మహేష్ బాబు - రాజమౌళి మూవీ "భారీ" అప్ డేట్స్ ఇవే!

ప్రస్తుతం టాలీవుడ్‌ తోపాటు పాన్ ఇండియా లెవల్లో ఎంతో ఆసక్తి రేపుతోంది మహేష్ బాబు, రాజమౌళి మూవీ. ఇప్పటికే తానేంటో నిరూపించుకున్న రాజమౌళి ఆర్.ఆర్.ఆర్. ఆస్కార్ వేదికపై మెరిసిన అనంతరం రాబోతున్న సినిమా కావడంతో ప్రపంచవ్యాప్తంగా ఇది ఆసక్తికరమైన అంశం. ఈ క్రమంలోనే ఈ యాక్షన్ అడ్వెంచర్ మూవీ ఎప్పుడు ప్రారంభం అవుతుందా అని ఫ్యాన్స్ ఆసక్తిగా ఎదురు చూస్తున్నారు. ఈ సమయంలో ఈ మూవీకి సంబంధించి భారీ అప్ డేట్స్ తెరపైకి వచ్చాయి.

అవును... మహేష్ బాబు - ఎస్.ఎస్. రాజమౌళి కాంబినేషన్ లోని మూవీకోసం సినిమా అభిమానులు ఏ రేంజ్ లో ఎదురుచూస్తున్నారనేది ప్రత్యేకంగా చెప్పనవసరం లేదు. ఈ సమయంలో అన్నీ అనుకూలంగా జరిగితే ఈ ఏడాది ఏప్రిల్ నుంచి ఈ సినిమా షూటింగ్ ప్రారంభం కావొచ్చని తెలుస్తుంది. ఈ సమయంలో అంతకంటే ముందు రాజమౌళి ఒక ప్రత్యేక వర్క్‌ షాప్‌ ని ప్లాన్ చేసారని.. దీనికి మహేష్ బాబుతో పాటు టీం మొత్తం హాజరుకానున్నారని అంటున్నారు.

ప్రపంచవ్యాప్తంగా సుమారు 3 దేశాల్లో ఈ సినిమా చిత్రీకరణ జరగనుందని తెలుస్తుండగా.. ప్రధానంగా అమెజాన్ అడవుల్లో కీలక సన్నివేశాలు చిత్రీకరిస్తారని అంటున్నారు. ఈ సమయంలో ఇప్పటికే ఆ అడవుల్లోని కొన్ని లొకేషన్స్ ని రాజమౌళి సర్కిల్ చేశారని తెలుస్తుంది. ప్రముఖ హాలీవుడ్ స్టూడియో కెఎల్ నారాయణతో కలిసి నిర్మిస్తున్న ఈ సినిమా బడ్జెట్ పై ఒక భారీ నెంబర్ తాజాగా తెరపైకి వచ్చింది.

ఇందులో భాగంగా... తొలి అంచనాల ప్రకారం ఈ చిత్రాన్ని రూ.1500 కోట్ల బడ్జెట్‌ తో ప్లాన్ చేస్తున్నారని తెలుస్తుంది. ఇదే సమయంలో రామోజీ ఫిల్మ్ సిటీలో ఏకంగా రూ.100 కోట్ల ఖర్చుతో ఓ భారీ సెట్ వేయనున్నట్లు తెలిసింది. ఈ సినిమాలో ఎక్కువ భాగం షూటింగ్ ఈ సెట్లోనే జరగనున్నట్లు సమాచారం. దీంతో రాజమౌళి మార్కు "భారీ"తనం ఈ సినిమాలో పుష్కలంగా కనిపించనుందనే కామెంట్స్ మొదలైపోయాయి!

కాగా... మహేష్ బాబు లేటెస్ట్ మూవీ "గుంటూరు కారం" సినిమా షూటింగ్ పూర్తిచేసుకుని రిలీజ్ కి రెడీగా ఉన్న సంగతి తెలిసిందే. ఈ సినిమా సంక్రాంతి కానుకగా ఈ నెల 12న విడుదల కాబోతుంది. ఈ వారం రోజులూ ఈ సినిమా ప్రమోషన్స్ లో ప్రిన్స్ బిజీగా ఉండబోతున్నాడని అంటున్నారు!