ట్ లెవల్ నుంచే భద్రతా చర్యలు తీసుకునే దర్శకుడు కావడంతో, ఈ లీక్ ఎలా జరిగిందో అందరికీ ఆశ్చర్యంగా మారింది. నిజానికి, ఇది కేవలం ఒక వీడియో క్లిప్ మాత్రమే. కానీ, రాజమౌళి సినిమాల్లో ప్రతి షాట్ కథలో కీలకమైన భాగంగా ఉంటుందనే విషయం తెలిసిన వారికి, ఇది చాలా పెద్ద విషయం.

ఈ సంఘటన తరువాత, రాజమౌళి తన పని విధానంలో ఓ ప్రధానమైన మార్పు చేయాలని నిర్ణయించుకున్నట్లు తెలుస్తోంది. బాలీవుడ్ మీడియా రిపోర్ట్స్ ప్రకారం, ఇకపై ఎక్కువగా అవుట్‌డోర్ షెడ్యూల్స్ లేకుండా షూటింగ్‌ను కంట్రోల్ చేసే ప్లాన్‌లోకి వెళ్లబోతున్నారట. ఇందులో భాగంగా, బెనారస్ (కాశీ) వంటి సెటప్‌ను హైదరాబాద్‌లోనే స్పెషల్‌గా క్రియేట్ చేయిస్తున్నారని సమాచారం. నిజంగా కాశీలో షూట్ చేయాల్సిన కీలక పార్ట్‌లను ఇప్పుడు ఇన్‌డోర్ సెట్స్‌లో పూర్తి చేయాలని భావిస్తున్నట్లు తెలుస్తోంది.

ఇది కేవలం లీక్ ప్రాబ్లెమ్ మాత్రమే కాదు. అసలు బడ్జెట్ పరంగా కూడా ఇదే ఉత్తమమైన నిర్ణయం అని చెబుతున్నారు. ఓ భారీ సినిమా కోసం ఎంతో మంది తారాగణంతో, వందలాది కస్టములతో నిజమైన లొకేషన్‌లో షూటింగ్ చేయడం చాలా కష్టం. భద్రత కష్టమవుతుంది, పైగా ఎవరైనా కనీసం మొబైల్ బయటకు తీయగానే ఒక నిమిషంలో ఏదైనా లీక్ అవ్వడం ఖాయం. అలాంటి రిస్క్ తీసుకోవడం కన్నా, కంట్రోల్ చేయగలిగే ప్రదేశంలో షూట్ చేయడం ఉత్తమం.

ఇప్పటికే మహేష్ బాబు కూడా ఎక్కువగా ఇన్‌డోర్ షూటింగ్స్‌ను ప్రిఫర్ చేసే హీరో. ఆయన కెరీర్‌లో ఎక్కువసార్లు అవుట్‌డోర్ షూటింగ్‌లు తగ్గించే ప్రయత్నాలు చేసారు. ఈ లీక్ ఎఫెక్ట్ కారణంగా, రాజమౌళి కూడా అదే వైపు వెళ్లడానికి రెడీ అయ్యారు. దీంతో ఇకపై ఈ సినిమాలో అత్యధిక భాగం సెట్స్‌లోనే తెరకెక్కే అవకాశముందని చెబుతున్నారు. మొత్తానికి, రాజమౌళి ఎప్పుడూ తనను తాను మార్చుకుంటూ ముందుకు వెళ్లే దర్శకుడు. ఈ లీక్ ఆయనలో మరింత అప్రమత్తత తీసుకొచ్చింది. ఇకపై ఆయన సినిమాల్లో భద్రతా చర్యలు మరింత కఠినంగా అమలు కానున్నాయి.