మహేష్ మూవీపై రానా ఇంట్రెస్టింగ్ కామెంట్స్!

సూపర్ స్టార్ మహేశ్ బాబు, SS రాజమౌళి కాంబినేషన్‌ కోసం సినీ అభిమానులు ఎంతో ఆసక్తిగా ఎదురుచూస్తున్నారు. 'SSMB 29' అనే వర్కింగ్ టైటిల్ తో పిలవబడుతున్న ఈ గ్లోబ్ ట్రాటింగ్ మూవీ.. వచ్చే ఏడాది ప్రారంభంలో సెట్స్ మీదకు వెళ్లనుంది. ఈ క్రేజీ ప్రాజెక్ట్ గ్లోబల్ బాక్సాఫీస్ ను షేక్ చేస్తుందని అందరూ భావిస్తున్నారు. తాజాగా హీరో రానా దగ్గుబాటి ఈ సినిమాపై ఇంట్రెస్టింగ్ కామెంట్స్ చేసారు. ఇది అన్ని బారియర్స్‌ను బ్రేక్ చేస్తుందని అన్నారు.

'ది రానా దగ్గుబాటి షో' ప్రమోషన్స్‌లో భాగంగా రానా ఓ ఇంటర్వ్యూలో మాట్లాడుతూ.. "తెలుగు సినిమా మరిన్ని హద్దులు బద్దలు కొట్టాలని నేను ఆశిస్తున్నాను. డెఫినెట్ గా మహేశ్ - రాజమౌళి సినిమా ప్రతీ ఒక్క బారియర్ ను బ్రేక్ చేస్తుంది. ఒక హాలీవుడ్‌ సినిమా అమెరికాలో ఎలా రిలీజ్ అవుతుందో, మన ఈ తెలుగు సినిమా కూడా అలా రిలీజ్ అవ్వాలని నేను మనస్ఫూర్తిగా కోరుకుంటున్నా. కచ్ఛితంగా అది జరుగుతుందని నాకు తెలుసు" అని అన్నారు. ఓటీటీల కారణంగానే భాషా అడ్డంకులు తొలగిపోయాయని రానా ఈ సందర్భంగా అభిప్రాయపడ్డారు.

"ఇంతకుముందు ఇండియన్‌ సినిమాలు అంటే వేరే దేశాల వారికి హిందీ చిత్రాలే తెలుసు. అసలు ఇతర లాంగ్వేజెస్ ఉన్నాయనే విషయమే తెలిసేది కాదు. కానీ ఇప్పుడు వాళ్ళకి కూడా అర్థమైంది వేరే భాషలు ఉన్నాయని. 'ఇది హిందీ సినిమా కాదు, తెలుగు సినిమా అంట. అది ఇండియాలో వేరే చోట తీస్తారు అంట' అని మాట్లాడుకుంటున్నారు. వాళ్ళు కూడా ఇప్పుడు మన సినిమాల గురించి అర్థం చేసుకుంటున్నారు. ఇప్పుడు ఓటీటీల కారణంగా ప్రపంచ వ్యాప్తంగా అన్ని భాషల్లోనూ సినిమాలు చూస్తున్నారు. బారియర్స్ తగ్గిపోతున్నాయి. రాజమౌళి తీసే పెద్ద సినిమాలే కాకుండా, చిన్న ఇండిపెండెంట్ ఫిల్మ్స్, మనకు లోకల్ గా కనెక్ట్ అయ్యే కథలు తీసినా కూడా ప్రపంచం చూసేందుకు రెడీగా ఉంది" అని రానా చెప్పుకొచ్చారు.

టాలీవుడ్ హ్యాండ్సమ్ హంక్ రానా దగ్గుబాటి హీరోగానే కాకుండా, నిర్మాతగా హోస్టుగా అలరిస్తున్న సంగతి తెలిసిందే. గతంలో 'నెం.1 యారీ' అనే సెలబ్రిటీ టాక్ షోని మూడు సీజన్ల పాటు సక్సెస్ ఫుల్ గా నిర్వహించారు. ఇప్పుడు రానా కొత్త టాక్ షో 'ది రానా దగ్గుబాటి షో' తో ప్రేక్షకుల ముందుకు రాబోతున్నారు. అమెజాన్‌ ప్రైమ్‌ వీడియో ఓటీటీ వేదికగా నవంబరు 23 నుంచి ఈ షో స్ట్రీమింగ్‌ కానుంది. రామ్ గోపాల్ వర్మ, ఎస్.ఎస్ రాజమౌళి, అక్కినేని నాగచైతన్య, దుల్కర్ సల్మాన్, నాని, ప్రియాంక మోహన్, సిద్ధు జొన్నలగడ్డ, రిషబ్‌ శెట్టి, శ్రీలీల, మీనాక్షి చౌదరి, తేజ సజ్జ లాంటి పలువురు సినీ సెలబ్రిటీలు సీజన్-1లో సందడి చేయబోతున్నారు. రానా సతీమణి మిహికా బజాజ్ కూడా ఒక ఎపిసోడ్ లో పాల్గొన్నారు.

ఇక SSMB29 విషయానికొస్తే, ఇది ఆఫ్రికన్ ఫారెస్ట్ బ్యాక్ డ్రాప్ లో రూపొందే అడ్వెంచర్ యాక్షన్ మూవీ. ప్రస్తుతం దీనికి సంబంధించిన ప్రీ ప్రొడక్షన్ కార్యక్రమాలు శరవేగంగా జరుగుతున్నాయి. ఇటీవలే రాజమౌళి లోకేషన్స్ వేట ప్రారంభించారు. మరోవైపు మహేష్ బాబు తన మేకోవర్ మీద దృష్టి పెట్టారు. మునుపెన్నడూ చూడని సరికొత్త లుక్ లో కనిపించడానికి కృషి చేస్తున్నారు. ఆ మధ్య లాంగ్ హెయిర్, గుబురు గడ్డంతో కనిపించిన మహేశ్.. రీసెంట్ గా ఎందుకనో గడ్డం కాస్త ట్రిమ్ చేసుకున్నారు. విజయేంద్ర ప్రసాద్ కథతో తెరకెక్కే ఈ చిత్రానికి ఎంఎం కీరవాణి సంగీతం సమకూరుస్తున్నారు. దుర్గా ఆర్ట్స్ బ్యానర్లో కేఎల్ నారాయణ ఈ భారీ బడ్జెట్ చిత్రాన్ని నిర్మిస్తున్నారు.